നാടിന്റെ പുരോഗതിയാണ് പ്രധാനം വികസനത്തിൽ രാഷ്ട്രീയമില്ല മുഖ്യമന്ത്രി
പെരുമ്പാവൂർ മണ്ഡലത്തിലെ പുല്ലുവഴി തായിക്കരച്ചിറ, പാനേക്കാവ് പാലങ്ങൾ മുഖ്യമന്ത്രി പിണറായി വിജയൻ ഉദ്ഘാടനം ചെയ്തു. വികസനത്തിന് രാഷ്ട്രീയമില്ലെന്ന് മുഖ്യമന്ത്രി
അനില എം കൃഷ്ണൻ 
നാടിന്റെ പുരോഗതിയാണ് പ്രധാനം, വികസനത്തിൽ രാഷ്ട്രീയമില്ല: മുഖ്യമന്ത്രി
പെരുമ്പാവൂർ: വികസന കാര്യങ്ങളിൽ രാഷ്ട്രീയം കലർത്താതെ നാടിന്റെ പുരോഗതിക്കാണ് സർക്കാർ മുൻഗണന നൽകുന്നതെന്ന് മുഖ്യമന്ത്രി പിണറായി വിജയൻ. മധ്യകേരളത്തിലെ യാത്രാസൗകര്യങ്ങൾ മെച്ചപ്പെടുത്തുന്നതിന്റെ ഭാഗമായി നിർമ്മിച്ച പുല്ലുവഴി-തായിക്കരച്ചിറ, പാനേക്കാവ് പാലങ്ങളുടെ ഉദ്ഘാടനം ഓൺലൈനായി നിർവഹിച്ചു സംസാരിക്കുകയായിരുന്നു അദ്ദേഹം.
പൊതുമരാമത്ത് വകുപ്പ് മന്ത്രി പി.എ. മുഹമ്മദ് റിയാസ് ചടങ്ങിൽ അദ്ധ്യക്ഷത വഹിച്ചു. പെരുമ്പാവൂർ മണ്ഡലത്തിലെ അടിസ്ഥാന സൗകര്യ വികസനത്തിൽ ഈ രണ്ട് പാലങ്ങളും നിർണ്ണായക പങ്കുവഹിക്കുമെന്ന് ചടങ്ങിൽ ശിലാഫലകം അനാച്ഛാദനം ചെയ്ത എൽദോസ് കുന്നപ്പിള്ളി എം.എൽ.എ പറഞ്ഞു. കഴിഞ്ഞ അഞ്ച് വർഷത്തിനിടെ അഞ്ച് പ്രധാന പാലങ്ങൾ മണ്ഡലത്തിൽ പൂർത്തിയാക്കാൻ കഴിഞ്ഞത് വലിയ നേട്ടമാണെന്നും അദ്ദേഹം കൂട്ടിച്ചേർത്തു.
ജനങ്ങളുടെ ദീർഘകാല സ്വപ്നം
പ്രദേശത്തെ ജനങ്ങളുടെ വർഷങ്ങളായുള്ള കാത്തിരിപ്പിനാണ് ഇതോടെ വിരാമമായത്. പഴയ പാലത്തിലെ അപകടസാധ്യതകൾ ഒഴിവാക്കുന്നതിനായി പുതിയ പാലം വേണമെന്ന ആവശ്യത്തിനാണ് ഇപ്പോൾ പരിഹാരമായിരിക്കുന്നത്. പൊതുമരാമത്ത് വകുപ്പിന്റെ നേരിട്ടുള്ള മേൽനോട്ടത്തിൽ മികച്ച നിലവാരത്തിലാണ് രണ്ട് പാലങ്ങളുടെയും നിർമ്മാണം പൂർത്തിയാക്കിയത്.
കൂവപ്പടി ബ്ലോക്ക് പഞ്ചായത്ത് പ്രസിഡന്റ് പി. വി. സുനിൽ, രായമംഗലം ഗ്രാമ പഞ്ചായത്ത് പ്രസിഡന്റ് ബിന്ദു ഗോപാലകൃഷ്ണൻ, ജില്ലാ പഞ്ചായത്ത് മെമ്പർ മുബാസ് ഓടക്കാലി തുടങ്ങി വിവിധ ജനപ്രതിനിധികളും രാഷ്ട്രീയ പാർട്ടി പ്രതിനിധികളും ഉദ്യോഗസ്ഥരും ചടങ്ങിൽ പങ്കെടുത്തു.
