കുഞ്ഞുങ്ങൾക്ക് പോളിയോ തുള്ളിമരുന്ന് നൽകി മന്ത്രി എം. ലിജു; ആലപ്പുഴയിൽ 96,972 കുട്ടികൾക്ക് പ്രതിരോധം
പോളിയോമുക്ത ഭാരതം പദവി നിലനിർത്തുന്നതിന്റെ ഭാഗമായി അഞ്ച് വയസ്സിൽ താഴെയുള്ള കുട്ടികൾക്കായുള്ള പൾസ് പോളിയോ തുള്ളിമരുന്ന് വിതരണത്തിന്റെ ആലപ്പുഴ ജില്ലാതല ഉദ്ഘാടനം സഹകരണ എക്സൈസ് വകുപ്പ് മന്ത്രി എം. ലിജു നിർവഹിച്ചു.
Rajeev 
പോളിയോമുക്ത ഭാരതം: ആലപ്പുഴയിൽ പൾസ് പോളിയോ തുള്ളിമരുന്ന് വിതരണത്തിന് തുടക്കമായി; ജില്ലാതല ഉദ്ഘാടനം മന്ത്രി എം. ലിജു നിർവഹിച്ചു
ആലപ്പുഴ: പോളിയോമുക്ത ഭാരതം എന്ന പദവി നിലനിർത്തുന്നതിന്റെ ഭാഗമായി ആരോഗ്യ വകുപ്പ് നടത്തുന്ന പൾസ് പോളിയോ പ്രതിരോധ തുള്ളിമരുന്ന് വിതരണത്തിന്റെ ആലപ്പുഴ ജില്ലാതല ഉദ്ഘാടനം നിർവഹിച്ചു. കണ്ടല്ലൂർ ഗ്രാമപഞ്ചായത്ത് കുടുംബാരോഗ്യ കേന്ദ്രത്തിൽ നടന്ന ചടങ്ങിൽ സഹകരണ എക്സൈസ് വകുപ്പ് മന്ത്രി എം. ലിജു പദ്ധതിയുടെ ജില്ലാതല ഉദ്ഘാടനം നിർവഹിച്ചു. തുള്ളിമരുന്ന് സ്വീകരിക്കാനെത്തിയ കുട്ടിക്ക് ആദ്യ ഡോസ് നൽകിക്കൊണ്ടാണ് മന്ത്രി വിതരണോദ്ഘാടനം നടത്തിയത്.
അഞ്ചു വയസ്സിൽ താഴെ പ്രായമുള്ള എല്ലാ കുട്ടികൾക്കും രണ്ട് തുള്ളി പോളിയോ മരുന്ന് നൽകുന്ന ഈ ബൃഹത് പദ്ധതിക്കായി സംസ്ഥാനത്തുടനീളം 23,000 ബൂത്തുകളാണ് ഒരുക്കിയിട്ടുള്ളതെന്ന് മന്ത്രി വ്യക്തമാക്കി. കണ്ടല്ലൂരിന്റെയും നാടിന്റെയും വികസന കാര്യങ്ങളിൽ രാഷ്ട്രീയ ഭേദമില്ലാതെ മുൻഗണന നൽകുമെന്നും അദ്ദേഹം ചടങ്ങിൽ കൂട്ടിച്ചേർത്തു.
ജില്ലയിൽ അഞ്ച് വയസ്സിന് താഴെ പ്രായമുള്ള 96,972 കുട്ടികൾക്ക് തുള്ളിമരുന്ന് വിതരണം ചെയ്യാനാണ് ലക്ഷ്യമിടുന്നത്. ഇതിനായി 1,377 പോളിയോ ബൂത്തുകൾ ജില്ലയിൽ സജ്ജമാക്കിയിട്ടുണ്ട്. നിശ്ചയിച്ച ദിവസം ബൂത്തുകളിൽ എത്തിക്കാൻ സാധിക്കാത്ത കുട്ടികൾക്ക് തൊട്ടടുത്ത ദിവസങ്ങളായ 29, 30 തീയതികളിൽ തുള്ളിമരുന്ന് നൽകാനുള്ള സൗകര്യവും ആരോഗ്യവകുപ്പ് ഒരുക്കിയിട്ടുണ്ട്.
കണ്ടല്ലൂർ ഗ്രാമപഞ്ചായത്ത് പ്രസിഡന്റ് ഇൻ ചാർജ് ആർ. ഷൈനി ചടങ്ങിൽ അധ്യക്ഷത വഹിച്ചു. സന്ദേശ പ്രചാരണ പോസ്റ്ററിന്റെ പ്രകാശനം മുതുകുളം ബ്ലോക്ക് പഞ്ചായത്ത് പ്രസിഡന്റ് അഡ്വ. ടി. എസ്. താഹ നിർവഹിച്ചു. ജില്ലാ മെഡിക്കൽ ഓഫീസർ (ആരോഗ്യം) ഡോ. പി. വി. വിദ്യ, ആരോഗ്യവകുപ്പ് ഡെപ്യൂട്ടി ഡയറക്ടർ ഡോ. ആർ. വിവേക് കുമാർ, ഡെപ്യൂട്ടി ജില്ലാ മെഡിക്കൽ ഓഫീസർ ഡോ. എസ്. ആർ. ദിലീപ് കുമാർ എന്നിവർ ചടങ്ങിൽ സംസാരിച്ചു.
ബ്ലോക്ക് പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിങ് കമ്മിറ്റി അധ്യക്ഷ രശ്മി ശ്രീനി, കണ്ടല്ലൂർ ഗ്രാമപഞ്ചായത്ത് ആരോഗ്യ വിദ്യാഭ്യാസ സ്ഥിരം സമിതി അധ്യക്ഷൻ എ. അജിത്ത്, ഗ്രാമപഞ്ചായത്ത് അംഗം അഡ്വ. എൻ. രാജഗോപാൽ, ആരോഗ്യ കേരളം ജില്ലാ പ്രോഗ്രാം മാനേജർ ഡോ. എസ്. ലൈജു, ജില്ലാ ആർ.സി.എച്ച്. ഓഫീസർ ഡോ. പാർവതി പ്രസാദ്, ഡോ. സ്മിത എൻ. എസ്, ഡോ. അരോമ പ്രസന്നൻ തുടങ്ങിയ പ്രമുഖരും ചടങ്ങിൽ സന്നിഹിതരായിരുന്നു.
