കൊലപാതകി ആര് സസ്പെൻസ് നിറച്ച് അനൂപ് മേനോൻ ചിത്രം തനിനിറം ടീസർ
എസ്.ഐ. ഫെലിക്സ് ലോപ്പസായി അനൂപ് മേനോൻ വീണ്ടും പോലീസ് വേഷത്തിൽ. രതീഷ് നെടുമങ്ങാട് സംവിധാനം ചെയ്യുന്ന ഇൻവെസ്റ്റിഗേറ്റീവ് ക്രൈം ത്രില്ലർ തനിനിറം ടീസർ കാണാം. ഫെബ്രുവരി 13 മുതൽ സിനിമ തിയേറ്ററുകളിൽ.
Vazhoor Jose 
അനൂപ് മേനോൻ വീണ്ടും ഇൻവെസ്റ്റിഗേറ്റീവ് ത്രില്ലറുമായി; ഉദ്വേഗം നിറച്ച് 'തനിനിറം' ടീസർ പുറത്തിറങ്ങി
തിരുവനന്തപുരം: "ഇവിടെ ഒരു കൊലപാതകം നടന്നിട്ട് മുപ്പത്തിയാറു മണിക്കൂറായി... എന്നിട്ടും കൊലപാതകിയാരാണെന്ന് ആർക്കും ഒരു പിടിയുമില്ല!" അനൂപ് മേനോന്റെ ഈ ചടുലമായ ഡയലോഗിലൂടെ പ്രേക്ഷകരിൽ ആകാംക്ഷ നിറച്ച് 'തനിനിറം' സിനിമയുടെ ഒഫീഷ്യൽ ടീസർ പുറത്തിറങ്ങി. രതീഷ് നെടുമങ്ങാട് സംവിധാനം ചെയ്യുന്ന ചിത്രം പൂർണ്ണമായും ഒരു സസ്പെൻസ് ക്രൈം ഇൻവെസ്റ്റിഗേറ്റീവ് ത്രില്ലറാണെന്ന സൂചനയാണ് ടീസർ നൽകുന്നത്.
ചിത്രത്തിൽ എസ്.ഐ. ഫെലിക്സ് ലോപ്പസ് എന്ന കരുത്തുറ്റ പോലീസ് ഉദ്യോഗസ്ഥനായാണ് അനൂപ് മേനോൻ എത്തുന്നത്. അതിഭാവുകത്വങ്ങളില്ലാതെ, തികച്ചും റിയലിസ്റ്റിക്കായ ശൈലിയിലാണ് ചിത്രം ഒരുക്കിയിരിക്കുന്നത്. ഒരു കൊലപാതകവും അതിന് പിന്നിലെ ചുരുളുകൾ നിവർത്തുന്ന അന്വേഷണവുമാണ് സിനിമയുടെ ഇതിവൃത്തം.
ഫെബ്രുവരി 13-ന് ചിത്രം തിയേറ്ററുകളിലെത്തും. നോബി, രമേഷ് പിഷാരടി, ജി. സുരേഷ് കുമാർ, പ്രസാദ് കണ്ണൻ, ദീപക് ശിവരാമൻ, ശൈലജ അമ്പു തുടങ്ങി വലിയൊരു താരനിര തന്നെ ചിത്രത്തിൽ അണിനിരക്കുന്നുണ്ട്. അംബിക കണ്ണൻബായ് ആണ് തിരക്കഥ ഒരുക്കിയിരിക്കുന്നത്. പാലാ, ഭരണങ്ങാനം, തിരുവനന്തപുരം എന്നിവിടങ്ങളിലായിരുന്നു ചിത്രീകരണം. പ്രദീപ് നായർ ഛായാഗ്രഹണവും അജു അജയ് എഡിറ്റിംഗും നിർവ്വഹിച്ചിരിക്കുന്നു.
