പൊതുവിദ്യാഭ്യാസ മേഖലയിൽ കടുത്ത പ്രതിസന്ധിയെന്ന് വി. ശിവൻകുട്ടി
സംസ്ഥാനത്ത് പുതിയ മന്ത്രിസഭ അധികാരമേൽക്കാൻ വൈകുന്നത് സ്കൂൾ ഫിറ്റ്നസ് പരിശോധനയെയും പാഠപുസ്തക വിതരണത്തെയും ബാധിച്ചുവെന്ന് മുൻ മന്ത്രി വി. ശിവൻകുട്ടി.
അനില എം കൃഷ്ണൻ 
തിരുവനന്തപുരം: സംസ്ഥാനത്ത് മന്ത്രിസഭാ രൂപീകരണം വൈകുന്നത് പൊതുവിദ്യാഭ്യാസ മേഖലയെ കടുത്ത പ്രതിസന്ധിയിലാക്കിയിരിക്കുകയാണെന്ന് മുൻ വിദ്യാഭ്യാസ മന്ത്രി വി. ശിവൻകുട്ടി. പുതിയ അധ്യയന വർഷം ആരംഭിക്കാൻ ദിവസങ്ങൾ മാത്രം ബാക്കിനിൽക്കെ, വകുപ്പിനെ നയിക്കാൻ മന്ത്രിയില്ലാത്തത് പ്രവർത്തനങ്ങളെ അവതാളത്തിലാക്കിയെന്ന് അദ്ദേഹം തന്റെ സോഷ്യൽ മീഡിയ കുറിപ്പിലൂടെ കുറ്റപ്പെടുത്തി.
വോട്ടെണ്ണൽ കഴിഞ്ഞ് ദിവസങ്ങൾ പിന്നിട്ടിട്ടും ഭരണപരമായ നേതൃത്വം ഇല്ലാത്തത് വിദ്യാഭ്യാസ വകുപ്പിന്റെ ഏകോപനത്തെ ബാധിച്ചു. എസ്എസ്എൽസി ഫലപ്രഖ്യാപനവുമായി ബന്ധപ്പെട്ട് നിലനിന്ന ആശയക്കുഴപ്പങ്ങൾ ഇതിന്റെ ഉദാഹരണമാണെന്നും അദ്ദേഹം ചൂണ്ടിക്കാട്ടി.
സ്കൂൾ ഫിറ്റ്നസ്: മഴക്കാലം ആരംഭിക്കുന്നതിനും സ്കൂൾ തുറക്കുന്നതിനും മുൻപ് പൂർത്തിയാക്കേണ്ട സ്കൂൾ കെട്ടിടങ്ങളുടെ ഫിറ്റ്നസ് പരിശോധനകൾ നിലച്ചിരിക്കുകയാണ്.
പാഠപുസ്തക വിതരണം: പാഠപുസ്തകങ്ങളുടെ അച്ചടിയും വിതരണവും കൃത്യസമയത്ത് പൂർത്തിയാക്കാൻ മന്ത്രിതലത്തിലുള്ള നിരന്തരമായ നിരീക്ഷണവും ഇടപെടലും ആവശ്യമാണ്. ഇതില്ലാത്തത് വിതരണത്തിൽ വലിയ കാലതാമസമുണ്ടാക്കും.
അധ്യാപക പരിശീലനവും ഫണ്ടും: കേന്ദ്രം എസ്എസ്കെ (SSK) ഫണ്ട് നിർത്തലാക്കിയ സാഹചര്യത്തിൽ, സംസ്ഥാന സർക്കാരിൽ നിന്ന് പ്രത്യേക ഫണ്ട് അനുവദിച്ച് അധ്യാപക പരിശീലനവും ശമ്പളവും ഉറപ്പാക്കാൻ മന്ത്രിതല ഇടപെടൽ അനിവാര്യമാണ്. നിലവിൽ ഈ മേഖലയും നിശ്ചലമാണ്.
മികച്ച മുന്നൊരുക്കങ്ങളിലൂടെ മുന്നോട്ട് പോയിരുന്ന പൊതുവിദ്യാഭ്യാസ വകുപ്പ് ഇപ്പോൾ നാഥനില്ലാത്ത അവസ്ഥയിലാണെന്നും, അടിയന്തര ഇടപെടൽ ഉണ്ടായില്ലെങ്കിൽ വലിയ പ്രത്യാഘാതങ്ങൾ ഉണ്ടാകുമെന്നും വി. ശിവൻകുട്ടി മുന്നറിയിപ്പ് നൽകി.
