സിബി മലയിലിനെ അധിക്ഷേപിച്ചു; പേളി മാണി മാപ്പ് പറയണമെന്ന് ജോയ് മാത്യു
സംവിധായകൻ സിബി മലയിലിനെതിരെ നടത്തിയ പരാമർശത്തിൽ യൂട്യൂബറും നടിയുമായ പേളി മാണി മാപ്പ് പറയണമെന്ന് ആവശ്യപ്പെട്ട് നടനും സംവിധായകനുമായ ജോയ് കെ. മാത്യു രംഗത്ത്.
P R Sumeran 
സിബി മലയിലിനെ അധിക്ഷേപിച്ചു പേളി മാണി മാപ്പ് പറയണമെന്ന് ജോയ് മാത്യു
കൊച്ചി: മലയാള സിനിമയുടെ പ്രശസ്ത സംവിധായകൻ സിബി മലയിലിനെതിരെ വിമർശനവുമായി രംഗത്തെത്തിയ നടിയും യൂട്യൂബറുമായ പേളി മാണി സിനിമാലോകത്തോടും പ്രേക്ഷകരോടും മാപ്പ് പറയണമെന്ന് നടനും സംവിധായകനുമായ ജോയ് കെ. മാത്യു ആവശ്യപ്പെട്ടു. മലയാള ചലച്ചിത്ര രംഗത്ത് എണ്ണമറ്റ മാസ്റ്റർപീസുകൾ സമ്മാനിച്ച പ്രതിഭയാണ് സിബി മലയിലെന്ന് അദ്ദേഹം ഓർമ്മിപ്പിച്ചു.
തനിയാവർത്തനം, കിരീടം, ഭരതം, സദയം, ആകാശദൂത് തുടങ്ങി മലയാളി നെഞ്ചിലേറ്റിയ എത്രയോ മികച്ച ചിത്രങ്ങൾ സിബി മലയിലിന്റെ സംവിധാന മികവിൽ പിറന്നതാണെന്ന് ജോയ് കെ. മാത്യു ചൂണ്ടിക്കാട്ടി. എന്നാൽ, കലാരംഗത്ത് സ്വന്തമായി യാതൊരു കഠിനാധ്വാനമോ കഴിവോ തെളിയിക്കാത്തവർ ഇത്തരം മുതിർന്ന ചലച്ചിത്ര പ്രതിഭകളെ വിമർശിക്കുന്നത് അങ്ങേയറ്റം പ്രതിഷേധാർഹമാണ്.
സിനിമ പരാജയപ്പെട്ടാൽ അത് സംവിധായകന്റെ മാത്രം കുറ്റവും വിജയിച്ചാൽ നായകന്റെ മാത്രം നേട്ടവുമായി കാണുന്ന ചലച്ചിത്രബോധം കഷ്ടമാണെന്നും അദ്ദേഹം വിമർശിച്ചു. സിനിമ നിർമ്മിക്കുന്നതിന്റെ ക്രിയേറ്റീവ് അധ്വാനത്തെക്കുറിച്ച് അറിവില്ലാത്തവർ സിബി മലയിൽ എന്ന പേര് ഉച്ചരിക്കാൻ പോലും യോഗ്യരല്ലെന്നും, വലിയൊരു കലാകാരനെ പരസ്യമായി അധിക്ഷേപിച്ച പേളി മാണി മാപ്പ് പറയണമെന്നും ജോയ് കെ. മാത്യു ആവശ്യപ്പെട്ടു.
