സഞ്ചരിക്കുന്ന റേഷൻ കട പദ്ധതി വിപുലീകരിക്കും മന്ത്രി അനൂപ് ജേക്കബ്
യാത്രാസൗകര്യം കുറഞ്ഞ മേഖലകളിൽ റേഷൻ ധാന്യങ്ങൾ നേരിട്ടെത്തിക്കുന്ന സഞ്ചരിക്കുന്ന റേഷൻ കട പദ്ധതി വിപുലീകരിക്കുമെന്ന് മന്ത്രി അനൂപ് ജേക്കബ്. കുട്ടമ്പുഴ പഞ്ചായത്തിലെ താളുകണ്ടം ഉന്നതിയിൽ പദ്ധതി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
അനില എം കൃഷ്ണൻ 
സഞ്ചരിക്കുന്ന റേഷൻ കട പദ്ധതി കൂടുതൽ വിപുലീകരിക്കും: മന്ത്രി അനൂപ് ജേക്കബ്
കോതമംഗലം: യാത്രാസൗകര്യം പരിമിതമായ പ്രദേശങ്ങളിൽ റേഷൻ സാധനങ്ങൾ നേരിട്ടെത്തിക്കുന്ന 'സഞ്ചരിക്കുന്ന റേഷൻ കട' പദ്ധതി കൂടുതൽ വിപുലീകരിക്കുമെന്ന് ഭക്ഷ്യ-പൊതുവിതരണ വകുപ്പ് മന്ത്രി അനൂപ് ജേക്കബ് പറഞ്ഞു. സർക്കാരിന്റെ നൂറുദിന കർമ്മപദ്ധതിയിൽ ഉൾപ്പെടുത്തി കുട്ടമ്പുഴ പഞ്ചായത്തിലെ താളുകണ്ടം ഉന്നതിയിൽ സഞ്ചരിക്കുന്ന റേഷൻ കടയുടെ ഉദ്ഘാടനവും ഫ്ലാഗ് ഓഫും നിർവഹിച്ചു സംസാരിക്കുകയായിരുന്നു അദ്ദേഹം.
സമൂഹത്തിൽ പിന്നാക്കം നിൽക്കുന്ന ഗോത്രവർഗ വിഭാഗങ്ങൾക്ക് ഉന്നതികളിൽ കൃത്യസമയത്ത് ഭക്ഷ്യധാന്യങ്ങൾ എത്തിച്ചുനൽകുകയാണ് പദ്ധതിയുടെ പ്രധാന ലക്ഷ്യം. ഓണക്കാലത്തോടനുബന്ധിച്ച് 1.65 ലക്ഷം മെട്രിക് ടൺ അരി വിതരണം ചെയ്യാൻ പൊതുവിതരണ കേന്ദ്രങ്ങൾ വഴി സാധിച്ചു. അരി വിപണിവില നിയന്ത്രിക്കാൻ സഹായിച്ച ഓപ്പൺ മാർക്കറ്റ് സെയിൽസ് സ്കീം (OMSS) തുടരുന്ന കാര്യം ഓണത്തിനു ശേഷം പരിഗണിക്കുമെന്നും മന്ത്രി അറിയിച്ചു.
സപ്ലൈകോ ഓഗസ്റ്റ് 24 വരെ 302 കോടി രൂപയുടെ റെക്കോർഡ് വിറ്റുവരവ് നേടിയതായും സെപ്റ്റംബർ നാലോടെ വിറ്റുവരവ് 500 കോടി കടക്കുമെന്നാണ് പ്രതീക്ഷയെന്നും അദ്ദേഹം കൂട്ടിച്ചേർത്തു. ഗുണനിലവാരമുള്ള സാധനങ്ങൾ ജനങ്ങളിൽ എത്തിക്കുക എന്നതാണ് സർക്കാരിന്റെ നയം.
വടാട്ടുപാറ മിനി സ്റ്റേഡിയത്തിൽ നടന്ന ചടങ്ങിൽ ഷിബു തെക്കുംപുറം എം.എൽ.എ അധ്യക്ഷത വഹിച്ചു. ഡീൻ കുര്യാക്കോസ് എം.പി മുഖ്യാതിഥിയായിരുന്നു. കുട്ടമ്പുഴ ഗ്രാമപഞ്ചായത്ത് പ്രസിഡന്റ് മേരി കുര്യാക്കോസ്, ജനപ്രതിനിധികൾ, തദ്ദേശ നേതാക്കൾ, ട്രൈബൽ-ഫോറസ്റ്റ് ഉദ്യോഗസ്ഥർ, താളുകണ്ടം ഉന്നതി മൂപ്പൻ സി.കെ. ബാലകൃഷ്ണൻ, ജില്ലാ സപ്ലൈ ഓഫീസർ വി.ആർ. ഷാജി എന്നിവർ പങ്കെടുത്തു
