സഭാവിരുദ്ധ പ്രസ്താവന ബിജെപിയിൽ ഭിന്നത പി.സി. ജോർജിനും ഷോണിനും എതിരെ മുതിർന്ന നേതാക്കൾ
പി.സി. ജോർജിന്റെയും ഷോൺ ജോർജിന്റെയും സഭാവിരുദ്ധ പ്രസ്താവനകൾ ബിജെപിയുടെ ക്രൈസ്തവ ഔട്ട്റീച്ച് പരിപാടികൾക്ക് തിരിച്ചടിയാകുന്നു. പാർട്ടിയിൽ അസ്വസ്ഥത പുകയുന്നതിനിടെ വിശദീകരണവുമായി സംസ്ഥാന നേതൃത്വം രംഗത്ത്.
Angel Varghese 
ബിജെപിയിൽ ഭിന്നത: പി.സി. ജോർജിന്റെയും ഷോണിന്റെയും സഭാവിരുദ്ധ പ്രസ്താവനയിൽ നേതൃത്വത്തിന് അതൃപ്തി
തിരുവനന്തപുരം: ബിജെപി നേതാക്കളായ പി.സി. ജോർജിന്റെയും ഷോൺ ജോർജിന്റെയും സഭാവിരുദ്ധ പ്രസ്താവനകളെച്ചൊല്ലി പാർട്ടിയിൽ അസ്വസ്ഥത പുകയുന്നു. ക്രൈസ്തവ സഭകളുമായി അടുക്കാൻ ബിജെപി ദേശീയ നേതൃത്വത്തിന്റെ നിർദ്ദേശപ്രകാരം നടപ്പിലാക്കി വരുന്ന 'ക്രിസ്ത്യൻ ഔട്ട്റീച്ച്' പരിപാടികൾക്ക് ഈ പ്രസ്താവനകൾ തിരിച്ചടിയാകുമെന്ന ആശങ്കയിലാണ് ഒരു വിഭാഗം നേതാക്കൾ.
സഭയ്ക്ക് ബിജെപിയെ വേണ്ടെങ്കിൽ ബിജെപിക്ക് സഭയെയും വേണ്ടെന്ന ഷോൺ ജോർജിന്റെ പരാമർശമാണ് പാർട്ടിയിൽ രൂക്ഷമായ വിമർശനത്തിന് ഇടയാക്കിയത്. ഇത്തരം നിർണ്ണായക നിലപാടുകൾ സ്വീകരിക്കേണ്ടത് സംസ്ഥാന പ്രസിഡന്റോ ജനറൽ സെക്രട്ടറിമാരോ ആണെന്നിരിക്കെ, യാതൊരു കൂടിയാലോചനയും ഇല്ലാതെ നടത്തിയ പ്രസ്താവന അച്ചടക്ക ലംഘനമാണെന്നാണ് മുതിർന്ന നേതാക്കളുടെ പക്ഷം.
പാർട്ടിക്കുള്ളിലെ തീവ്രനിലപാടുള്ളവർ സമൂഹമാധ്യമങ്ങളിൽ ഷോണിനെ പിന്തുണച്ചെങ്കിലും, ഔദ്യോഗിക നേതൃത്വം ആദ്യം മൗനം പാലിച്ചു. എന്നാൽ ഭിന്നത പരസ്യമായതോടെ, സഭയെ തള്ളാതെയും എന്നാൽ ഷോണിനെ പൂർണ്ണമായി കൈവിടാതെയും മധ്യസ്ഥ നിലപാടാണ് ബിജെപി ഇന്നലെ സ്വീകരിച്ചത്.
ബിജെപി ഭരിക്കുന്ന ഒരിടത്തും ന്യൂനപക്ഷങ്ങളോട് വിവേചനമില്ലെന്ന് സംസ്ഥാന ജനറൽ സെക്രട്ടറി എസ്. സുരേഷ് വ്യക്തമാക്കി. കഴിഞ്ഞ 12 വർഷത്തെ മോദി ഭരണത്തിലോ ബിജെപി ഭരിക്കുന്ന സംസ്ഥാനങ്ങളിലോ ജാതി-മത വിവേചനം ഉണ്ടായിട്ടില്ലെന്നും അദ്ദേഹം കൂട്ടിച്ചേർത്തു. സഭാ തർക്കങ്ങളിൽ പാർട്ടി നേരിട്ട് പക്ഷം പിടിക്കുന്നില്ലെന്ന സൂചന നൽകി വിവാദം തണുപ്പിക്കാനാണ് നിലവിൽ ബിജെപിയുടെ ശ്രമം.
