രോഗിയായ യാത്രക്കാരന് സീറ്റ് നൽകിയില്ല, സ്റ്റോപ്പിൽ ഇറക്കിയതുമില്ല; കെഎസ്ആർടിസി 30,000 രൂപ പിഴ നൽകണം
കെ. മോഹൻദാസ് പ്രസിഡന്റും പ്രീതി ശിവരാമൻ, സി.വി. മുഹമ്മദ് ഇസ്മായിൽ എന്നിവർ അംഗങ്ങളുമായ കമ്മിഷനാണ് വിധി പ്രസ്താവിച്ചത്. 25,000 രൂപ നഷ്ടപരിഹാരവും 5,000 രൂപ കോടതിച്ചെലവും ഉൾപ്പെടെ 30,000 രൂപ പരാതിക്കാരന് നൽകണം. 45 ദിവസത്തിനുള്ളിൽ തുക നൽകിയില്ലെങ്കിൽ 9 ശതമാനം പലിശയടക്കം നൽകണമെന്നും വിധിയിൽ വ്യക്തമാക്കുന്നു.
Rajeev
3
മലപ്പുറം: യാത്രക്കാരനോടുള്ള സേവനത്തിൽ വീഴ്ച വരുത്തിയ കെഎസ്ആർടിസിക്ക് (KSRTC) മലപ്പുറം ജില്ലാ ഉപഭോക്തൃ കമ്മിഷൻ 30,000 രൂപ പിഴ ചുമത്തി. രോഗിയായ യാത്രക്കാരന് സീറ്റ് നിഷേധിക്കുകയും പറഞ്ഞ സ്റ്റോപ്പിൽ ഇറക്കാതിരിക്കുകയും ചെയ്ത സംഭവത്തിലാണ് നടപടി. തോട്ടശ്ശേരിയറ സ്വദേശി മുഹമ്മദ് സൈനുദ്ദീൻ കോർമത്ത് സമർപ്പിച്ച പരാതിയിലാണ് വിധി.
സംഭവത്തിന്റെ പശ്ചാത്തലം:
തൃശൂർ ആമ്പല്ലൂരിൽ നിന്ന് മലപ്പുറം കൊളപ്പുറത്തേക്ക് യാത്ര ചെയ്തതായിരുന്നു സൈനുദ്ദീൻ. ബസിൽ കയറിയപ്പോൾ ഇരിക്കാൻ സീറ്റ് ഒഴിവില്ലായിരുന്നു. രോഗിയാണെന്നും മൂന്ന് മണിക്കൂർ നിന്ന് യാത്ര ചെയ്യാൻ ബുദ്ധിമുട്ടാണെന്നും കണ്ടക്ടറെ അറിയിച്ചപ്പോൾ, തൃശൂർ എത്തുമ്പോൾ സീറ്റ് ലഭിക്കുമെന്ന് കണ്ടക്ടർ ഉറപ്പ് നൽകി.
എന്നാൽ തൃശൂരിലെത്തിയപ്പോൾ ഒഴിഞ്ഞ സീറ്റിൽ ഇരുന്ന സൈനുദ്ദീനെ കണ്ടക്ടറും മറ്റൊരു യാത്രക്കാരനും ചേർന്ന് എഴുന്നേൽപ്പിച്ചു. ആ സീറ്റ് നേരത്തെ റിസർവ് ചെയ്തതാണെന്ന് കണ്ടക്ടർ മുൻകൂട്ടി അറിയിക്കാതിരുന്നത് വീഴ്ചയാണെന്ന് കമ്മിഷൻ വിലയിരുത്തി. ഇതേത്തുടർന്ന് യാത്രക്കാരന് യാത്രയിലുടനീളം നിന്ന് യാത്ര ചെയ്യേണ്ടി വന്നു.
കൂടാതെ, പരാതിക്കാരന് ഇറങ്ങേണ്ടിയിരുന്ന കക്കാട് സ്റ്റോപ്പിൽ ബസ് നിർത്തിയില്ല. സർവീസ് റോഡ് ഒഴിവാക്കി ദേശീയപാതയിലൂടെ വാഹനം ഓടിച്ചതിനാൽ കിലോമീറ്ററുകൾ അകലെയുള്ള കൂരിയാട് സ്റ്റോപ്പിലാണ് സൈനുദ്ദീനെ ഇറക്കിയത്.
കോടതി വിധി:
കെ. മോഹൻദാസ് പ്രസിഡന്റും പ്രീതി ശിവരാമൻ, സി.വി. മുഹമ്മദ് ഇസ്മായിൽ എന്നിവർ അംഗങ്ങളുമായ കമ്മിഷനാണ് വിധി പ്രസ്താവിച്ചത്. 25,000 രൂപ നഷ്ടപരിഹാരവും 5,000 രൂപ കോടതിച്ചെലവും ഉൾപ്പെടെ 30,000 രൂപ പരാതിക്കാരന് നൽകണം. 45 ദിവസത്തിനുള്ളിൽ തുക നൽകിയില്ലെങ്കിൽ 9 ശതമാനം പലിശയടക്കം നൽകണമെന്നും വിധിയിൽ വ്യക്തമാക്കുന്നു.
