വാണിജ്യ സിലിണ്ടർ വിലയിൽ റെക്കോർഡ് വർധന കൊച്ചിയിൽ 3000 കടന്നു ഹോട്ടൽ മേഖല പ്രതിസന്ധിയിൽ
കേരളം ഉൾപ്പെടെയുള്ള സംസ്ഥാനങ്ങളിലെ തിരഞ്ഞെടുപ്പിന് പിന്നാലെ വാണിജ്യ എൽപിജി സിലിണ്ടർ വില ഒറ്റയടിക്ക് 993 രൂപ വർധിപ്പിച്ചു. കൊച്ചിയിൽ വില 3085 രൂപയായി.
അനില എം കൃഷ്ണൻ 
തിരുവനന്തപുരം: സംസ്ഥാനത്ത് വാണിജ്യ ആവശ്യങ്ങൾക്കുള്ള എൽപിജി സിലിണ്ടർ വിലയിൽ റെക്കോർഡ് വർധന. വോട്ടെടുപ്പ് പൂർത്തിയായതിന് പിന്നാലെ 19 കിലോഗ്രാം സിലിണ്ടറിന് ഒറ്റയടിക്ക് 993 രൂപയാണ് പൊതുമേഖലാ എണ്ണവിതരണ കമ്പനികൾ വർധിപ്പിച്ചത്. ഇതോടെ വാണിജ്യ സിലിണ്ടറിന്റെ വില ചരിത്രത്തിലാദ്യമായി 3000 രൂപയും കടന്നു കുതിക്കുകയാണ്.
പുതുക്കിയ നിരക്കുകൾ
കൊച്ചി: ₹3085
തിരുവനന്തപുരം: ₹3106
കോഴിക്കോട്: ₹3117.5
ഒറ്റത്തവണ ഇത്രയും വലിയ തുക വർധിപ്പിക്കുന്നത് അപൂർവ നടപടിയാണെന്ന് ചൂണ്ടിക്കാണിക്കപ്പെടുന്നു. ഏപ്രിൽ ഒന്നിന് 195.50 രൂപയും ഫെബ്രുവരിയിൽ 49 രൂപയും വർധിപ്പിച്ചിരുന്നു. ജനുവരി മുതൽ തുടർച്ചയായി വില വർധിപ്പിക്കുന്ന രീതിയാണ് എണ്ണക്കമ്പനികൾ സ്വീകരിക്കുന്നത്.
ഹോട്ടൽ മേഖലയിൽ കനത്ത ആഘാതം
വിലക്കയറ്റം ഹോട്ടലുകൾ, റെസ്റ്റോറന്റുകൾ, തട്ടുകടകൾ എന്നിവയുടെ പ്രവർത്തനത്തെ ഗുരുതരമായി ബാധിക്കും. പ്രവർത്തനച്ചെലവ് കുത്തനെ കൂടുന്ന സാഹചര്യത്തിൽ ഭക്ഷണ പദാർത്ഥങ്ങൾക്ക് വില കൂട്ടാൻ ഉടമകൾ നിർബന്ധിതരായേക്കും. അതിഥി തൊഴിലാളികളുടെ കുറവ് മൂലം നേരത്തെ തന്നെ പ്രതിസന്ധിയിലായിരുന്ന ഈ മേഖലയ്ക്ക് പുതിയ വിലവർധനവ് 'ഇടിത്തീ' പോലെയായിരിക്കുകയാണ്.
അതേസമയം, വീട്ടാവശ്യത്തിനുള്ള സിലിണ്ടറുകളുടെ (14.2 കിലോ) വിലയിൽ നിലവിൽ മാറ്റമില്ല. കൊച്ചിയിൽ 920 രൂപയും തിരുവനന്തപുരത്ത് 922 രൂപയുമാണ് ഗാർഹിക സിലിണ്ടറിന്റെ വില. എന്നാൽ വരും ദിവസങ്ങളിൽ പെട്രോൾ, ഡീസൽ, ഗാർഹിക സിലിണ്ടർ വില വർധിപ്പിക്കുമോ എന്ന ആശങ്ക പൊതുജനങ്ങൾക്കിടയിൽ ശക്തമാണ്.
