ദൃശ്യം 3 പുതിയ പോസ്റ്റർ പുറത്തിറങ്ങി ഉദ്വേഗം നിറച്ച് ജോർജുകുട്ടിയുടെ മടങ്ങിവരവ്.
മോഹൻലാൽ ജീത്തു ജോസഫ് കൂട്ടുകെട്ടിൽ ഒരുങ്ങുന്ന ദൃശ്യം 3 സിനിമയുടെ പുതിയ പോസ്റ്റർ പുറത്തിറങ്ങി. പോസ്റ്റ് പ്രൊഡക്ഷൻ ജോലികൾ പുരോഗമിക്കുന്നു
Vazhoor Jose 
ജോർജുകുട്ടി തിരിച്ചെത്തുന്നു; ഉദ്വേഗം നിറച്ച് 'ദൃശ്യം 3' ഫസ്റ്റ് ലുക്ക് പോസ്റ്റർ പുറത്തിറങ്ങി
കൊച്ചി: മലയാള സിനിമയും കടന്ന് ആഗോളതലത്തിൽ തരംഗമായ 'ദൃശ്യം' സീരീസിലെ മൂന്നാം ഭാഗത്തിന്റെ പുതിയ പോസ്റ്റർ പുറത്തിറങ്ങി. പ്രേക്ഷകർ നെഞ്ചിലേറ്റിയ ജോർജുകുട്ടിയുടെ പരിചിതമായ ലുക്കിലാണ് താരം പോസ്റ്ററിൽ പ്രത്യക്ഷപ്പെടുന്നത്. വീട്ടുപടിക്കൽ വാഴകൾക്കിടയിൽ ഉത്കണ്ഠ നിറഞ്ഞ മുഖത്തോടെ നിൽക്കുന്ന ജോർജുകുട്ടിയാണ് പോസ്റ്ററിലെ പ്രധാന ആകർഷണം.
സാധാരണക്കാരന്റെ വേഷത്തിൽ, എന്നാൽ ഉള്ളിൽ വലിയൊരു രഹസ്യം ഒളിപ്പിച്ചുവെച്ചിരിക്കുന്നു എന്ന് തോന്നിപ്പിക്കുന്ന ഗഹനമായ മുഖഭാവമാണ് മോഹൻലാലിന്റേത്. ജീത്തു ജോസഫ് രചനയും സംവിധാനവും നിർവഹിക്കുന്ന ചിത്രം ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് നിർമ്മിക്കുന്നത്.
ചിത്രത്തിന്റെ ഷൂട്ടിംഗ് പൂർത്തിയായതായും നിലവിൽ പോസ്റ്റ് പ്രൊഡക്ഷൻ ജോലികൾ പുരോഗമിക്കുകയാണെന്നും അണിയറപ്രവർത്തകർ അറിയിച്ചു. ഇന്ത്യൻ സിനിമയിൽ തന്നെ ആദ്യമായാണ് ഒരേസമയം വിവിധ ഭാഷകളിൽ റീമേക്ക് ചെയ്യപ്പെടുകയും വൻ വിജയം നേടുകയും ചെയ്ത ഒരു സിനിമയ്ക്ക് മൂന്നാം ഭാഗം വരുന്നത്. അതുകൊണ്ടുതന്നെ അന്താരാഷ്ട്ര തലത്തിൽ പോലും സിനിമ വലിയ ചർച്ചയായിട്ടുണ്ട്. ജോർജുകുട്ടിയും കുടുംബവും ഇത്തവണ എന്ത് അത്ഭുതമാണ് ഒളിപ്പിച്ചു വെച്ചിരിക്കുന്നത് എന്നറിയാനുള്ള കാത്തിരിപ്പിലാണ് ആരാധകർ.
