ഭൂതത്താൻകെട്ടിൽ ബോട്ട് സവാരി പുനരാരംഭിച്ചു പെരിയാറിലൂടെ കുട്ടമ്പുഴയിലേക്കും നേര്യമംഗലത്തേക്കും യാത്ര ചെയ്യാം

ഭൂതത്താൻകെട്ടിൽ ബോട്ട് സവാരി പുനരാരംഭിച്ചു; പെരിയാറിലെ ഓളപ്പരപ്പിൽ ഇനി വിനോദസഞ്ചാരത്തിന്റെ പുത്തൻ ഉണർവ്

​ഭൂതത്താൻകെട്ട്: കേരളത്തിലെ പ്രധാന വിനോദസഞ്ചാര കേന്ദ്രങ്ങളിലൊന്നായ ഭൂതത്താൻകെട്ടിൽ ഏറെനാളായി മുടങ്ങിക്കിടന്ന ബോട്ട് സവാരി പുനരാരംഭിച്ചു. ഇറിഗേഷൻ ടൂറിസം പദ്ധതിയുടെ ഭാഗമായി വിഭാവനം ചെയ്ത ബോട്ടിംഗ് സർവീസിന്റെ ഉദ്ഘാടനം ആന്റണി ജോൺ എം.എൽ.എ നിർവഹിച്ചു. ഭൂതത്താൻകെട്ട് - ഞായപ്പിള്ളി വഴി കുട്ടമ്പുഴയിലേക്കും, തട്ടേക്കാട് - ഇഞ്ചത്തോട്ടി വഴി നേര്യമംഗലത്തേക്കുമാണ് പ്രധാനമായും സർവീസുകൾ ക്രമീകരിച്ചിരിക്കുന്നത്. പ്രകൃതിരമണീയമായ പെരിയാറിലൂടെയുള്ള ഈ യാത്ര സഞ്ചാരികൾക്ക് ഏറെ ആകർഷകമാകും.

​വിവിധ ശേഷിയുള്ള ഏഴ് ബോട്ടുകളാണ് നിലവിൽ സർവീസിനായി സജ്ജമാക്കിയിട്ടുള്ളത്. 95 പേർക്ക് ഒരേസമയം യാത്ര ചെയ്യാവുന്ന വലിയ ബോട്ടിന് പുറമെ, 45, 42 സീറ്റുകളുള്ള ഓരോ ബോട്ടുകളും 10 സീറ്റുകൾ വീതമുള്ള നാല് ചെറിയ ബോട്ടുകളും വിനോദസഞ്ചാരികൾക്കായി ഒരുക്കിയിട്ടുണ്ട്. രാവിലെ 8 മണി മുതൽ വൈകിട്ട് 6 മണി വരെയാണ് ബോട്ടിംഗിനായി അനുവദിച്ചിട്ടുള്ള സമയം.

​കോടതി വ്യവഹാരങ്ങളെത്തുടർന്ന് ഡിസംബർ രണ്ടാം വാരത്തിൽ ആരംഭിക്കേണ്ടിയിരുന്ന സർവീസുകൾ തടസ്സപ്പെടുകയായിരുന്നു. എന്നാൽ സർക്കാർ തലത്തിൽ നടത്തിയ നിരന്തരമായ ഇടപെടലുകൾക്കൊടുവിലാണ് പ്രതിസന്ധികൾ പരിഹരിച്ച് ബോട്ടിംഗ് പുനരാരംഭിക്കാൻ സാധിച്ചത്. ടെൻഡർ നടപടികൾ നേരത്തെ പൂർത്തിയാക്കിയിരുന്നെങ്കിലും നിയമപരമായ തടസ്സങ്ങൾ നീങ്ങാൻ വൈകുകയായിരുന്നു. ഇതോടെ മേഖലയിലെ ടൂറിസം രംഗത്ത് വലിയ മാറ്റമുണ്ടാകുമെന്നാണ് പ്രതീക്ഷിക്കുന്നത്.

​പിണ്ടിമന പഞ്ചായത്ത് പ്രസിഡന്റ് കെ.പി. ജോർജ് അധ്യക്ഷത വഹിച്ച ചടങ്ങിൽ ബ്ലോക്ക് പഞ്ചായത്ത് പ്രസിഡന്റ് ജെസ്സി സാജു, കീരമ്പാറ പഞ്ചായത്ത് പ്രസിഡന്റ് റീന ജോഷി, ജില്ലാ പഞ്ചായത്ത് അംഗം ജോമി തെക്കേക്കര എന്നിവർ മുഖ്യാതിഥികളായി. കീരമ്പാറ പഞ്ചായത്ത് വൈസ് പ്രസിഡന്റ് ബിനോയ് സി. പുല്ലൻ, പിണ്ടിമന പഞ്ചായത്ത് വൈസ് പ്രസിഡന്റ് ലത ഷാജി, കീരമ്പാറ സെന്റ് സെബാസ്റ്റ്യൻ പള്ളി വികാരി ഫാ. മാത്യു കൊച്ചുപുരയ്ക്കൽ, ചേലാട് ബസ് അനിയാ പള്ളി വികാരി ഫാ. വർഗീസ് പുതുമനക്കൂടി, ബ്ലോക്ക് പഞ്ചായത്ത് മെമ്പർ റാണിക്കുട്ടി ജോർജ് തുടങ്ങിയവരും തദ്ദേശ പ്രതിനിധികളും പെരിയാർ വാലി ഉദ്യോഗസ്ഥരും ചടങ്ങിൽ സംബന്ധിച്ചു.