സ്ത്രീജീവിതത്തിന്റെ നേർക്കാഴ്ചകളുമായി ഗംഗ യമുന സിന്ധു സരസ്വതി ചിത്രീകരണം ആരംഭിച്ചു

സ്ത്രീജീവിതത്തിന്റെ നേർക്കാഴ്ചകളുമായി 'ഗംഗ യമുന സിന്ധു സരസ്വതി'; കൊച്ചിയിൽ ചിത്രീകരണം ആരംഭിച്ചു

​കൊച്ചി: പെൻ സിനിമസിന്റെ ബാനറിൽ നാല് നവാഗത സംവിധായകർ ഒന്നിക്കുന്ന ആന്തോളജി ചിത്രം ഗംഗ യമുന സിന്ധു സരസ്വതി'യുടെ പൂജ പാലാരിവട്ടം പി.ഒ.സിയിൽ നടന്നു. സാജു നവോദയ, ഷിജു അഞ്ചുമന, പ്രശാന്ത് കാഞ്ഞിരമറ്റം, ലാൽപ്രിയൻ എന്നിവരാണ് ഈ ചിത്രത്തിലെ നാല് വ്യത്യസ്ത കഥകൾ സംവിധാനം ചെയ്യുന്നത്. നടനും നിർമ്മാതാവുമായ ലാൽ ചടങ്ങിന്റെ ഔദ്യോഗിക ഉദ്ഘാടനം നിർവ്വഹിച്ചു.

​സാമൂഹ്യ-ജീവകാരുണ്യ പ്രവർത്തകനായ ടി.ആർ. ദേവൻ, രതീഷ് ഹരിഹരൻ, ബാബു നാപ്പോളി, മാർബൻ റഹിം എന്നിവർ ചേർന്നാണ് ചിത്രം നിർമ്മിക്കുന്നത്. സ്ത്രീജീവിതത്തിന്റെ വിവിധ പരിസരങ്ങളിലൂടെയും അനുഭവങ്ങളിലൂടെയുമാണ് സിനിമ സഞ്ചരിക്കുന്നത്.

​"നമ്മുടെ ചുറ്റുവട്ടത്തെ സ്ത്രീ അനുഭവങ്ങളിലൂടെയാണ് സിനിമ സഞ്ചരിക്കുന്നതെങ്കിലും ഇതൊരു സ്ത്രീപക്ഷ സിനിമ മാത്രമായി ഒതുങ്ങുന്നില്ല. കുടുംബ ജീവിതത്തിലെ എല്ലാത്തരം മുഹൂർത്തങ്ങളും കോർത്തിണക്കിയാണ് ചിത്രം ഒരുങ്ങുന്നത്," എന്ന് സംവിധായകരായ സാജു നവോദയയും ഷിജു അഞ്ചുമനയും പറഞ്ഞു.

​മലയാളത്തിലെ മുൻനിര താരങ്ങൾ അണിനിരക്കുന്ന ചിത്രത്തിന്റെ ഷൂട്ടിംഗ് കൊച്ചിയിലും വട്ടവടയിലുമായി ഉടൻ ആരംഭിക്കും. ചടങ്ങിൽ സംവിധായകൻ ജോണി ആന്റണി, സോഹൻ സീനുലാൽ, കുക്കു പരമേശ്വരൻ, അഭിജ ശിവകല, സാജൻ പള്ളുരുത്തി തുടങ്ങിയ പ്രമുഖർ പങ്കെടുത്തു. ഷാജി പട്ടിക്കരയാണ് പ്രൊഡക്ഷൻ കൺട്രോളർ. പി.ആർ.ഒ: പി.ആർ. സുമേരൻ