ലെജൻഡ് ശരവണന്റെ ലീഡർ ടീസർ പുറത്ത് ആവേശമായി മാസ് ആക്ഷൻ ദൃശ്യങ്ങൾ
ആർ.എസ്. ദുരൈ സെന്തിൽകുമാർ സംവിധാനം ചെയ്യുന്ന ലെജൻഡ് ശരവണൻ ചിത്രം ലീഡർ ടീസർ പുറത്തിറങ്ങി. ഏപ്രിലിൽ ചിത്രം തീയേറ്ററുകളിലെത്തും.
Sabari 
മാസ് ആക്ഷനുമായി ലെജൻഡ് ശരവണൻ; 'ലീഡർ' ടീസർ പുറത്തിറങ്ങി
ചെന്നൈ: തെന്നിന്ത്യൻ സിനിമാ ലോകം ആകാംക്ഷയോടെ കാത്തിരിക്കുന്ന ലെജൻഡ് ശരവണൻ ചിത്രം 'ലീഡറി'ന്റെ ടീസർ പുറത്തിറങ്ങി. ചെന്നൈയിലെ കമല തിയേറ്ററിൽ നടന്ന പ്രൗഢഗംഭീരമായ ചടങ്ങിലാണ് ടീസർ ഔദ്യോഗികമായി ലോഞ്ച് ചെയ്തത്. ആർ.എസ്. ദുരൈ സെന്തിൽകുമാർ സംവിധാനം ചെയ്യുന്ന ഈ ചിത്രം ഒരു പാൻ-ഇന്ത്യൻ ബിഗ് ബജറ്റ് ആക്ഷൻ ഡ്രാമയായാണ് ഒരുങ്ങുന്നത്.
പിതാവിന്റെ പോരാട്ടം; മാസ് ലുക്കിൽ ശരവണൻ
ഒരു മിനിറ്റും 21 സെക്കൻഡും ദൈർഘ്യമുള്ള ടീസർ ആവേശകരമായ ആക്ഷൻ രംഗങ്ങളാൽ സമ്പന്നമാണ്. തന്റെ മകളെ സംരക്ഷിക്കാൻ ഏതറ്റം വരെയും പോകുന്ന ഒരു പിതാവിന്റെ വേഷത്തിലാണ് ലെജൻഡ് ശരവണൻ എത്തുന്നത്. അധോലോകവും പോലീസ് സേനയും തമ്മിലുള്ള പോരാട്ടത്തിനിടയിൽ അകപ്പെട്ടുപോകുന്ന ഒരു സാധാരണക്കാരന്റെ അതിജീവനവും വൈകാരിക യാത്രയുമാണ് സിനിമയുടെ പ്രമേയമെന്ന് സംവിധായകൻ ആർ.എസ്. ദുരൈ സെന്തിൽകുമാർ വ്യക്തമാക്കി.
ഏപ്രിലിൽ തിയേറ്ററുകളിലേക്ക്
ലെജൻഡ് ശരവണ സ്റ്റോർസ് പ്രൊഡക്ഷൻസ് നിർമ്മിക്കുന്ന ഈ ചിത്രം ഏപ്രിൽ മാസത്തിൽ തീയേറ്ററുകളിലെത്തും. തമിഴ്, തെലുങ്ക്, മലയാളം, കന്നഡ, ഹിന്ദി എന്നീ അഞ്ച് ഭാഷകളിലായിട്ടാണ് റിലീസ്. പായൽ രാജ്പുത് നായികയാകുന്ന ചിത്രത്തിൽ ഷാം, ആൻഡ്രിയ ജെറമിയ, ലാൽ, പ്രഭാകർ, അമൃത അയ്യർ തുടങ്ങിയ വൻ താരനിര അണിനിരക്കുന്നുണ്ട്.
അണിയറപ്രവർത്തകർ
ജിബ്രാൻ വൈബോധയാണ് ചിത്രത്തിന് സംഗീതം നൽകിയിരിക്കുന്നത്. എസ്. വെങ്കിടേഷ് ഛായാഗ്രഹണവും പ്രദീപ് ഇ. രാഘവ് എഡിറ്റിംഗും നിർവ്വഹിക്കുന്നു. തൂത്തുക്കുടി, ജയ്പൂർ, ഊട്ടി, ജോർജിയ എന്നിവിടങ്ങളിലായിട്ടാണ് ചിത്രീകരണം പൂർത്തിയാക്കിയത്. 'ദി ലെജൻഡ്' എന്ന ചിത്രത്തിന് ശേഷം ശരവണൻ നായകനായി എത്തുന്ന രണ്ടാമത്തെ ചിത്രമാണിത്.
