ശബരിമല മീനമാസ പൂജകൾക്ക് തുടക്കം ഉത്സവ കൊടിയേറ്റ് മാർച്ച് 23 ന് ആറാട്ട് ഏപ്രിൽ ഒന്നിന്
ശബരിമല നട മീനമാസ പൂജകൾക്കായി തുറന്നു. ഉത്സവ കൊടിയേറ്റ്, ആറാട്ട് തീയതികളും ബുക്കിംഗ് വിവരങ്ങളും അറിയാം.
അനില എം കൃഷ്ണൻ 
ശബരിമലയിൽ മീനമാസ പൂജകൾക്ക് തുടക്കം; മാർച്ച് 23-ന് ഉത്സവ കൊടിയേറ്റ്
ശബരിമല: മീനമാസ പൂജകൾക്കായി ശബരിമല ശ്രീധർമ്മശാസ്താ ക്ഷേത്രനട തുറന്നു. ശനിയാഴ്ച വൈകിട്ട് അഞ്ചുമണിക്ക് തന്ത്രി കണ്ഠര് മഹേഷ് മോഹനരുടെ മുഖ്യകാർമ്മികത്വത്തിൽ മേൽശാന്തി ഇ.ഡി.പ്രസാദാണ് നടതുറന്ന് ദീപം തെളിയിച്ചത്. തുടർന്ന് പതിനെട്ടാം പടിയ്ക്ക് താഴെയുള്ള ആഴിയിൽ അഗ്നി പകർന്നു.
മീനമാസം ഒന്നായ മാർച്ച് 15 മുതൽ ഭക്തർക്ക് ദർശനം അനുവദിക്കും. പുലർച്ചെ അഞ്ചുമണിക്കാണ് ദർശനത്തിനായി നട തുറക്കുന്നത്. മീനമാസം ഒന്നു മുതൽ അഞ്ചുദിവസം കളഭാഭിഷേകവും പടിപൂജയും ഉൾപ്പെടെയുള്ള പ്രത്യേക ചടങ്ങുകൾ ഉണ്ടാകും. മാർച്ച് 19-ന് രാത്രി പത്തുമണിക്ക് പൂജകൾ പൂർത്തിയാക്കി നട അടയ്ക്കും.
വാർഷിക ഉത്സവം മാർച്ച് 23 മുതൽ
ശബരിമലയിലെ വാർഷിക ഉത്സവത്തിനായി മാർച്ച് 22-ന് വൈകിട്ട് അഞ്ചുമണിക്ക് വീണ്ടും നട തുറക്കും. മാർച്ച് 23-നാണ് ഉത്സവ കൊടിയേറ്റ് നടക്കുക. പത്തുദിവസം നീണ്ടുനിൽക്കുന്ന ഉത്സവ ചടങ്ങുകൾക്ക് ശേഷം മാർച്ച് 31-ന് പള്ളിവേട്ടയും ഏപ്രിൽ 1-ന് പമ്പയിൽ ആറാട്ടും നടക്കും. ഏപ്രിൽ 1-ന് രാവിലെ ഒൻപത് മണിക്ക് സന്നിധാനത്തുനിന്നും ആറാട്ട് ഘോഷയാത്ര പമ്പയിലേക്ക് പുറപ്പെടും. ആറാട്ടിനു ശേഷം ഘോഷയാത്ര സന്നിധാനത്ത് തിരിച്ചെത്തിയ ശേഷം രാത്രി പത്തിന് നട അടയ്ക്കുന്നതോടെ ഉത്സവത്തിന് സമാപനമാകും.
ബുക്കിംഗ് സൗകര്യങ്ങൾ
ദർശനത്തിനെത്തുന്ന ഭക്തർ വെർച്വൽ ക്യൂ സംവിധാനം വഴി സ്ലോട്ടുകൾ മുൻകൂട്ടി ഉറപ്പാക്കേണ്ടതാണ്. ഇതിനായി www.sabarimalaonline.org എന്ന വെബ്സൈറ്റ് സന്ദർശിക്കാം. സന്നിധാനത്ത് മുറികൾ ആവശ്യമുള്ളവർക്ക് www.onlinetdb.com വഴി ഓൺലൈനായി ബുക്കിംഗ് നടത്താവുന്നതാണ്.
