തിരുവനന്തപുരം കാസർകോട് വന്ദേഭാരത് മെനു പരിഷ്കരിച്ചു മട്ടയരി ചോറും ബിരിയാണിയും ഇനി തീൻമേശയിൽ

​തിരുവനന്തപുരം - കാസർകോട് വന്ദേഭാരത് ഭക്ഷണ മെനു പരിഷ്കരിച്ചു; ഇനി പുത്തൻ രുചിക്കൂട്ടുകൾ

​തിരുവനന്തപുരം-കാസർകോട്, മംഗളൂരു വന്ദേഭാരത് എക്‌സ്‌പ്രസുകളിൽ യാത്രക്കാർക്കായി പുത്തൻ ഭക്ഷണ മെനു അവതരിപ്പിച്ചു. യാത്രക്കാരുടെ താൽപ്പര്യങ്ങൾ പരിഗണിച്ച് മൂന്ന് വ്യത്യസ്ത തരം മെനുകളാണ് വിവിധ ദിവസങ്ങളിലായി ലഭ്യമാവുക. കാസിനോ എയർ കേറ്ററേഴ്സ് ആൻഡ് ഫ്ലൈറ്റ് സർവീസസ് (CAFS) ആണ് പുതിയ മെനു തയ്യാറാക്കിയിരിക്കുന്നത്.

​പ്രധാന വിഭവങ്ങൾ ഇങ്ങനെ:

​ഉച്ചഭക്ഷണത്തിനും രാത്രി ഭക്ഷണത്തിനും മൂന്ന് ഓപ്ഷനുകളാണ് പ്രധാനമായും ഉള്ളത്.

​ഓപ്ഷൻ 1: നെയ്‌ച്ചോറ്, ഗോതമ്പ് പൊറോട്ട, പരിപ്പുകറി, മിക്സ്ഡ് തോരൻ, ഫ്രൂട്ട് ട്രൈഫുൽ. (നോൺ വെജിൽ ചിക്കൻ കറി ലഭിക്കും).

​ഓപ്ഷൻ 2: മട്ടയരി ചോറ്, 2 ചപ്പാത്തി, തീയൽ, വറുത്തരച്ച വെജ് കറി, അടപ്രഥമൻ. (നോൺ വെജിൽ മലബാർ ചിക്കൻ കറി. എക്സിക്യൂട്ടീവ് ക്ലാസിൽ മീൻ കറിയും ലഭ്യമാണ്).

​ഓപ്ഷൻ 3: വെജ് ബിരിയാണി, മലബാർ പൊറോട്ട, ഗ്രീൻപീസ് കറി, ഉരുളക്കിഴങ്ങ് മസാല, സേമിയ പായസം. (നോൺ വെജിന് ചിക്കൻ ബിരിയാണി).

​ബ്രേക്ക്ഫാസ്റ്റ് മെനു (രാവിലെ):

​രാവിലെ നൽകുന്ന ഭക്ഷണത്തിലും വൈവിധ്യമാർന്ന മാറ്റങ്ങൾ വരുത്തിയിട്ടുണ്ട്:

​ഇഡലി, വട, സാമ്പാർ, ഉണ്ണിയപ്പം.

​ഇടിയപ്പം, കടലക്കറി, വട, ടീ കേക്ക്.

​മിക്സ് വെജ് ഉപ്പുമാവ്, വട, സാമ്പാർ, ചട്ണി, വട്ടയപ്പം.

​നോൺ വെജ് വിഭാഗത്തിൽ മുട്ട ചിക്കിയത് (Egg Scrambled), മുട്ട റോസ്റ്റ്, ബ്രഡ് റോൾ എന്നിവയും ഉൾപ്പെടുത്തിയിട്ടുണ്ട്. സ്നാക്സ് വിഭാഗത്തിൽ ഇലയട, പരിപ്പുവട, കൊഴുക്കട്ട, കീരവട എന്നിവയും മാറി മാറി ലഭിക്കും.

​കഴിഞ്ഞ രണ്ടാഴ്ചകളായി നടന്ന മീൽ ട്രയലുകൾക്ക് യാത്രക്കാരിൽ നിന്ന് മികച്ച പ്രതികരണമാണ് ലഭിച്ചതെന്ന് സി.എ.എഫ്.എസ് കോർപറേറ്റ് ഷെഫ് സി. ഗുണശേഖർ അറിയിച്ചു.