മന്ത്രി റിയാസ് സഞ്ചരിച്ച വാഹനത്തിന് ഫിറ്റ്‌നസില്ല ആർടിഒയ്ക്ക് പരാതി നൽകി ബിജെപി

മന്ത്രി റിയാസ് പ്രതിഷേധത്തിന് ഉപയോഗിച്ച വാഹനത്തിന് ഫിറ്റ്‌നസില്ലെന്ന് പരാതി; നടപടി ആവശ്യപ്പെട്ട് ബിജെപി

​കോഴിക്കോട്: ദേശീയപാത 66-ൽ രാമനാട്ടുകര മുതൽ വെങ്ങളം വരെയുള്ള റീച്ചിന്റെ ഉദ്ഘാടന ചടങ്ങിൽ നിന്ന് തന്നെ ഒഴിവാക്കിയതിൽ പ്രതിഷേധിച്ച് പൊതുമരാമത്ത് മന്ത്രി പി.എ. മുഹമ്മദ് റിയാസ് നടത്തിയ ജനകീയ റോഡ് ഷോ വിവാദത്തിൽ. റോഡ് ഷോയ്ക്കായി മന്ത്രിയും സംഘവും സഞ്ചരിച്ച വാഹനത്തിന് ഫിറ്റ്‌നസ് സർട്ടിഫിക്കറ്റ് ഇല്ലെന്ന് ചൂണ്ടിക്കാട്ടി ബിജെപി രംഗത്തെത്തി. സംഭവത്തിൽ നടപടി ആവശ്യപ്പെട്ട് ബിജെപി കോഴിക്കോട് ജില്ലാ പ്രസിഡന്റ് കെ.പി. പ്രകാശ് ബാബു കോഴിക്കോട് എൻഫോഴ്‌സ്‌മെന്റ് ആർടിഒയ്ക്ക് പരാതി നൽകി.

​കൊച്ചിയിൽ പ്രധാനമന്ത്രി നരേന്ദ്ര മോദി ഉദ്ഘാടനം ചെയ്ത വികസന പദ്ധതികളുടെ വേദിയിൽ ഇടം ലഭിക്കാത്തതിൽ പ്രതിഷേധിച്ചാണ് മന്ത്രിയുടെ നേതൃത്വത്തിൽ പ്രതീകാത്മക ഉദ്ഘാടനവും റോഡ് ഷോയും സംഘടിപ്പിച്ചത്. മാർച്ച് 11-ന് നടന്ന പരിപാടിയിൽ KL 01 9069 നമ്പറിലുള്ള തുറന്ന ജീപ്പിലായിരുന്നു മന്ത്രിയുടെ യാത്ര. എം.എൽ.എമാരായ അഹമ്മദ് ദേവർകോവിൽ, തോട്ടത്തിൽ രവീന്ദ്രൻ, സിപിഎം ജില്ലാ സെക്രട്ടറി പി. മോഹനൻ എന്നിവരും ഇതേ വാഹനത്തിൽ മന്ത്രിക്കൊപ്പമുണ്ടായിരുന്നു.

​36 വർഷം പഴക്കമുള്ള വാഹനം

മോട്ടർ വാഹന വകുപ്പിന്റെ രേഖകൾ പ്രകാരം 1990-ൽ രജിസ്റ്റർ ചെയ്ത ഈ വാഹനത്തിന് 36 വർഷം പഴക്കമുണ്ട്. പാലക്കാട് സ്വദേശി സി.പി. പ്രജിത്തിന്റെ ഉടമസ്ഥതയിലുള്ളതാണ് വാഹനം. കഴിഞ്ഞ ജനുവരി 28-ന് വാഹനത്തിന്റെ ഫിറ്റ്‌നസ് കാലാവധി അവസാനിച്ചതായാണ് റിപ്പോർട്ടുകൾ. നിലവിൽ രാമനാട്ടുകരയിലുള്ള സുഹൃത്തിന് കൈമാറിയ വാഹനമാണിതെന്ന് ഉടമ വ്യക്തമാക്കി

മോട്ടർ വാഹന നിയമപ്രകാരം ഫിറ്റ്‌നസ് ഇല്ലാത്ത വാഹനം നിരത്തിലിറക്കുന്നത് കുറ്റകരമാണെന്നും, സുരക്ഷാ മാനദണ്ഡങ്ങൾ പാലിക്കാതെ മന്ത്രി ഇത്തരം വാഹനത്തിൽ യാത്ര ചെയ്തത് നിയമത്തോടുള്ള വെല്ലുവിളിയാണെന്നും ബിജെപി പരാതിയിൽ പറയുന്നു. നിയമലംഘനം നടത്തിയ വാഹനം കസ്റ്റഡിയിലെടുക്കണമെന്നും ബോധപൂർവം നിയമലംഘനത്തിന് നേതൃത്വം നൽകിയ മന്ത്രിക്കെതിരെ കേസെടുക്കണമെന്നുമാണ് ബിജെപിയുടെ ആവശ്യം.