അന്താരാഷ്ട്ര ഊർജമേളയ്ക്ക്ഇന്ന് കൊച്ചിയിൽ തുടക്കം വൈദ്യുതി മന്ത്രി ഉദ്ഘാടനം ചെയ്യും

​കൊച്ചി: കേരളത്തിന്റെ ഊർജ ഭൂപടത്തിൽ നവീന മാറ്റങ്ങൾ ലക്ഷ്യമിട്ട് എനർജി മാനേജ്‌മെന്റ് സെന്റർ (EMC) സംഘടിപ്പിക്കുന്ന മൂന്നാമത് അന്താരാഷ്ട്ര ഊർജമേളയ്ക്ക് (IEFK 2026) ഇന്ന് കൊച്ചിയിൽ തുടക്കമാകും. പനങ്ങാട് കുഫോസ് (KUFOS) ക്യാമ്പസിലെ പ്രൊഫ. വി.കെ. ദാമോദരൻ നഗറിൽ രാവിലെ 10 മണിക്ക് നടക്കുന്ന ചടങ്ങിൽ വൈദ്യുതി മന്ത്രി കെ. കൃഷ്ണൻകുട്ടി മേളയുടെ ഉദ്ഘാടനം നിർവഹിക്കും.

​‘എംപവറിംഗ് എനർജി ഫ്യൂച്ചർ’ (Empowering Energy Future) എന്ന സന്ദേശവുമായി നടത്തുന്ന മേളയിൽ കെ. ബാബു എം.എൽ.എ അധ്യക്ഷത വഹിക്കും. ഊർജ വകുപ്പ് അഡീഷണൽ ചീഫ് സെക്രട്ടറി പുനീത് കുമാർ മുഖ്യാതിഥിയാകും. ഫെബ്രുവരി 9 വരെയാണ് മേള സംഘടിപ്പിച്ചിരിക്കുന്നത്.

​ഗ്രീൻ എക്‌സ്‌പോയും ഇ-കുക്കിംഗും പ്രധാന ആകർഷണങ്ങൾ

സാങ്കേതിക വിദ്യയെ സാധാരണക്കാർക്ക് പരിചിതമാക്കുക എന്ന ലക്ഷ്യത്തോടെ വിപുലമായ പ്രദർശനങ്ങളാണ് മേളയിൽ ഒരുക്കിയിരിക്കുന്നത്. ഗ്രീൻ എക്‌സ്‌പോയിൽ അത്യാധുനിക ഗൃഹോപകരണങ്ങൾ, പുതിയ തലമുറയിലെ ഇലക്ട്രിക് വാഹനങ്ങൾ, സൗരോർജ ഉപകരണങ്ങൾ എന്നിവ പ്രദർശിപ്പിക്കും. ഗ്യാസ് അടുപ്പുകൾക്ക് പകരമായി വൈദ്യുതി ഉപയോഗിച്ചുള്ള പാചകരീതികൾ പരിചയപ്പെടുത്തുന്ന ‘ഇ-കുക്കിംഗ്’ പരിശീലനം കുടുംബശ്രീ അംഗങ്ങൾക്കും പുതിയ സംരംഭകർക്കും ഏറെ സഹായകമാകും.

​വിദഗ്ധ ചർച്ചകളും സംവാദങ്ങളും

രാജ്യാന്തര ഏജൻസികളുടെ സാങ്കേതിക ചർച്ചകൾക്ക് പുറമെ, ആണവോർജം, ഇലക്ട്രിക് വാഹന സുരക്ഷ തുടങ്ങിയ വിഷയങ്ങളിൽ ഭാഭ അറ്റോമിക് റിസർച്ച് സെന്ററിലെ (BARC) മുൻ ശാസ്ത്രജ്ഞർ ഉൾപ്പെടെയുള്ള വിദഗ്ധർ സംവാദങ്ങൾ നയിക്കും. കേരള ഫിഷറീസ് സമുദ്ര പഠന സർവകലാശാല (കുഫോസ്) വൈസ് ചാൻസലർ ഡോ. എ. ബിജുകുമാർ ഉൾപ്പെടെയുള്ള പ്രമുഖർ വിവിധ സെഷനുകളിൽ പങ്കെടുക്കും.

​പൊതുജനങ്ങൾക്കും വിദ്യാർത്ഥികൾക്കും മേളയിലേക്ക് പ്രവേശനം സൗജന്യമാണ്. ദിവസവും വൈകുന്നേരങ്ങളിൽ വൈവിധ്യമാർന്ന കലാസാംസ്കാരിക പരിപാടികളും മേളയുടെ ഭാഗമായി അരങ്ങേറും