ജയ് ഹനുമാന് തുടക്കം ഹനുമാനായി ഋഷഭ് ഷെട്ടി

ഹനുമാനായി ഋഷഭ് ഷെട്ടി; പ്രശാന്ത് വർമ്മയുടെ 'ജയ് ഹനുമാൻ' ഹംപിയിൽ പൂജയോടെ തുടക്കം

​ഹംപി: പാൻ-ഇന്ത്യൻ ബോക്സ് ഓഫീസ് തരംഗമായ 'ഹനുമാന്' ശേഷം പ്രശാന്ത് വർമ്മ ഒരുക്കുന്ന 'ജയ് ഹനുമാൻ' ചിത്രത്തിന് ഔദ്യോഗിക തുടക്കം. ഹനുമാന്റെ ജന്മസ്ഥലമെന്ന് വിശ്വസിക്കപ്പെടുന്ന ഹംപിയിലെ അഞ്ജനാദ്രി ബേട്ടയിൽ നടന്ന പ്രൗഢഗംഭീരമായ പൂജ ചടങ്ങുകളോടെയാണ് ചിത്രത്തിന് തുടക്കമായത്. കാന്താരയിലൂടെ ദേശീയ പുരസ്കാരം നേടിയ ഋഷഭ് ഷെട്ടിയാണ് ചിത്രത്തിൽ ഹനുമാനായി വേഷമിടുന്നത്.

​തെലുങ്കിലെ പ്രമുഖ നിർമ്മാണ കമ്പനിയായ മൈത്രി മൂവി മേക്കേഴ്‌സ് നിർമ്മിക്കുന്ന ചിത്രം ടി-സീരീസ് ആണ് അവതരിപ്പിക്കുന്നത്. പൂജ ചടങ്ങിൽ ടി-സീരീസ് മേധാവി ഭൂഷൺ കുമാർ ക്ലാപ്പ്ബോർഡ് അടിച്ചു. ഹനുമാൻ എന്ന ചിത്രത്തിലെ നായകൻ തേജ സജ്ജ സംവിധാനം ചെയ്ത ആദ്യ ഷോട്ടിന് അനിൽ തടാനി ക്യാമറ ചലിപ്പിച്ചു.

​കലിയുഗത്തിലെ ഹനുമാൻ; ഒരു വമ്പൻ ആക്ഷൻ ദൃശ്യവിരുന്ന്

പ്രശാന്ത് വർമ്മ സിനിമാറ്റിക് യൂണിവേഴ്സിന്റെ (PVCU) ഭാഗമായി ഒരുങ്ങുന്ന ഈ ചിത്രം ഐമാക്സ് ത്രീഡി (IMAX 3D) ഫോർമാറ്റിലാണ് ചിത്രീകരിക്കുന്നത്. ശ്രീരാമ വിഗ്രഹം കൈകളിലേന്തി ഇരിക്കുന്ന ഋഷഭ് ഷെട്ടിയുടെ ഫസ്റ്റ് ലുക്ക് പോസ്റ്റർ നേരത്തെ തന്നെ സോഷ്യൽ മീഡിയയിൽ വൈറലായിരുന്നു. പുരാണ ഗാംഭീര്യവും ആധുനിക സാങ്കേതിക വിദ്യയും ഒത്തുചേരുന്ന ഒരു കലിയുഗ ആക്ഷൻ ഡ്രാമയായാണ് പ്രശാന്ത് വർമ്മ ചിത്രം പ്ലാൻ ചെയ്യുന്നത്.

​ഓസ്കാർ ജേതാവ് എം.എം. കീരവാണിയാണ് ചിത്രത്തിന് സംഗീതം പകരുന്നത്. എസ്. തിരുനാവുക്കരശു ഛായാഗ്രഹണവും ശ്രീനാഗേന്ദ്ര തങ്കാല പ്രൊഡക്ഷൻ ഡിസൈനും നിർവ്വഹിക്കുന്നു. പ്രീ-പ്രൊഡക്ഷൻ ജോലികൾ പൂർത്തിയായ ചിത്രത്തിന്റെ റെഗുലർ ഷൂട്ടിംഗ് ഉടൻ ആരംഭിക്കും.