പെരുമ്പാവൂർ എം.എൽ.എയുടെ വ്യാജ പി.എ ചമഞ്ഞ് പണം തട്ടാൻ ശ്രമിച്ചയാൾ പിടിയിൽ

​എം.എൽ.എയുടെ പി.എ ചമഞ്ഞ് പണം തട്ടാൻ ശ്രമം; കുപ്രസിദ്ധ തട്ടിപ്പുകാരൻ പെരുമ്പാവൂരിൽ പിടിയിൽ

​പെരുമ്പാവൂർ: പെരുമ്പാവൂർ എം.എൽ.എയുടെ പി.എ (Personal Assistant) ആണെന്ന് വ്യാജേന ഫോണിൽ വിളിച്ച് പണം തട്ടാൻ ശ്രമിച്ച കേസിലെ പ്രതി പെരുമ്പാവൂർ പോലീസിന്റെ പിടിയിലായി. കോട്ടപ്പടി ഇടയാൽ വീട്ടിൽ സുരേഷ് (42) ആണ് അറസ്റ്റിലായത്. കാഞ്ഞിരക്കാട് സ്വദേശിയായ സജിത്ത് നൽകിയ പരാതിയുടെ അടിസ്ഥാനത്തിലാണ് പോലീസ് നടപടി.

​ജൂലൈ 15-നായിരുന്നു കേസിനാസ്പദമായ സംഭവം. സജിത്തിന്റെ ഫോണിലേക്ക് വിളിച്ച പ്രതി, താൻ പെരുമ്പാവൂർ എം.എൽ.എയുടെ പി.എ ആണെന്ന് പരിചയപ്പെടുത്തുകയായിരുന്നു. എം.എൽ.എയുടെ വീടിന് സമീപവാസിയായ സ്ത്രീക്ക് ഡയാലിസിസ് ചികിത്സയ്ക്കായി അടിയന്തിരമായി പണം വേണമെന്ന് വിശ്വസിപ്പിച്ച് ഗൂഗിൾ പേ (Google Pay) വഴി തുക അയച്ചുനൽകാൻ ആവശ്യപ്പെട്ടു. എന്നാൽ പ്രതിയുടെ സംസാരത്തിൽ സംശയം തോന്നിയ സജിത്ത് പണം കൈമാറാതെ പോലീസിൽ പരാതി നൽകുകയായിരുന്നു.

​അറസ്റ്റിലായ സുരേഷ് നിരവധി കേസുകളിലെ പ്രതിയാണെന്ന് പോലീസ് പറഞ്ഞു. കാട്ടാക്കട, പെരുമ്പാവൂർ, കുറുപ്പംപടി, കോട്ടപ്പടി, കോടനാട്, കോതമംഗലം എന്നീ പോലീസ് സ്റ്റേഷൻ അതിർത്തികളിൽ ഇയാൾക്കെതിരെ കേസുകളുണ്ട്. ഇതിൽ കാട്ടാക്കട സ്റ്റേഷനിൽ സമാനമായ രീതിയിൽ വ്യാജ വേഷത്തിൽ പണം തട്ടിയതിന് കേസ നിലവിലുണ്ട്.

​പെരുമ്പാവൂർ എസ്.എച്ച്.ഒ എ. അക്ഷയ് കുമാർ, എസ്.ഐമാരായ മാർട്ടിൻ ജോസഫ്, എസ്.എൽ. അർജുൻ, എ.എസ്.ഐ രതി, സീനിയർ സി.പി.ഒ കെ.ബി. മാഹിൻഷാ, സി.പി.ഒമാരായ സിബിൻ, നജ്മി എന്നിവരടങ്ങിയ അന്വേഷണ സംഘമാണ് പ്രതിയെ വലയിലാക്കിയത്.