നിപ്പ ഭയം വേണ്ട, ജാഗ്രത വേണം സെപ്റ്റംബർ വരെ അതീവ ജാഗ്രതാ നിർദേശവുമായി ജില്ലാ മെഡിക്കൽ ഓഫീസർ

നിപ്പ ഭയം വേണ്ട, ജാഗ്രതയും പ്രതിരോധവും വേണം: അതീവ ജാഗ്രതാ നിർദേശവുമായി ഡി.എം.ഒ

 കൊച്ചി: നിപ്പ വൈറസിനെതിരെ ഭയമല്ല, മറിച്ച് ശക്തമായ ജാഗ്രതയും പ്രതിരോധവുമാണ് ആവശ്യമെന്ന് ജില്ലാ മെഡിക്കൽ ഓഫീസർ (ഡി.എം.ഒ) അറിയിച്ചു. നിപ്പ വൈറസിന്റെ പകർച്ചാ സാധ്യതയും ഉയർന്ന മരണനിരക്കും കണക്കിലെടുത്ത് പൊതുജനങ്ങൾ അതീവ ജാഗ്രത പാലിക്കണം. നിലവിലെ സാഹചര്യത്തിൽ വരുന്ന സെപ്റ്റംബർ മാസം വരെ ജില്ലയിൽ അതിജാഗ്രത ഉറപ്പാക്കേണ്ടതുണ്ടെന്നും ഡി.എം.ഒ വ്യക്തമാക്കി.

​വൈറസിന്റെ സ്വാഭാവിക ഉറവിടമായ വവ്വാലുകളുടെ പ്രജനന കാലത്തും, അവ കുഞ്ഞുങ്ങളെ പാലൂട്ടി വളർത്തുന്ന സമയത്തും കൂട്ടമായി താമസിക്കാറുണ്ട്. ഇത്തരം ഘട്ടങ്ങളിൽ വവ്വാലുകളുടെ ഉമിനീര്, വിസർജ്യങ്ങൾ എന്നിവയിലൂടെ വൈറസ് പുറന്തള്ളാനുള്ള സാധ്യത വളരെ കൂടുതലാണ്. ഈ സമയങ്ങളിൽ പഴങ്ങളുടെ ലഭ്യത കൂടുന്നതും വവ്വാലുകളും മനുഷ്യരും തമ്മിലുള്ള സമ്പർക്കത്തിനുള്ള സാഹചര്യങ്ങൾ വർദ്ധിപ്പിക്കുന്നതും രോഗസാധ്യത കൂട്ടുന്നു. പ്രകൃതിയുടെയും മറ്റ് ജീവജാലങ്ങളുടെയും ആരോഗ്യവുമായി മനുഷ്യന്റെ ആരോഗ്യം ബന്ധപ്പെട്ടിരിക്കുന്നു എന്ന 'ഏകാരോഗ്യ' (One Health) ആശയത്തിൽ അധിഷ്ഠിതമായ രോഗപ്രതിരോധ ശീലങ്ങൾ എല്ലാവരും പാലിക്കണമെന്നും ആരോഗ്യവകുപ്പ് നിർദേശിക്കുന്നു.

​വവ്വാലുകളെ പ്രകോപിപ്പിക്കരുത്; സമ്പർക്കം ഒഴിവാക്കണം

​നമ്മുടെ ആവാസവ്യവസ്ഥയുടെ ഭാഗമായ വവ്വാലുകളെ ഉപദ്രവിക്കരുതെന്ന് ഡി.എം.ഒ പ്രത്യേകം ഓർമ്മിപ്പിച്ചു. വവ്വാലുകൾ കൂട്ടമായിരിക്കുന്ന മരങ്ങളിലേക്ക് കല്ലെറിയുകയോ, ശബ്ദമുണ്ടാക്കി അവയെ പ്രകോപിപ്പിക്കുകയോ ചെയ്യരുത്. ഇവ ചേക്കേറിയ മരങ്ങൾ നശിപ്പിക്കാനും പാടില്ല.

​പ്രധാന മുൻകരുതലുകൾ:

​വവ്വാലുകൾ കൂടുതലുള്ള മരച്ചുവടുകളിൽ വിശ്രമിക്കുന്നതും വസ്ത്രങ്ങൾ ഉണക്കുന്നതും ഒഴിവാക്കുക.

​ഇത്തരം മരങ്ങൾക്ക് കീഴിൽ വളർത്തുമൃഗങ്ങളെ മേയാൻ അനുവദിക്കരുത്.

​വവ്വാലോ മറ്റ് ജീവികളോ കടിച്ചതോ, താഴെ വീണുകിടക്കുന്നതോ ആയ പഴങ്ങൾ യാതൊരു കാരണവശാലും കഴിക്കരുത്.

​ഉപയോഗിക്കുന്ന പഴങ്ങൾ ഉപ്പ്/മഞ്ഞൾ ലായനിയിൽ നന്നായി കഴുകിയ ശേഷം, കഴിവതും തൊലി കളഞ്ഞ് മാത്രം ഉപയോഗിക്കുക.

​ഭക്ഷണവും ശുചിത്വവും

​പക്ഷിമൃഗാദികളുടെ ശരീരസ്രവങ്ങളോ വിസർജ്യമോ കലരാത്ത വിധം ഭക്ഷണപദാർത്ഥങ്ങളും കുടിവെള്ളവും എപ്പോഴും നന്നായി അടച്ചു സൂക്ഷിക്കണം. താഴെ വീണുകിടക്കുന്ന അടയ്ക്ക, പുളി, കശുവണ്ടി എന്നിവ ശേഖരിക്കുമ്പോൾ നിർബന്ധമായും കൈയ്യുറകൾ (Gloves) ധരിക്കണം. അതിനുശേഷം കൈകാലുകൾ സോപ്പുപയോഗിച്ച് കഴുകണം. തെങ്ങ്, പന എന്നിവയിൽ നിന്നും പാത്രങ്ങൾ തുറന്നുവെച്ച് ശേഖരിക്കുന്ന നീരയോ കള്ളോ കുടിക്കരുത്. തുറന്നുവെക്കുന്ന ഇത്തരം പാനീയങ്ങളിൽ വവ്വാലുകളുടെ ഉമിനീരും വിസർജ്യവും കലരാൻ സാധ്യതയേറെയാണ്. വളർത്തുമൃഗങ്ങളെ പരിചരിച്ച ശേഷവും, പക്ഷിമൃഗാദികളുടെ ശരീരസ്രവങ്ങളുമായി സമ്പർക്കമുണ്ടായാലും സോപ്പ് ഉപയോഗിച്ച് കൈകൾ വൃത്തിയായി കഴുകുന്നത് ശീലമാക്കുക. ചത്തുകിടക്കുന്ന പക്ഷികളെയോ മൃഗങ്ങളെയോ തൊടരുത്.

​ഈ ലക്ഷണങ്ങൾ കണ്ടാൽ വൈദ്യസഹായം തേടുക

​പനി, പരസ്പരബന്ധമില്ലാതെ സംസാരിക്കുക, ജന്നി (ഫിറ്റ്സ്), കഠിനമായ തലവേദന, ശ്വാസംമുട്ടൽ തുടങ്ങിയ ലക്ഷണങ്ങൾ പ്രകടമായാൽ ഒട്ടും വൈകാതെ തന്നെ അടുത്തുള്ള ആരോഗ്യകേന്ദ്രത്തിൽ എത്തി വൈദ്യസഹായം തേടണമെന്നും ജില്ലാ മെഡിക്കൽ ഓഫീസർ അറിയിച്ചു.