നിതിൻ രാജിന്റെ മരണം: ഏപ്രിൽ 28 ന് സംസ്ഥാന വ്യാപക ഹർത്താൽ; നീതിക്കായി ദളിത് ആദിവാസി സംഘടനകൾ തെരുവിലേക്ക്
അഞ്ചരക്കണ്ടി ഡെന്റൽ കോളജ് വിദ്യാർത്ഥി നിതിൻ രാജിന്റെ മരണത്തിൽ നീതി തേടി ഏപ്രിൽ 28 ന് സംസ്ഥാന ഹർത്താൽ. ദളിത് ആദിവാസി സംഘടനകൾ പ്രതിഷേധത്തിൽ.
Angel Varghese 
നിതിൻ രാജിന്റെ മരണം: ഏപ്രിൽ 28-ന് സംസ്ഥാന വ്യാപക ഹർത്താൽ; നീതിക്കായി ദളിത്-ആദിവാസി സംഘടനകൾ തെരുവിലേക്ക്
കണ്ണൂർ: അഞ്ചരക്കണ്ടി ഡെന്റൽ കോളജിലെ ബി.ഡി.എസ് വിദ്യാർത്ഥി നിതിൻ രാജിന്റെ മരണത്തിന് ഉത്തരവാദികളായവരെ മുഴുവൻ അറസ്റ്റ് ചെയ്യണമെന്നാവശ്യപ്പെട്ട് ഏപ്രിൽ 28-ന് സംസ്ഥാന വ്യാപക ഹർത്താലിന് ആഹ്വാനം. ജസ്റ്റിസ് ഫോർ നിതിൻ രാജ് ആക്ഷൻ കൗൺസിലും വിവിധ ദളിത്-ആദിവാസി സംഘടനകളുമാണ് രാവിലെ 6 മുതൽ വൈകിട്ട് 6 വരെ നീളുന്ന ഹർത്താലിന് ആഹ്വാനം ചെയ്തിരിക്കുന്നത്.
ക്യാമ്പസുകളിലെ ജാതീയ വിവേചനവും പീഡനങ്ങളും അവസാനിപ്പിക്കാൻ 'രോഹിത് വെമുല നിയമം' നടപ്പാക്കുക, നിതിൻ രാജിന്റെ കുടുംബത്തിന് 10 കോടി രൂപ നഷ്ടപരിഹാരം നൽകുക, അഞ്ചരക്കണ്ടി ഡെന്റൽ കോളജിന്റെ അഫിലിയേഷൻ റദ്ദാക്കുക, അന്വേഷണം ജുഡീഷ്യൽ മേൽനോട്ടത്തിലാക്കുക തുടങ്ങിയ ആവശ്യങ്ങളാണ് പ്രധാനമായും ഉന്നയിച്ചിട്ടുള്ളത്.
പൊലീസ് അന്വേഷണം അട്ടിമറിക്കുന്നുവെന്ന് ആരോപണം
പ്രിൻസിപ്പൽ അടക്കമുള്ളവരെ ചോദ്യം ചെയ്യാനോ പ്രതി ചേർക്കാനോ പൊലീസ് തയ്യാറാകുന്നില്ലെന്ന് ആക്ഷൻ കൗൺസിൽ ആരോപിച്ചു. കോളേജ് അധികൃതരെ സംരക്ഷിക്കുന്നതിനായി, മരണത്തെ വായ്പയുമായി ബന്ധപ്പെട്ട ആത്മഹത്യയാക്കി മാറ്റാനാണ് പൊലീസ് ശ്രമിക്കുന്നതെന്ന് ഭാരവാഹികളായ കെ.കെ. സുരേഷ്, സണ്ണി എം. കപിക്കാട്, ജെയ്സ് പാണ്ടനാട് എന്നിവർ വാർത്താസമ്മേളനത്തിൽ കുറ്റപ്പെടുത്തി.
മകൻ ആത്മഹത്യ ചെയ്യില്ലെന്ന് പിതാവ്
തന്റെ മകൻ ആത്മഹത്യ ചെയ്തതല്ലെന്നും മരണത്തിൽ അടിമുടി ദുരൂഹതയുണ്ടെന്നും നിതിന്റെ പിതാവ് പ്രതികരിച്ചു. കേസിലെ പ്രധാന പ്രതിയായ ഡോ. സംഗീത നമ്പ്യാർക്ക് കോടതി മുൻകൂർ ജാമ്യം അനുവദിച്ചതിൽ കുടുംബം കടുത്ത അതൃപ്തി രേഖപ്പെടുത്തി. വ്യക്തമായ മൊഴി നൽകിയിട്ടും പൊലീസ് ഒത്തുകളിക്കുകയാണെന്നും, ഹൈക്കോടതിയെ സമീപിക്കുമെന്നും അദ്ദേഹം പറഞ്ഞു. മൃതദേഹം കണ്ട സാഹചര്യവും പരിസരവും പരിശോധിച്ചാൽ വീഴ്ചയിലുണ്ടാവേണ്ട പരിക്കുകളല്ല നിതിന്റെ ശരീരത്തിൽ കണ്ടതെന്നും അദ്ദേഹം കൂട്ടിച്ചേർത്തു.
