നിയമനം വൈകുന്നു സെക്രട്ടേറിയറ്റിലേക്ക് മുഖത്ത് കരിതേച്ച് എൽ.പി.എസ്.ടി ഉദ്യോഗാർത്ഥികളുടെ മാർച്ച്
എൽ.പി.എസ്.ടി റാങ്ക് പട്ടികയിൽ ഉൾപ്പെട്ടിട്ടും നിയമനം ലഭിക്കാത്തതിൽ പ്രതിഷേധിച്ച് തിരുവനന്തപുരത്ത് ഉദ്യോഗാർത്ഥികളുടെ വൻ പ്രതിഷേധം. മുഖത്ത് കരിതേച്ചായിരുന്നു സെക്രട്ടേറിയറ്റ് മാർച്ച്.
അനില എം കൃഷ്ണൻ 
നിയമനം വൈകുന്നു: മുഖത്ത് കരിതേച്ച് സെക്രട്ടേറിയറ്റിലേക്ക് എൽ.പി.എസ്.ടി ഉദ്യോഗാർത്ഥികളുടെ പ്രതിഷേധ മാർച്ച്
തിരുവനന്തപുരം: റാങ്ക് ലിസ്റ്റ് നിലവിലുണ്ടായിട്ടും നിയമനം വൈകുന്നതിൽ പ്രതിഷേധിച്ച് ഓൾ കേരള എൽ.പി.എസ്.ടി (LPST) റാങ്ക് ഹോൾഡേഴ്സ് അസോസിയേഷന്റെ നേതൃത്വത്തിൽ ഉദ്യോഗാർത്ഥികൾ സെക്രട്ടേറിയറ്റിലേക്ക് മാർച്ച് നടത്തി. മുഖത്ത് കരിതേച്ച് നൂറുകണക്കിന് ഉദ്യോഗാർത്ഥികളാണ് പാളയം രക്തസാക്ഷി മണ്ഡപത്തിൽ നിന്നും പ്രതിഷേധവുമായി എത്തിയത്.
സെക്രട്ടേറിയറ്റിന് മുന്നിൽ കഴിഞ്ഞ ഏഴു ദിവസമായി ഉദ്യോഗാർത്ഥികൾ റിലേ സത്യഗ്രഹം നടത്തിവരികയാണ്. ഇതിനിടെ നിരാഹാരസമരം അനുഷ്ഠിച്ചിരുന്ന പാലക്കാട് സ്വദേശി അശ്വതിയുടെ ആരോഗ്യനില വഷളായതിനെ തുടർന്ന് ആശുപത്രിയിലേക്ക് മാറ്റി. എട്ട് ജില്ലകളിൽ ഒന്നാം റാങ്ക് ലഭിച്ചവർക്ക് പോലും ഇതുവരെ നിയമനം ലഭിച്ചിട്ടില്ലെന്ന് പ്രതിഷേധക്കാർ ആരോപിക്കുന്നു. അഡൈ്വസ് മെമ്മോ ലഭിച്ച് ഏഴു മാസം കഴിഞ്ഞിട്ടും ജോലിയിൽ പ്രവേശിക്കാനുള്ള നടപടികൾ അധികൃതർ സ്വീകരിക്കുന്നില്ലെന്നാണ് ഇവരുടെ പരാതി.
യുവമോർച്ച സംസ്ഥാന പ്രസിഡന്റ് മനു പ്രസാദ് സമരം ചെയ്യുന്ന ഉദ്യോഗാർത്ഥികളെ അഭിസംബോധന ചെയ്തു. കഴിഞ്ഞ ലിസ്റ്റിലെ എട്ട് പേർ ഇപ്പോഴും പുറത്തുനിൽക്കുകയാണെന്നും, ഇവർക്ക് നിയമനം ലഭിക്കാതെ പുതിയ ലിസ്റ്റിലുള്ളവർക്ക് ജോലി ലഭിക്കില്ലെന്ന അനിശ്ചിതാവസ്ഥയാണ് നിലവിലുള്ളതെന്നും സമരക്കാർ ചൂണ്ടിക്കാട്ടി.
പ്രധാന ആവശ്യങ്ങൾ:
ഒഴിവുകൾ അടിയന്തരമായി റിപ്പോർട്ട് ചെയ്യുക.
ഡിവിഷൻ ഫാൾ വരുന്ന സ്കൂളുകളിൽ നിശ്ചിത അധ്യാപക-വിദ്യാർത്ഥി അനുപാതം നടപ്പിലാക്കുക.
റാങ്ക് പട്ടികയിലുള്ളവരെ അർദ്ധ സർക്കാർ സ്കൂളുകളിൽ നിയമിക്കുക.
അനുകൂലമായ തീരുമാനം ഉണ്ടാകുന്നത് വരെ സമരം തുടരാനാണ് അസോസിയേഷന്റെ തീരുമാനം
