​വോട്ടർ ബോധവൽക്കരണം കെ.എം.എം കോളജിൽ വാക്കത്തോൺ സംഘടിപ്പിച്ചു

​വോട്ടർ ബോധവൽക്കരണം: തൃക്കാക്കര കെ.എം.എം കോളജിൽ 'വാക്കത്തോണ്‍' സംഘടിപ്പിച്ചു

​കൊച്ചി: വരാനിരിക്കുന്ന തിരഞ്ഞെടുപ്പിൽ ജനപങ്കാളിത്തം ഉറപ്പാക്കുന്നതിനും വോട്ടർമാരെ ബോധവൽക്കരിക്കുന്നതിനുമായി തൃക്കാക്കര കെ.എം.എം കോളജ് ഓഫ് ആർട്സ് ആൻഡ് സയൻസിൽ 'ഇലക്ടറൽ അവയർനസ് വാക്കത്തോൺ' സംഘടിപ്പിച്ചു. കോളജിലെ തിരഞ്ഞെടുപ്പ് സാക്ഷരത ക്ലബ്ബ്, ഐ.ക്യു.എ.സി (IQAC), എൻ.എസ്.എസ് (NSS), എൻ.സി.സി (NCC) എന്നിവയുടെ സംയുക്ത ആഭിമുഖ്യത്തിലാണ് പരിപാടി നടന്നത്.

​സിസ്റ്റമാറ്റിക് വോട്ടേഴ്സ് എഡ്യൂക്കേഷൻ ആൻഡ് ഇലക്ടറൽ പാർട്ടിസിപേഷൻ (SVEEP) ക്യാമ്പയിന്റെ ഭാഗമായി സംഘടിപ്പിച്ച വാക്കത്തോൺ ഇടപ്പള്ളി ടോൾ ജംഗ്ഷനിൽ വെച്ച് അസിസ്റ്റൻറ് കളക്ടർ പാർവതി ഗോപകുമാർ ഫ്ലാഗ് ഓഫ് ചെയ്തു.

​ഇടപ്പള്ളി ടോളിൽ സജ്ജീകരിച്ചിരുന്ന പ്രത്യേക ബൂത്തിൽ വോട്ടർ ബോധവൽക്കരണ സന്ദേശങ്ങൾ പ്രദർശിപ്പിക്കുകയും പൊതുജനങ്ങൾക്ക് ലഘുലേഖകൾ വിതരണം ചെയ്യുകയും ചെയ്തു. വിദ്യാർത്ഥികളും അധ്യാപകരും പൊതുജനങ്ങളും ആവേശത്തോടെ പങ്കെടുത്ത വാക്കത്തോൺ കോളേജ് ക്യാമ്പസിലാണ് സമാപിച്ചത്.

​ചടങ്ങിൽ തഹസിൽദാർ ജോസഫ് ആന്റണി ഹർട്ടിസ്, കെ.എം.എം ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് ചെയർമാൻ എ.എം. അബൂബക്കർ, കോളേജ് പ്രിൻസിപ്പൽ ഡോ. സബാന ബെക്കർ തുടങ്ങിയവർ പങ്കെടുത്തു. ജനാധിപത്യ പ്രക്രിയയിൽ വോട്ടിന്റെ പ്രാധാന്യം വിളിച്ചോതുന്നതായിരുന്നു ഈ ജനകീയ ബോധവൽക്കരണ പരിപാടി.