വ്യാജമദ്യ ലഹരിവേട്ട ശക്തമാക്കി എക്‌സൈസ്

കോഴിക്കോട്ട് വ്യാജമദ്യ-ലഹരിവേട്ട ശക്തമാക്കി എക്‌സൈസ്: ഫെബ്രുവരിക്ക് ശേഷം 1,300-ലേറെ കേസുകൾ; ബോധവൽക്കരണവുമായി ജനകീയ സമിതി

​കോഴിക്കോട്: ജില്ലയിൽ വ്യാജമദ്യ നിർമാണവും ലഹരി കടത്തും തടയുന്നതിനുള്ള നടപടികൾ എക്‌സൈസ് വകുപ്പും ജില്ലാ ഭരണകൂടവും ശക്തമാക്കി. അഡീഷണൽ ജില്ലാ മജിസ്‌ട്രേറ്റ് (എ.ഡി.എം) കെ. ഷറീനയുടെ അധ്യക്ഷതയിൽ കളക്ടറേറ്റ് കോൺഫറൻസ് ഹാളിൽ ചേർന്ന ജില്ലാതല ജനകീയ സമിതി യോഗത്തിലാണ് ഇത് സംബന്ധിച്ച വിവരങ്ങൾ പുറത്തുവിട്ടത്.

​2026 ഫെബ്രുവരി മുതൽ ഇതുവരെ ജില്ലയിൽ 4,765 റെയ്ഡുകളും 159 കമ്പൈൻഡ് റെയ്ഡുകളുമാണ് എക്‌സൈസ് നടത്തിയത്. പരിശോധനകളിൽ 945 അബ്കാരി കേസുകളും 404 എൻ.ഡി.പി.എസ് (ലഹരിമരുന്ന്) കേസുകളും 1,482 കോട്പ (പുകയില വിരുദ്ധ) കേസുകളും രജിസ്റ്റർ ചെയ്തു. വിവിധ കേസുകളിലായി 1,015 പേർ അറസ്റ്റിലായിട്ടുണ്ട്.

​വലിയ അളവിൽ ലഹരിവസ്തുക്കളും പണവും പിടിച്ചെടുത്തു

​പരിശോധനകളിൽ 478.5 ലിറ്റർ ചാരായം, 2,891 ലിറ്ററിലധികം വിദേശമദ്യം, 24,208 ലിറ്റർ വാഷ് എന്നിവ എക്‌സൈസ് സംഘം കസ്റ്റഡിയിലെടുത്തു. കൂടാതെ 121 ഗ്രാമിലധികം മെത്താഫെറ്റമിൻ, ഹെറോയിൻ തുടങ്ങിയ മാരക ലഹരിമരുന്നുകളും പിടിച്ചെടുത്തിട്ടുണ്ട്. ലഹരി കടത്തിന് ഉപയോഗിച്ച 81 വാഹനങ്ങളും തൊണ്ടിമുതലായി 4.09 ലക്ഷത്തിലധികം രൂപയും പിടിച്ചെടുത്തിട്ടുണ്ട്.

​ലഹരിക്കെതിരെ സ്കൂളുകളും കുടുംബശ്രീയും

​വിദ്യാലയങ്ങൾ കേന്ദ്രീകരിച്ചുള്ള ലഹരിവിരുദ്ധ പ്രവർത്തനങ്ങളും ജില്ലയിൽ ഊർജിതമായി നടക്കുന്നുണ്ട്. നിലവിൽ 405 സ്‌കൂൾതല ലഹരിവിരുദ്ധ ക്ലബ്ബുകളും 91 കോളേജ്തല ക്ലബ്ബുകളും സജീവമാണ്. ഫറൂക്ക്, കൊയിലാണ്ടി, വടകര റേഞ്ചുകളിൽ പ്രത്യേക അന്വേഷണങ്ങളും പരിശോധനകളും പൂർത്തിയാക്കി.

​വടകര ആയഞ്ചേരി റഹ്മാനിയ ഹയർ സെക്കൻഡറി സ്‌കൂളിലെ വിമുക്തി ക്ലബ്ബ് കേഡറുകൾ വഴി പഞ്ചായത്തിലെ കുടുംബശ്രീ അംഗങ്ങൾക്ക് ബോധവൽക്കരണം നൽകുകയും, പ്രദേശത്ത് 1,001 ലഹരി വിരുദ്ധ ഇൻഫോർമർമാരെ സജ്ജമാക്കുകയും ചെയ്തതായി എക്‌സൈസ് അറിയിച്ചു. ജില്ലയിലുടനീളം 7,626 ബോധവൽക്കരണ പരിപാടികളാണ് സംഘടിപ്പിച്ചത്.

​ഡി-അഡിക്ഷൻ കേന്ദ്രങ്ങളിൽ ചികിത്സ തേടിയത് ആയിരങ്ങൾ

​കോഴിക്കോട് ബീച്ച് ഹോസ്പിറ്റലിലെ ഡി-അഡിക്ഷൻ സെന്റർ വഴി 1,414 പേർ സേവനം തേടുകയും 53 പേർക്ക് കിടത്തി ചികിത്സ നൽകുകയും ചെയ്തു. പുതിയറയിലെ കൗൺസിലിംഗ് സെന്ററിൽ 670 പേർക്ക് കൗൺസിലിംഗ് സേവനം ലഭ്യമാക്കി.

​പഞ്ചായത്തുതല ജാഗ്രതാ സമിതികളും ജനകീയ പങ്കാളിത്തവും കൂടുതൽ ശക്തമാക്കണമെന്ന് യോഗത്തിൽ നിർദേശമുയർന്നു. പഞ്ചായത്തുകളിൽ പരാതിപ്പെട്ടികൾ സ്ഥാപിക്കാനും സ്റ്റാറ്റിയൂട്ടറി കമ്മിറ്റി രൂപീകരിക്കാനും പ്രതിനിധികൾ ആവശ്യപ്പെട്ടു. യോഗത്തിൽ എക്‌സൈസ് അസിസ്റ്റന്റ് കമ്മീഷണർ എസ്. നിജുമോൻ, പഞ്ചായത്ത് പ്രസിഡന്റുമാർ, വകുപ്പുതല ഉദ്യോഗസ്ഥർ, മദ്യവിരുദ്ധ സമിതി പ്രതിനിധികൾ തുടങ്ങിയവർ പങ്കെടുത്തു.