ദേശീയ സുരക്ഷയുടെ കഥയുമായി ജയസൂര്യ പാൻ ഇന്ത്യൻ ആക്ഷൻ ത്രില്ലർ ഓപ്പറേഷൻ ത്രാൾ ഫസ്റ്റ് ലുക്ക് പുറത്ത്

ജയസൂര്യ നായകനാകുന്ന ബിഗ് ബജറ്റ് ഇൻവെസ്റ്റിഗേറ്റീവ് ത്രില്ലർ ഓപ്പറേഷൻ ത്രാൾ ഫസ്റ്റ് ലുക്ക് പുറത്ത്. കശ്മീരിലെ സൈനിക നീക്കങ്ങളുടെ പശ്ചാത്തലത്തിൽ രതീഷ് വേഗ സംവിധാനം ചെയ്യുന്ന ചിത്രത്തിന്റെ വിശേഷങ്ങൾ

Vazhoor Jose

Apr 26, 2026 - 08:20

ദേശീയ സുരക്ഷയുടെ കഥയുമായി ജയസൂര്യ; പാൻ ഇന്ത്യൻ ആക്ഷൻ ത്രില്ലർ 'ഓപ്പറേഷൻ ത്രാൾ' ഫസ്റ്റ് ലുക്ക് പുറത്ത്

കൊച്ചി: മലയാള സിനിമയെ പാൻ ഇന്ത്യൻ തലത്തിലേക്ക് എത്തിക്കുക എന്ന ലക്ഷ്യത്തോടെ നിർമ്മിക്കുന്ന ബിഗ് ബജറ്റ് ഇൻവെസ്റ്റിഗേറ്റീവ് ത്രില്ലർ ‘ഓപ്പറേഷൻ ത്രാളിന്റെ’ ഫസ്റ്റ് ലുക്ക് പോസ്റ്റർ പുറത്തിറങ്ങി. ജയസൂര്യയെ കേന്ദ്രകഥാപാത്രമാക്കി പ്രശസ്ത സംഗീത സംവിധായകനും സംവിധായകനുമായ രതീഷ് വേഗയാണ് ഈ ചിത്രം ഒരുക്കുന്നത്. ഗുഡ്‌വിൽ എന്റർടെയ്ൻമെന്റ്സിന്റെ ബാനറിൽ ജോബി ജോർജ് തടത്തിലാണ് ചിത്രം നിർമ്മിക്കുന്നത്.

ജമ്മു കശ്മീരിലെ ത്രാളിൽ ഇന്ത്യൻ സൈന്യവും തീവ്രവാദികളും തമ്മിൽ നടന്ന യഥാർത്ഥ പോരാട്ടത്തെ ആസ്പദമാക്കിയാണ് ചിത്രം ഒരുങ്ങുന്നത്. കശ്മീരിലെ ഭീകരമായ കോൺവോയ് ആക്രമണവും തുടർന്നുണ്ടാകുന്ന നാഷണൽ ഇന്റലിജൻസ് ഏജൻസികളുടെ രഹസ്യാന്വേഷണവുമാണ് സിനിമയുടെ ഇതിവൃത്തം. ഹൈ-ഒക്ടേൻ ആക്ഷൻ രംഗങ്ങളും ശക്തമായ ദേശസ്‌നേഹ സന്ദേശവും അടങ്ങുന്ന ഈ ചിത്രം ജയസൂര്യയുടെ കരിയറിലെ തന്നെ ഏറ്റവും വലിയ പ്രോജക്റ്റുകളിൽ ഒന്നായാണ് വിലയിരുത്തപ്പെടുന്നത്.

"ദേശീയ സുരക്ഷയെ ആധാരമാക്കിയ ഈ കഥയിൽ വലിയ സ്കെയിലിലുള്ള ആക്ഷൻ ഘടകങ്ങളുണ്ട്. എന്റെ കരിയറിലെ ഏറ്റവും വെല്ലുവിളി നിറഞ്ഞ പ്രോജക്ടുകളിൽ ഒന്നാണിത്," എന്ന് ജയസൂര്യ ചിത്രത്തെക്കുറിച്ച് പ്രതികരിച്ചു.

രാജ്യത്തിനുവേണ്ടി നിശബ്ദമായി പോരാടുന്ന സൈനികരുടെയും ഉദ്യോഗസ്ഥരുടെയും ജീവിതമാണ് താൻ ഈ ചിത്രത്തിലൂടെ അന്വേഷിക്കുന്നതെന്ന് സംവിധായകൻ രതീഷ് വേഗ പറഞ്ഞു.

ചിത്രത്തിന്റെ സാങ്കേതിക നിരയിലും പ്രമുഖർ അണിനിരക്കുന്നു. നജോസ് ഛായാഗ്രഹണവും ഷഫീഖ് വി.ബി. എഡിറ്റിംഗും നിർവ്വഹിക്കുന്നു. സംവിധായകൻ രതീഷ് വേഗ തന്നെയാണ് സംഗീതവും പശ്ചാത്തല സംഗീതവും ഒരുക്കുന്നത്. സുനിമോൾ ജോബി സഹനിർമ്മാതാവായ ചിത്രത്തിന്റെ പ്രോജക്ട് ഡിസൈൻ നോബിൾ ജേക്കബ് ആണ്. വസ്ത്രാലങ്കാരം സമീറ സനീഷ്, സരിത ജയസൂര്യ എന്നിവരും മേക്കപ്പ് റോണക്‌സ് സേവ്യറും നിർവ്വഹിക്കുന്നു.