തിരുന്നാവായയിൽ ചരിത്രമെഴുതി മഹാകുംഭമേള പുതുവർഷത്തിൽ
തിരുന്നാവായയിൽ ചരിത്രമെഴുതി മഹാകുംഭമേള 2026 കേരളത്തിൽ ആദ്യമായി, ഭാരതപ്പുഴയുടെ തീരത്ത് ജനുവരി 18 മുതൽ ഫെബ്രുവരി 3 വരെ നിളാനദിയിലെ പുണ്യസ്നാനം പ്രധാന ചടങ്ങ്
അനില എം കൃഷ്ണൻ 
തിരുന്നാവായയിൽ ചരിത്രമെഴുതി മഹാകുംഭമേള 2026
കേരളത്തിൽ ആദ്യമായി, ഭാരതപ്പുഴയുടെ തീരത്ത് ജനുവരി 18 മുതൽ ഫെബ്രുവരി 3 വരെ നിളാനദിയിലെ പുണ്യസ്നാനം പ്രധാന ചടങ്ങ്
കേരളത്തിൻ്റെ ചരിത്രത്തിൽ ആദ്യമായി, മഹാകുംഭമേളയ്ക്ക് മലപ്പുറം ജില്ലയിലെ പുണ്യഭൂമിയായ തിരുന്നാവായ വേദിയാകുന്നു. 2026 ജനുവരി 18 മുതൽ ഫെബ്രുവരി 3 വരെ ഭാരതപ്പുഴയുടെ തീരത്തുള്ള നാവ മുകുന്ദ ക്ഷേത്രത്തിന് മുന്നിലാണ് ഈ മഹാസംഗമം നടക്കുക. ഉത്തരേന്ത്യൻ കുംഭമേളകളുടെ പാരമ്പര്യം പേറുന്നതും ഇന്ത്യയിലെ ഏറ്റവും വലിയ സന്യാസിമഠങ്ങളിൽ ഒന്നുമായ ജൂന അഖാറയാണ് ഈ മേളയ്ക്ക് നേതൃത്വം നൽകുന്നത്.
ലക്ഷക്കണക്കിന് ഭക്തർ പങ്കെടുക്കുമെന്ന് പ്രതീക്ഷിക്കുന്ന ഈ മേളയുടെ പ്രധാന ആകർഷണം പുണ്യനദിയായ നിളാനദിയിലെ (ഭാരതപ്പുഴ) പുണ്യ സ്നാനമാണ്. വിവിധ അഖാറകളിൽ നിന്നുള്ള നൂറുകണക്കിന് സന്യാസിമാരുടെയും മഠാധിപതികളുടെയും സാന്നിധ്യം തിരുന്നാവായയുടെ ആത്മീയ പ്രാധാന്യം വർദ്ധിപ്പിക്കും.
പന്ത്രണ്ട് വർഷത്തിലൊരിക്കൽ തിരുനാവായിൽ നടന്നിരുന്ന ഐതിഹ്യപരമായ മാമാങ്കം മഹോത്സവത്തിൻ്റെ പാരമ്പര്യവുമായും ഈ കുംഭമേള ബന്ധപ്പെടുത്തി ചർച്ചചെയ്യപ്പെടുന്നുണ്ട്. കേരളത്തിൻ്റെ സാംസ്കാരിക, ആത്മീയ ഭൂപടത്തിൽ തിരുന്നാവായയെ ശ്രദ്ധാകേന്ദ്രമാക്കുന്ന സുപ്രധാന സംഭവമായിരിക്കും ഈ മഹാകുംഭമേള. മേളയുടെ വിജയകരമായ നടത്തിപ്പിനായി വിപുലമായ ഒരുക്കങ്ങളാണ് സംഘാടകർ നടത്തുന്നത്.
