നീറ്റ് ചോദ്യപേപ്പർ ചോർച്ച മുഖ്യസൂത്രധാരൻ ജയ്പൂരിൽ പിടിയിൽ അന്വേഷണം സിബിഐക്ക്

നീറ്റ് ചോദ്യപേപ്പർ ചോർച്ച: മുഖ്യസൂത്രധാരൻ ജയ്പൂരിൽ പിടിയിൽ; അന്വേഷണം സിബിഐക്ക്

2026ലെ നീറ്റ്-യുജി (NEET-UG) പരീക്ഷാ ചോദ്യപേപ്പർ ചോർന്ന സംഭവത്തിൽ നിർണായക വഴിത്തിരിവ്. കേസിലെ മുഖ്യസൂത്രധാരൻ മനീഷ് യാദവിനെ രാജസ്ഥാനിലെ ജയ്പൂരിൽ നിന്ന് സ്‌പെഷൽ ഓപ്പറേഷൻസ് ഗ്രൂപ്പ് (SOG) അറസ്റ്റ് ചെയ്തു. മഹാരാഷ്ട്ര, ഉത്തരാഖണ്ഡ്, രാജസ്ഥാൻ എന്നീ സംസ്ഥാനങ്ങൾ കേന്ദ്രീകരിച്ച് നടന്ന വൻ ഗൂഢാലോചനയുടെ വിവരങ്ങളാണ് പുറത്തുവരുന്നത്. കേസിന്റെ വ്യാപ്തി പരിഗണിച്ച് അന്വേഷണം സിബിഐക്ക് കൈമാറി.

​മെയ് 3-ന് നടന്ന പരീക്ഷയ്ക്ക് മുൻപ് പ്രചരിച്ച മാതൃകാ ചോദ്യക്കടലാസിലെ 135 ചോദ്യങ്ങൾ യഥാർഥ പരീക്ഷയിൽ അതേപടി വന്നതാണ് തട്ടിപ്പ് പുറത്തുകൊണ്ടുവന്നത്. മാതൃകയായി നൽകിയ 410 ചോദ്യങ്ങളിൽ 135 എണ്ണം കെമിസ്ട്രി, ബയോളജി വിഭാഗങ്ങളിൽ നിന്നുള്ളവയായിരുന്നു. ഈ ചോദ്യപേപ്പറിനായി വിദ്യാർഥികളിൽ നിന്ന് 30,000 രൂപ മുതൽ 7 ലക്ഷം രൂപ വരെ ഈടാക്കിയതായി രാജസ്ഥാൻ എസ്‌ഒജി എഡിജിപി വിശാൽ ബൻസാൽ അറിയിച്ചു.

​കേരളത്തിലെ ഒരു മെഡിക്കൽ കോളേജിൽ പഠിക്കുന്ന രാജസ്ഥാൻ സ്വദേശിനിയായ വിദ്യാർഥിനിയാണ് ചോദ്യങ്ങൾ പുറത്തെത്തിച്ചതെന്നാണ് പ്രാഥമിക വിവരം. മേയ് ഒന്നിന് ഈ വിദ്യാർഥിനി തന്റെ പിതാവിന് ചോദ്യങ്ങൾ കൈമാറുകയും, അദ്ദേഹം അത് രാജസ്ഥാനിലെ ഒരു കോച്ചിങ് സെന്ററിന് നൽകുകയും ചെയ്തു. ഈ കോച്ചിങ് സെന്റർ അധികൃതർ തന്നെയാണ് പരീക്ഷാ ഏജൻസിയെ വിവരമറിയിച്ചത്. ഇതിനിടെ വാട്സ്ആപ്പ് ഗ്രൂപ്പുകൾ വഴി മഹാരാഷ്ട്രയിലേക്കും ഉത്തരാഖണ്ഡിലേക്കും ചോദ്യങ്ങൾ വ്യാപിച്ചിരുന്നു.

​ചോദ്യപേപ്പർ ചോർച്ചയിൽ രാജ്യവ്യാപകമായി വിദ്യാർത്ഥി രോഷം ഇരമ്പുകയാണ്. ഡൽഹിയിൽ എൻഎസ്‌യുഐയുടെ (NSUI) നേതൃത്വത്തിൽ വൻ പ്രതിഷേധ പ്രകടനങ്ങൾ നടന്നു. നിലവിൽ ഉത്തരാഖണ്ഡിൽ നിന്ന് 13 പേരെയും ജയ്പൂരിൽ നിന്ന് മനീഷ് യാദവിനെയും അറസ്റ്റ് ചെയ്തിട്ടുണ്ട്. ചോദ്യപേപ്പറിന്റെ ഉറവിടം മഹാരാഷ്ട്രയിലെ നാസിക് ആണെന്നാണ് അന്വേഷണ സംഘത്തിന്റെ നിഗമനം.