സെൻസസ് 2027 തിരുവനന്തപുരത്ത് സെൽഫ് എന്യൂമറേഷന് തുടക്കം ജോർജ് ഓണക്കൂർ, ജി. വേണുഗോപാൽ ഉൾപ്പെടെയുള്ളവർ പങ്കാളികളായി
2027 ലെ സെൻസസിന്റെ ഭാഗമായുള്ള സെൽഫ് എന്യൂമറേഷൻ പ്രക്രിയയ്ക്ക് തിരുവനന്തപുരം ജില്ലയിൽ തുടക്കമായി. ജൂൺ 30 വരെ പൊതുജനങ്ങൾക്ക് വെബ്സൈറ്റ് വഴി സ്വയം വിവരങ്ങൾ രേഖപ്പെടുത്താം.
Angel Varghese 
സെൻസസ് 2027: തിരുവനന്തപുരത്ത് സെൽഫ് എന്യൂമറേഷന് തുടക്കം; പ്രമുഖർ പങ്കാളികളായി
തിരുവനന്തപുരം: രാജ്യത്ത് നടക്കാനിരിക്കുന്ന 2027-ലെ സെൻസസ് നടപടികളുടെ ഭാഗമായുള്ള 'സെൽഫ് എന്യൂമറേഷൻ' (സ്വയം വിവരശേഖരണം) പ്രക്രിയയ്ക്ക് തിരുവനന്തപുരം ജില്ലയിൽ തുടക്കമായി. പ്രമുഖ സാഹിത്യകാരൻ ജോർജ് ഓണക്കൂറിന്റെ നാലാഞ്ചിറയിലുള്ള വസതിയിലാണ് ജില്ലയിലെ ഔദ്യോഗിക ഉദ്ഘാടനം നടന്നത്. ജില്ലാ കളക്ടർ അനു കുമാരി, എ.ഡി.എം നിർമൽ കുമാർ. ജി, റവന്യൂ-സെൻസസ് വകുപ്പുകളിലെ ഉദ്യോഗസ്ഥർ എന്നിവരുടെ സാന്നിധ്യത്തിൽ ജോർജ് ഓണക്കൂർ സ്വയം വിവരങ്ങൾ രേഖപ്പെടുത്തി പങ്കാളിയായി. നാടിന്റെ യഥാർത്ഥ വികസനത്തിന് കൃത്യമായ സെൻസസ് അനിവാര്യമാണെന്നും അതിനായി എല്ലാവരും ഈ പ്രക്രിയയിൽ പങ്കാളികളാകണമെന്നും അദ്ദേഹം ആഹ്വാനം ചെയ്തു.
പൊതുജനങ്ങൾക്ക് സ്വന്തം മൊബൈൽ ഫോണിന്റെയോ കമ്പ്യൂട്ടറിന്റെയോ സഹായത്തോടെ സ്വയം വിവരങ്ങൾ ഓൺലൈനായി രേഖപ്പെടുത്താൻ അവസരം നൽകുന്നതാണ് സെൽഫ് എന്യൂമറേഷൻ. ആദ്യദിനത്തിൽ ജില്ലാ കളക്ടർ അനു കുമാരി, പ്രശസ്ത പിന്നണി ഗായകൻ ജി. വേണുഗോപാൽ, ചലച്ചിത്ര താരം പ്രിയങ്ക നായർ എന്നിവരും സെൽഫ് എന്യൂമറേഷൻ വിജയകരമായി പൂർത്തിയാക്കി. വരും ദിവസങ്ങളിൽ ജില്ലയിലെ മുഴുവൻ ജനങ്ങളും ഈ നടപടികൾ പൂർത്തിയാക്കി ഭവനസെൻസസ് വിജയിപ്പിക്കണമെന്ന് ജില്ലാ കളക്ടർ അഭ്യർത്ഥിച്ചു.
ജൂൺ 30 വരെ സമയം; എങ്ങനെ പങ്കെടുക്കാം?
പൊതുജനങ്ങൾക്ക് വിവരങ്ങൾ സ്വയം രേഖപ്പെടുത്താനായി ജൂൺ 30 വരെയാണ് സമയം അനുവദിച്ചിരിക്കുന്നത്. https://se.census.gov.in എന്ന ഔദ്യോഗിക വെബ്സൈറ്റ് വഴിയാണ് സെൽഫ് എന്യൂമറേഷൻ ചെയ്യേണ്ടത്. ആദ്യ ഘട്ട വിവരശേഖരണത്തിൽ ആകെ 34 ചോദ്യങ്ങളാണ് ഉൾപ്പെടുത്തിയിരിക്കുന്നത്.
വെബ്സൈറ്റിൽ രജിസ്ട്രേഷൻ നടപടികൾ പൂർത്തിയാക്കുമ്പോൾ ലഭിക്കുന്ന 11 അക്ക എസ്.ഇ.ഐഡി (SE ID) പൊതുജനങ്ങൾ സുരക്ഷിതമായി സൂക്ഷിച്ചുവെക്കേണ്ടതാണ്. പിന്നീട് സെൻസസ് ഉദ്യോഗസ്ഥർ വീടുകൾ സന്ദർശിക്കുന്ന സമയത്ത് ഈ ഐഡി അവർക്ക് കൈമാറിയാൽ മതിയാകും.
