മൂവാറ്റുപുഴയിൽ ഫ്ലെക്സ് യുദ്ധം മുറുകുന്നു മാത്യു കുഴൽനാടന് മറുപടിയുമായി എൽഡിഎഫ് ‘മോനെ മാത്യു, മറുപടി വരുന്നുണ്ട്
മൂവാറ്റുപുഴ മണ്ഡലത്തിൽ യുഡിഎഫ് എൽഡിഎഫ് സ്ഥാനാർത്ഥികൾ തമ്മിലുള്ള പോര് ഫ്ലെക്സ് ബോർഡുകളിലേക്ക്. മാത്യു കുഴൽനാടനെതിരെ മുഖ്യമന്ത്രിയുടെ ചിത്രം സഹിതം പ്രത്യക്ഷപ്പെട്ട പുതിയ ബോർഡ് ശ്രദ്ധേയമാകുന്നു.
അനില എം കൃഷ്ണൻ 
മൂവാറ്റുപുഴയിൽ ‘ഫ്ലെക്സ് യുദ്ധം’ മുറുകുന്നു; ‘മോനെ മാത്യു, മറുപടി വരുന്നുണ്ട്’ എന്ന് എൽഡിഎഫ്!
മൂവാറ്റുപുഴ: തിരഞ്ഞെടുപ്പ് പ്രചാരണത്തിന്റെ പരസ്യപ്രചാരണം ഔദ്യോഗികമായി അവസാനിച്ചെങ്കിലും മൂവാറ്റുപുഴ മണ്ഡലത്തിൽ രാഷ്ട്രീയ പാർട്ടികൾ തമ്മിലുള്ള പോര് ഫ്ലെക്സ് ബോർഡുകളിലൂടെ പുതിയ തലത്തിലേക്ക് കടക്കുന്നു. നഗരത്തിലെ പ്രധാന കേന്ദ്രമായ പോസ്റ്റ് ഓഫീസ് ജംഗ്ഷനിൽ യുഡിഎഫ് സ്ഥാനാർത്ഥി മാത്യു കുഴൽനാടനെതിരെ ഉയർന്ന ഫ്ലെക്സ് ബോർഡാണ് ഇപ്പോൾ നാട്ടിലെ പ്രധാന സംസാരവിഷയം.
പ്രളയ ദുരിതാശ്വാസവുമായി ബന്ധപ്പെട്ട് കഴിഞ്ഞ ദിവസങ്ങളിൽ മണ്ഡലത്തിൽ വലിയ രീതിയിലുള്ള ആരോപണ പ്രത്യാരോപണങ്ങൾ നടന്നിരുന്നു. ഇതിന് പിന്നാലെയാണ് മാത്യു കുഴൽനാടന്റെ പ്രചാരണ ബോർഡിന് തൊട്ടുതാഴെയായി എൽഡിഎഫ് മറുപടി ബോർഡ് സ്ഥാപിച്ചത്. മുഖ്യമന്ത്രി പിണറായി വിജയന്റെ ചിത്രം സഹിതം, ചുവന്ന പശ്ചാത്തലത്തിൽ "മോനെ മാത്യു, നിനക്കുള്ള മറുപടി വരുന്നുണ്ട്" എന്നാണ് ബോർഡിലെ വാചകം.
തിരഞ്ഞെടുപ്പ് ഗോദയിൽ തുടക്കം മുതൽക്കേ മൂവാറ്റുപുഴ ഇത്തരം വാക്പോരുകൾക്ക് സാക്ഷ്യം വഹിച്ചിട്ടുണ്ട്. നേരത്തെ എംസി റോഡിൽ എൽഡിഎഫ് സ്ഥാപിച്ച "എൽഡിഎഫ് അല്ലാതെ മറ്റാരുണ്ട്?" എന്ന ബോർഡിന് മറുപടിയായി, തൊട്ടടുത്ത് തന്നെ "മൂവാറ്റുപുഴയിൽ മാത്യു ഉണ്ട്" എന്ന് യുഡിഎഫ് മറുപടി നൽകിയത് വലിയ തരംഗമായിരുന്നു. വോട്ടെടുപ്പ് അടുത്തിരിക്കെ, അണികൾക്കിടയിൽ ആവേശം നിറയ്ക്കാനും എതിരാളികളെ പ്രതിരോധത്തിലാക്കാനും ലക്ഷ്യമിട്ടുള്ള ഈ ‘ഫ്ലെക്സ് യുദ്ധം’ വരും ദിവസങ്ങളിലും തുടരുമെന്നാണ് സൂചന.
