വയനാട്ടിൽ വിദ്യാർത്ഥികൾക്ക് ഷിഗെല്ല സ്ഥിരീകരിച്ചിട്ടില്ല വ്യാജ വാർത്തകൾക്കെതിരെ ജാഗ്രതയുമായി ഡി.എം.ഒ
വയനാട് ജില്ലയിൽ വിദ്യാർത്ഥികൾക്കിടയിൽ ഷിഗെല്ല സ്ഥിരീകരിച്ചെന്ന വാർത്തകൾ അടിസ്ഥാനരഹിതമാണെന്ന് ജില്ലാ മെഡിക്കൽ ഓഫീസർ. യഥാർത്ഥ കാരണം കണ്ടെത്താൻ പരിശോധനകൾ പുരോഗമിക്കുന്നു.
അനില എം കൃഷ്ണൻ 
വയനാട്ടിൽ ഷിഗെല്ല സ്ഥിരീകരിച്ചിട്ടില്ല; വാർത്തകൾ അടിസ്ഥാനരഹിതമെന്ന് ഡി.എം.ഒ
കൽപ്പറ്റ: വയനാട് ജില്ലയിൽ വിദ്യാർത്ഥികൾക്കിടയിൽ ഷിഗെല്ല രോഗബാധ സ്ഥിരീകരിച്ചതായി ചില മാധ്യമങ്ങളിൽ പ്രചരിക്കുന്ന വാർത്തകൾ പൂർണ്ണമായും അടിസ്ഥാനരഹിതമാണെന്ന് ജില്ലാ മെഡിക്കൽ ഓഫീസർ (ആരോഗ്യം) ഡോ. കെ.ടി. രേഖ അറിയിച്ചു. രോഗബാധയുടെ യഥാർത്ഥ കാരണം കണ്ടെത്താനുള്ള ശാസ്ത്രീയ പരിശോധനകൾ പുരോഗമിക്കുകയാണ്. ഇതിന്റെ കൃത്യമായ ഫലം പുറത്തുവരുന്നതിന് മുൻപ് ഇത്തരം തെറ്റായ വാർത്തകൾ പ്രചരിപ്പിക്കരുതെന്നും ഡി.എം.ഒ വ്യക്തമാക്കി.
വിദ്യാർത്ഥികളിൽ ഉണ്ടായ രോഗബാധയുടെ ഉറവിടവും രോഗാണുവിനെയും കണ്ടെത്താൻ വിപുലമായ പരിശോധനകളാണ് ആരോഗ്യവകുപ്പ് നടത്തുന്നത്. രോഗബാധിതരായ കുട്ടികളിൽ നിന്നും ശേഖരിച്ച വിസർജ്ജ്യ സാമ്പിളുകൾ (Stool samples) കൾച്ചർ ആൻഡ് സെൻസിറ്റിവിറ്റി പരിശോധനയ്ക്കായി മാനന്തവാടി മെഡിക്കൽ കോളേജിലേക്ക് അയച്ചിട്ടുണ്ട്. വൈറൽ പാനൽ പരിശോധനയ്ക്കായി അഞ്ച് സാമ്പിളുകൾ ആലപ്പുഴ നാഷണൽ ഇൻസ്റ്റിറ്റ്യൂട്ട് ഓഫ് വൈറോളജി (NIV)-ലേക്ക് ഒപ്പം കൈമാറി.
കൂടാതെ, രോഗബാധയുണ്ടായ സ്കൂൾ പരിസരത്തുനിന്നും ശേഖരിച്ച മൂന്ന് ജല സാമ്പിളുകൾ മൈക്രോബയോളജിക്കൽ പരിശോധനയ്ക്കായി മേപ്പാടി ഡോ. മൂപ്പൻസ് മെഡിക്കൽ കോളേജിലും പരിശോധനയ്ക്ക് വിധേയമാക്കുന്നുണ്ട്.
കൂടുതൽ എപ്പിഡെമിയോളജിക്കൽ, ലബോറട്ടറി പരിശോധനകളുടെ അന്തിമ ഫലം ചൊവ്വാഴ്ചയോടെ മാത്രമേ ലഭ്യമാകൂ എന്ന് ആരോഗ്യവകുപ്പ് അറിയിച്ചു. അതുവരെ പൊതുജനങ്ങൾ യാതൊരുവിധത്തിലും പരിഭ്രാന്തരാകേണ്ടതില്ലെന്നും, ആരോഗ്യവകുപ്പ് നൽകുന്ന ജാഗ്രതാ നിർദ്ദേശങ്ങൾ കർശനമായി പാലിക്കണമെന്നും ജില്ലാ മെഡിക്കൽ ഓഫീസർ അഭ്യർത്ഥിച്ചു.
