നിയമസഭാ തിരഞ്ഞെടുപ്പ് 2026 പൊതുറോഡുകളിൽ ചിഹ്നങ്ങളും പോസ്റ്ററുകളും പാടില്ല കർശന നടപടിയെന്ന് തിരഞ്ഞെടുപ്പ് കമ്മീഷൻ.
2026 കേരള നിയമസഭാ തിരഞ്ഞെടുപ്പിനോടനുബന്ധിച്ച് പൊതുസ്ഥലങ്ങളിലും റോഡുകളിലും പ്രചാരണ സാമഗ്രികൾ സ്ഥാപിക്കുന്നതിന് മുഖ്യതിരഞ്ഞെടുപ്പ് ഓഫീസർ വിലക്കേർപ്പെടുത്തി. ലംഘിക്കുന്നവർക്കെതിരെ നിയമനടപടി സ്വീകരിക്കും
അനില എം കൃഷ്ണൻ 
തിരഞ്ഞെടുപ്പ് പ്രചാരണം: പൊതുറോഡുകളിൽ ചിഹ്നങ്ങളും പോസ്റ്ററുകളും പാടില്ല; കർശന നിർദേശവുമായി മുഖ്യതിരഞ്ഞെടുപ്പ് ഓഫീസർ
തിരുവനന്തപുരം: 2026ലെ നിയമസഭാ തിരഞ്ഞെടുപ്പ് പ്രചാരണത്തിന്റെ ഭാഗമായി പൊതുറോഡുകളിലോ പൊതുസ്ഥലങ്ങളിലോ ചിഹ്നങ്ങൾ വരയ്ക്കുന്നതിനും പോസ്റ്ററുകൾ പതിപ്പിക്കുന്നതിനും മുഖ്യതിരഞ്ഞെടുപ്പ് ഓഫീസർ കർശന വിലക്കേർപ്പെടുത്തി. മാതൃകാ പെരുമാറ്റച്ചട്ടം ലംഘിക്കുന്നവർക്കെതിരെ കർശന നടപടി സ്വീകരിക്കാൻ വരണാധികാരികൾക്കും ജില്ലാ തിരഞ്ഞെടുപ്പ് ഓഫീസർമാർക്കും നിർദേശം നൽകി.
പൊതുറോഡുകളിൽ അടയാളങ്ങൾ രേഖപ്പെടുത്തുക, വസ്തുക്കൾ തറയ്ക്കുക, പോസ്റ്ററുകൾ ഒട്ടിക്കുക തുടങ്ങിയ പ്രവർത്തനങ്ങളിൽ നിന്ന് രാഷ്ട്രീയ പാർട്ടികളും വ്യക്തികളും വിട്ടുനിൽക്കണം. റോഡുകൾ വികൃതമാക്കുന്നത് ഗതാഗതത്തിനും യാത്രക്കാർക്കും ബുദ്ധിമുട്ടുണ്ടാക്കുന്ന സാഹചര്യത്തിലാണ് ഈ ഇടപെടൽ.
പ്രധാന നിയന്ത്രണങ്ങൾ ഒറ്റനോട്ടത്തിൽ:
പൊതുസ്വത്ത് സംരക്ഷണം: റെയിൽവേ സ്റ്റേഷനുകൾ, ബസ് സ്റ്റാൻഡുകൾ, സർക്കാർ ആശുപത്രികൾ, പോസ്റ്റ് ഓഫീസുകൾ, പാലങ്ങൾ, ഇലക്ട്രിക്/ടെലിഫോൺ പോസ്റ്റുകൾ എന്നിവിടങ്ങളിൽ പ്രചാരണ സാമഗ്രികൾ പാടില്ല.
നിരോധിത പ്രവർത്തനങ്ങൾ: ചുവരെഴുത്ത്, കട്ടൗട്ടുകൾ, ഹോർഡിങ്ങുകൾ, ബാനറുകൾ, കൊടികൾ എന്നിവ പൊതുസ്ഥലങ്ങളിൽ സ്ഥാപിക്കുന്നത് അനുവദനീയമല്ല.
ചെലവ് സ്ഥാനാർത്ഥിയിൽ നിന്ന്: നിയമലംഘനം നടത്തി സ്ഥാപിക്കുന്ന പ്രചാരണ സാമഗ്രികൾ നീക്കം ചെയ്യുന്നതിനുള്ള ചെലവ് ബന്ധപ്പെട്ട സ്ഥാനാർത്ഥിയുടെ തിരഞ്ഞെടുപ്പ് ഫണ്ടിൽ നിന്ന് ഈടാക്കും.
നിയമനടപടി: നിർദേശങ്ങൾ ലംഘിക്കുന്നവർക്കെതിരെ നിലവിലുള്ള നിയമപ്രകാരം കേസെടുക്കാൻ ജില്ലാ ഭരണകൂടത്തിന് അധികാരമുണ്ടാകും.
തിരഞ്ഞെടുപ്പ് മാതൃകാപരമായി നടത്തുന്നതിന് എല്ലാ രാഷ്ട്രീയ പാർട്ടികളും പൊതുജനങ്ങളും സഹകരിക്കണമെന്ന് മുഖ്യതിരഞ്ഞെടുപ്പ് ഓഫീസർ സർക്കുലറിൽ അഭ്യർത്ഥിച്ചു.
