വീട്ടിൽ സ്ഫോടകവസ്തു എറിഞ്ഞ കേസ് മുടക്കുഴ സ്വദേശിക്കെതിരെ കാപ്പ ചുമത്തി, വിയ്യൂർ ജയിലിലടച്ചു
നിരന്തര കുറ്റവാളിയായ ബിനുവിനെ കാപ്പ ചുമത്തി വിയ്യൂർ ജയിലിലടച്ചു. വയോധികയുടെ വീട്ടിൽ പടക്കം എറിഞ്ഞതും നിരവധി കേസുകളിൽ പ്രതിയായതുമാണ് നടപടിക്ക് കാരണം.
Angel Varghese 
കാപ്പ ചുമത്തി വിയ്യൂർ ജയിലിലടച്ചു: മുടക്കുഴ സ്വദേശി ബിനു അറസ്റ്റിൽ
പെരുമ്പാവൂർ: നിരന്തര കുറ്റവാളിയായ വേങ്ങൂർ മുടക്കുഴ മൂലേത്തുംകുടി വീട്ടിൽ ബിനു (39) വിനെ കാപ്പ (KAAPA) ചുമത്തി ജയിലിലടച്ചു. എറണാകുളം റൂറൽ ജില്ലാ പോലീസ് മേധാവിയുടെ റിപ്പോർട്ടിൻ്റെ അടിസ്ഥാനത്തിൽ ജില്ലാ കളക്ടർ ജി. പ്രിയങ്കയാണ് ഉത്തരവിട്ടത്. വിയ്യൂർ സെൻട്രൽ ജയിലിലേക്കാണ് ഇയാളെ മാറ്റിയത്.
കോടനാട് പോലീസ് സ്റ്റേഷൻ പരിധിയിൽ കൊലപാതകശ്രമം, കഠിനമായ ദേഹോപദ്രവം, വീടുകയറി ആക്രമിക്കൽ, ഭീഷണിപ്പെടുത്തൽ, സ്ഫോടക വസ്തു നിയമം തുടങ്ങിയ നിരവധി കേസുകളിൽ ബിനു പ്രതിയാണ്.
അവസാനമായി രജിസ്റ്റർ ചെയ്ത കേസ്
കഴിഞ്ഞ ഫെബ്രുവരി 2-ന് രാത്രി എട്ടു മണിയോടെ മുടക്കുഴയിലുള്ള ഒരു വയോധികയുടെ വീട്ടിൽ അതിക്രമിച്ച് കയറി സ്ഫോടകവസ്തുവായ ഗുണ്ട് കത്തിച്ചെറിയുകയും, കമ്പിവടി കാട്ടി കൊല്ലുമെന്ന് ഭീഷണിപ്പെടുത്തുകയും ചെയ്ത സംഭവത്തിലാണ് ബിനുവിനെതിരെ ഒടുവിലായി കോടനാട് പോലീസ് കേസെടുത്തത്. ഈ കേസിൻ്റെ ഗൗരവം കണക്കിലെടുത്താണ് ഇയാൾക്കെതിരെ കാപ്പ ചുമത്താൻ തീരുമാനിച്ചത്.
കോടനാട് പോലീസ് ഇൻസ്പെക്ടർ എ.എസ് സരിൻ, അസിസ്റ്റൻ്റ് സബ്ബ് ഇൻസ്പെക്ടർ അനീഷ് കുര്യാക്കോസ്, സീനിയർ സിവിൽ പോലീസ് ഓഫീസർ പ്രവീൺ, സി.പി.ഒ മാരായ സി.കെ സജിൽ, സിനോജ് ഫ്രാൻസിസ് എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്. എറണാകുളം റൂറൽ ജില്ലയിൽ ഈ വർഷം ഇതുവരെ ഒമ്പത് നിരന്തര കുറ്റവാളികളെയാണ് കാപ്പ ചുമത്തി ജയിലിലടച്ചത്.
