നിയമപരമായ വിവാഹപ്രായത്തിന് മുമ്പും പ്രായപൂർത്തിയായവർക്ക് ലിവ്-ഇൻ ബന്ധത്തിൽ തുടരാം

 നിയമപരമായ വിവാഹപ്രായത്തിന് മുമ്പും പ്രായപൂർത്തിയായവർക്ക് ലിവ്-ഇൻ ബന്ധത്തിൽ തുടരാം

​ന്യൂഡൽഹി: നിയമപ്രകാരമുള്ള വിവാഹപ്രായമെത്തുന്നതിനു മുമ്പുതന്നെ പ്രായപൂർത്തിയായവർക്ക് ഉഭയസമ്മതപ്രകാരം ഒരുമിച്ചു താമസിക്കാമെന്ന സുപ്രധാനവും ഏറെ ചർച്ചാവിഷയമായേക്കാവുന്നതുമായ വിധിയുമായി രാജസ്ഥാൻ ഹൈക്കോടതി. മൗലികാവകാശങ്ങളുടെ വ്യാപ്‌തിക്ക് വിവാഹപ്രായമല്ല, മറിച്ച് പ്രായപൂർത്തിയാകുന്നതാണ് മാനദണ്ഡമെന്ന് കോടതി ചൂണ്ടിക്കാട്ടി. ഈ വിധിക്ക് ദൂരവ്യാപക ഫലങ്ങളുണ്ടാകുമെന്നാണ് നിയമവൃത്തങ്ങൾ വിലയിരുത്തുന്നത്.

​രാജസ്ഥാനിലെ കോട്ടയിൽനിന്നുള്ള 18 വയസ് പൂർത്തിയായ യുവതിയുടെയും 19 വയസ്സുകാരനായ യുവാവിന്റെയും ഹർജിയിലാണ് ഹൈക്കോടതിയുടെ ഈ നിർണ്ണായക വിധി. തങ്ങൾ സ്വമേധയാ എടുത്ത തീരുമാനപ്രകാരം ഒരുമിച്ചു താമസിക്കുകയാണെന്നും എന്നാൽ, യുവതിയുടെ കുടുംബം ബന്ധത്തെ എതിർക്കുകയും കൊലപാതക ഭീഷണി മുഴക്കുകയും ചെയ്യുകയാണെന്നും ദമ്പതികൾ കോടതിയെ അറിയിച്ചു.

​2025 ഒക്ടോബർ 27-ന് ഇരുവരും ലിവ്-ഇൻ കരാറിൽ ഒപ്പിട്ടിരുന്നു. ഒരുമിച്ചു ജീവിക്കാൻ അനുവദിക്കാത്തതിൽ കോട്ട പോലീസിനു നൽകിയ പരാതിയിൽ നടപടിയെടുക്കുന്നില്ലെന്നും ഇരുവരും കോടതിയിൽ പരാതിപ്പെട്ടു.

​എന്നാൽ, ഹർജി പരിഗണിച്ചപ്പോൾ പബ്ലിക് പ്രോസിക്യൂട്ടർ ഇതിനെ ശക്തമായി എതിർത്തു. യുവാവിന് വിവാഹത്തിന് ആവശ്യമായ ഏറ്റവും കുറഞ്ഞ പ്രായമായ 21 വയസ്സ് പൂർത്തിയായിട്ടില്ലെന്നും അതിനാൽ ലിവ്-ഇൻ ബന്ധത്തിന് അനുവദിക്കരുതെന്നും അദ്ദേഹം കോടതിയോട് ആവശ്യപ്പെട്ടു.

​ഈ വാദങ്ങളെ തള്ളിക്കൊണ്ട് കോടതി നിരീക്ഷിച്ചത് ഇങ്ങനെയാണ്: ഹർജിക്കാർക്ക് നിയമപ്രകാരമുള്ള വിവാഹപ്രായമെത്തിയിട്ടില്ല എന്നതുകൊണ്ടു മാത്രം ഭരണഘടനയുടെ അനുച്ഛേദം 21 നിഷ്‌കർഷിക്കുന്ന ജീവിതത്തിനും വ്യക്തിസ്വാതന്ത്ര്യത്തിനുമുള്ള അവകാശം നിഷേധിക്കാനാവില്ല. പ്രായപൂർത്തിയായവർക്ക് അവരുടെ പങ്കാളിയെ തിരഞ്ഞെടുക്കാനും ഒരുമിച്ചു ജീവിക്കാനുമുള്ള സ്വാതന്ത്ര്യം മൗലികാവകാശമാണെന്ന് കോടതി വ്യക്തമാക്കി.

​ഈ വിധി പ്രായപൂർത്തിയായ വ്യക്തികളുടെ അവകാശങ്ങളെയും സ്വയം നിർണ്ണയാവകാശത്തെയും കൂടുതൽ ഊട്ടിയുറപ്പിക്കുന്ന ഒന്നായി കണക്കാക്കപ്പെടുന്നു.