ഒറ്റക്കൊമ്പൻ ഫസ്റ്റ് ലുക്ക് കടുവാക്കുന്നേൽ കുറുവച്ചനായി സുരേഷ് ഗോപിയുടെ മാസ് എൻട്രി
സുരേഷ് ഗോപി നായകനാകുന്ന ബിഗ് ബജറ്റ് ചിത്രം ഒറ്റക്കൊമ്പൻ്റെ ഫസ്റ്റ് ലുക്ക് പുറത്തിറങ്ങി. കടുവാക്കുന്നേൽ കുറുവച്ചൻ എന്ന കരുത്തുറ്റ കഥാപാത്രത്തെയാണ് താരം അവതരിപ്പിക്കുന്നത്. മാത്യൂസ് തോമസ് സംവിധാനം ചെയ്യുന്ന ചിത്രത്തിൻ്റെ വിശേഷങ്ങൾ അറിയാം.
Vazhoor Jose
69
കടുവാക്കുന്നേൽ കുറുവച്ചനായി സുരേഷ് ഗോപി; ‘ഒറ്റക്കൊമ്പൻ’ ഫസ്റ്റ് ലുക്ക് പുറത്തിറങ്ങി
പാലാ: മധ്യതിരുവിതാംകൂറിലെ ഐതിഹാസിക വ്യക്തിത്വം കടുവാക്കുന്നേൽ കുറുവച്ചൻ്റെ ജീവിതം വെള്ളിത്തിരയിലേക്ക്. സുരേഷ് ഗോപിയെ നായകനാക്കി നവാഗതനായ മാത്യൂസ് തോമസ് സംവിധാനം ചെയ്യുന്ന 'ഒറ്റക്കൊമ്പൻ' എന്ന ചിത്രത്തിൻ്റെ ഫസ്റ്റ് ലുക്ക് പോസ്റ്റർ ഈസ്റ്റർ ദിനത്തിൽ പുറത്തുവിട്ടു. ശ്രീഗോകുലം മൂവീസിൻ്റെ ബാനറിൽ ഗോകുലം ഗോപാലനാണ് ചിത്രം നിർമ്മിക്കുന്നത്.
മീനച്ചിൽ താലൂക്കിലെ പ്രതാപശാലിയായ കുറുവച്ചനെ അങ്ങേയറ്റം മാസ്സ് ലുക്കിലാണ് പോസ്റ്ററിൽ അവതരിപ്പിച്ചിരിക്കുന്നത്. വായ്ക്കുള്ളിൽ കുരിശുള്ള ചെയിൻ അമർത്തിപ്പിടിച്ചു നിൽക്കുന്ന സുരേഷ് ഗോപിയുടെ ചിത്രം ഇതിനോടകം സോഷ്യൽ മീഡിയയിൽ തരംഗമായിക്കഴിഞ്ഞു. "Though I fall... I will rise again" (വീണുപോയാലും ഞാൻ വീണ്ടും ഉയർത്തെഴുന്നേൽക്കും) എന്ന ബൈബിൾ വചനമാണ് ചിത്രത്തിൻ്റെ ടാഗ്ലൈൻ.
അണിനിരക്കുന്നത് വൻ താരനിര
മാസ് ആക്ഷൻ ജോണറിലൊരുങ്ങുന്ന ചിത്രത്തിൽ അഭിനയയാണ് നായിക. ഇന്ദ്രജിത്ത് സുകുമാരൻ, വിജയരാഘവൻ, ലാലു അലക്സ്, ലാൽ, ചെമ്പൻ വിനോദ്, ജോണി ആൻ്റണി തുടങ്ങി എഴുപതോളം പ്രമുഖ താരങ്ങൾ ചിത്രത്തിൽ അണിനിരക്കുന്നുണ്ട്. വലിയ ബജറ്റിലൊരുങ്ങുന്ന സിനിമയുടെ അവസാന ഷെഡ്യൂൾ ചിത്രീകരണം പുരോഗമിക്കുകയാണ്.
ഷിബിൻ ഫ്രാൻസിസ് തിരക്കഥയൊരുക്കുന്ന ചിത്രത്തിന് ഹർഷവർദ്ധൻ രാമേശ്വർ സംഗീതം നൽകുന്നു. ഷാജികുമാർ ആണ് ഛായാഗ്രഹണം. തിരുവനന്തപുരം, കോട്ടയം, പാലാ, ഈരാറ്റുപേട്ട കൂടാതെ ഹോങ്കോങ്ങിലും ചിത്രത്തിന് ഷെഡ്യൂളുകളുണ്ട്.
