കൊച്ചി വിമാനത്താവളം ആഗോള ഏവിയേഷൻ ഹബ്ബാകുന്നു സിയാൽ എയ്റോ പാർക്ക് മുഖ്യമന്ത്രി ഉദ്ഘാടനം ചെയ്തു
സിയാലിനെ ലോകനിലവാരത്തിലുള്ള സമ്പൂർണ്ണ വ്യോമയാന വ്യവസായ കേന്ദ്രമാക്കുകയാണ് ലക്ഷ്യമെന്ന് മുഖ്യമന്ത്രി പിണറായി വിജയൻ. സിയാൽ എയ്റോ പാർക്ക് ഒന്നാം ഘട്ടം ഉദ്ഘാടനം ചെയ്തുകൊണ്ട്, കൊച്ചിയെ രാജ്യത്തെ വിമാന അറ്റകുറ്റപ്പണികളുടെ (MRO) പ്രധാന ഹബ്ബാക്കി മാറ്റുന്ന പദ്ധതികളെക്കുറിച്ച് അദ്ദേഹം വിശദീകരിച്ചു.
അനില എം കൃഷ്ണൻ
268
നെടുമ്പാശ്ശേരി: കൊച്ചി അന്താരാഷ്ട്ര വിമാനത്താവളത്തെ (CIAL) കേവലം ഒരു യാത്രാ കേന്ദ്രം എന്നതിലുപരി ലോകനിലവാരത്തിലുള്ള സമ്പൂർണ്ണ വ്യോമയാന വ്യവസായ കേന്ദ്രമാക്കി (Aviation Ecosystem) മാറ്റുകയാണ് ലക്ഷ്യമെന്ന് മുഖ്യമന്ത്രി പിണറായി വിജയൻ. സിയാലിന്റെ ബൃഹദ് പദ്ധതിയായ ‘എയ്റോ പാർക്ക്’ ഒന്നാം ഘട്ടത്തിന്റെ ഉദ്ഘാടനം നിർവഹിച്ചു സംസാരിക്കുകയായിരുന്നു അദ്ദേഹം. കൊച്ചിയെ രാജ്യത്തെ വിമാന അറ്റകുറ്റപ്പണികളുടെ (MRO) ഹബ്ബാക്കി മാറ്റാനാണ് സർക്കാർ ലക്ഷ്യമിടുന്നത്.
തൊഴിലവസരങ്ങളും അടിസ്ഥാന സൗകര്യങ്ങളും
എയ്റോ പാർക്ക് ഒന്നാം ഘട്ടത്തിനായി 101 കോടി രൂപയുടെ വിപുലമായ സൗകര്യങ്ങളാണ് സിയാൽ സജ്ജമാക്കിയിരിക്കുന്നത്. പദ്ധതി പൂർണ്ണതോതിൽ സജ്ജമാകുന്നതോടെ നേരിട്ട് 2000 പേർക്കും പരോക്ഷമായി ആറായിരത്തോളം പേർക്കും തൊഴിൽ ലഭിക്കുമെന്ന് മുഖ്യമന്ത്രി വ്യക്തമാക്കി. വിമാന അറ്റകുറ്റപ്പണികൾ, സാങ്കേതിക വിദഗ്ധർക്കുള്ള പരിശീലനം, ദീർഘകാല പാർക്കിംഗ് സൗകര്യം, സ്റ്റോറേജ് സംവിധാനങ്ങൾ എന്നിവ ഇതിന്റെ ഭാഗമായി ഒരുങ്ങും.
ഉദ്ഘാടനം ചെയ്ത പ്രധാന പദ്ധതികൾ:
ബിസിനസ് സെന്റർ: 30 കോടി രൂപ ചെലവിൽ 40,000 ചതുരശ്ര അടിയിൽ നിർമ്മിച്ച സി.ഐ.എ.എസ്.എൽ (CIASL) ബിസിനസ് സെന്റർ പ്രവർത്തനം ആരംഭിച്ചു.
ടെക്നിക്കൽ സർവീസസ് ഫെസിലിറ്റി: വിമാനത്താവളത്തിലെ അത്യാധുനിക യന്ത്രങ്ങളുടെയും വാഹനങ്ങളുടെയും പരിപാലനത്തിനായി 13 കോടി രൂപയുടെ കേന്ദ്രം.
ബ്രീത്തിങ് അപ്പാരറ്റസ് ട്രെയിനിങ് സെന്റർ: പുക നിറഞ്ഞതും ഇടുങ്ങിയതുമായ സ്ഥലങ്ങളിൽ രക്ഷാപ്രവർത്തനം നടത്താൻ അഗ്നിശമന സേനാംഗങ്ങളെ പ്രാപ്തരാക്കുന്ന ഇന്ത്യയിലെ തന്നെ ഏറ്റവും വലിയ പരിശീലന കേന്ദ്രം.
ഭാവി പദ്ധതികൾ
എയ്റോ പാർക്കിന്റെ ഭാഗമായി 56 കോടി രൂപയുടെ മൂന്ന് പുതിയ പദ്ധതികൾ കൂടി ഉടൻ യാഥാർത്ഥ്യമാകും. ഇതിൽ കേരളത്തിലെ ആദ്യത്തെ കവേഡ് എയർക്രാഫ്റ്റ് പാർക്കിംഗ് സംവിധാനം (45 കോടി രൂപ), ഏവിയേഷൻ പ്രഷർ സെറ്റഡ് ഫയർ ഫൈറ്റിംഗ് ഫെസിലിറ്റി, അണ്ടർവാട്ടർ ക്രൂ മെയിന്റനൻസ് സൗകര്യം എന്നിവ ഉൾപ്പെടുന്നു.
സിയാൽ ഐടി പാർക്ക് ഉൾപ്പെടുന്ന രണ്ടാം ഘട്ടവും, എയ്റോസിറ്റി ഉൾപ്പെടുന്ന മൂന്നാം ഘട്ടവും പൂർത്തിയാകുന്നതോടെ സിയാൽ ഒരു സമ്പൂർണ്ണ വ്യോമയാന ആവാസവ്യവസ്ഥയായി മാറുമെന്ന് മുഖ്യമന്ത്രി കൂട്ടിച്ചേർത്തു. കഴിഞ്ഞ പത്ത് വർഷത്തെ വികസന കാഴ്ചപ്പാടുകൾ സിയാലിന്റെയും നാടിന്റെയും മുഖച്ഛായ മാറ്റിയെന്നും അദ്ദേഹം പറഞ്ഞു.
ചടങ്ങിൽ വ്യവസായ വകുപ്പ് മന്ത്രി പി. രാജീവ് അധ്യക്ഷത വഹിച്ചു. ഹാരിസ് ബീരാൻ എം.പി, എം.എൽ.എമാരായ അൻവർ സാദത്ത്, റോജി എം. ജോൺ, സിയാൽ ഡയറക്ടർ എം.എ. യൂസഫലി, ചീഫ് സെക്രട്ടറി ഡോ. എ. ജയതിലക്, സിയാൽ എം.ഡി എസ്. സുഹാസ് തുടങ്ങിയ പ്രമുഖർ പങ്കെടുത്തു.
