വികസനക്കുതിപ്പിൽ കേരളം; 10,000 കോടിയിലധികം രൂപയുടെ പദ്ധതികൾ ഉദ്ഘാടനം ചെയ്യാൻ പ്രധാനമന്ത്രി കൊച്ചിയിൽ
കൊച്ചി റിഫൈനറിയിലെ പോളിപ്രൊപ്പലിൻ യൂണിറ്റ്, ദേശീയപാത വികസനം, റെയിൽവേ പദ്ധതികൾ തുടങ്ങി വിവിധ കേന്ദ്ര സർക്കാർ പദ്ധതികളുടെ ഉദ്ഘാടനത്തിനായി പ്രധാനമന്ത്രി നരേന്ദ്രമോദി കൊച്ചിയിലെത്തും.
Angel Varghese 
കൊച്ചി: കേരളത്തിന്റെ വികസന ഭൂപടത്തിൽ പുതിയ നാഴികക്കല്ലുകൾ കുറിച്ചുകൊണ്ട് വിവിധ കേന്ദ്രസർക്കാർ പദ്ധതികളുടെ ഉദ്ഘാടനത്തിനായി പ്രധാനമന്ത്രി നരേന്ദ്രമോദി മാർച്ച് 11 ബുധനാഴ്ച കൊച്ചിയിലെത്തും. 10,000 കോടിയിലധികം രൂപയുടെ വികസന പദ്ധതികളാണ് അദ്ദേഹം നാടിന് സമർപ്പിക്കുന്നത്.
സന്ദർശന പരിപാടികൾ ഇങ്ങനെ:
രാവിലെ 11:45-ന് നെടുമ്പാശ്ശേരി വിമാനത്താവളത്തിലെത്തുന്ന പ്രധാനമന്ത്രി, അവിടെനിന്ന് ഹെലികോപ്റ്റർ മാർഗം ഉച്ചയ്ക്ക് 12:15-ന് കൊച്ചി നാവിക ആസ്ഥാനത്തെത്തും. തുടർന്ന് റോഡ് മാർഗം മറൈൻ ഡ്രൈവിലേക്ക് തിരിക്കും. 12:30 മുതൽ 1:00 വരെ മറൈൻ ഡ്രൈവിൽ നടക്കുന്ന പൊതുസമ്മേളനത്തിൽ അദ്ദേഹം സംസാരിക്കും.
ഉച്ചയ്ക്ക് 1:15-ന് കലൂർ അന്താരാഷ്ട്ര സ്റ്റേഡിയത്തിൽ നടക്കുന്ന പ്രധാന ചടങ്ങിൽ വെച്ചാണ് വിവിധ പദ്ധതികളുടെ ഉദ്ഘാടനവും ശിലാസ്ഥാപനവും നിർവഹിക്കുന്നത്.
പ്രധാന പദ്ധതികൾ ഒറ്റനോട്ടത്തിൽ:
BPCL പോളിപ്രൊപ്പലിൻ യൂണിറ്റ്: കൊച്ചി റിഫൈനറിയിൽ 5,500 കോടി രൂപ ചെലവിൽ നിർമ്മിച്ച യൂണിറ്റ്.
ദേശീയപാത 66 വികസനം: 2,650 കോടി രൂപയുടെ തലപ്പാടി-ചെങ്കള ആറുവരിപ്പാതയും, 2,140 കോടി രൂപയുടെ കോഴിക്കോട് ബൈപ്പാസും നാടിന് സമർപ്പിക്കും.
സൗരോർജ്ജ പദ്ധതി: കൊല്ലം വെസ്റ്റ് കല്ലടയിലെ 50 മെഗാവാട്ട് ഫ്ലോട്ടിംഗ് സോളാർ പ്ലാന്റിന് ശിലാസ്ഥാപനം.
റെയിൽവേ വികസനം: അമൃത് ഭാരത് പദ്ധതിയിൽ നവീകരിച്ച ഷൊർണൂർ, കുറ്റിപ്പുറം, ചങ്ങനാശ്ശേരി സ്റ്റേഷനുകളുടെ ഉദ്ഘാടനവും ഷൊർണൂർ-നിലമ്പൂർ പാതയുടെ വൈദ്യുതീകരണ സമർപ്പണവും.
പുതിയ ട്രെയിൻ: പാലക്കാട് - പൊള്ളാച്ചി റൂട്ടിലെ പുതിയ ട്രെയിൻ സർവീസിന്റെ ഫ്ലാഗ് ഓഫ്.
ഉദ്ഘാടന ചടങ്ങുകൾക്ക് ശേഷം 2:15 മുതൽ 3:15 വരെ കലൂർ സ്റ്റേഡിയത്തിൽ നടക്കുന്ന പൊതുസമ്മേളനത്തിലും അദ്ദേഹം പങ്കെടുക്കും. വൈകുന്നേരം 3:20-ഓടെ നാവിക ആസ്ഥാനത്ത് നിന്ന് അദ്ദേഹം നെടുമ്പാശ്ശേരിയിലേക്ക് തിരിക്കും.
