പര്യത്തുകാവ് നിവാസികൾക്ക് വീടുകളുടെ പ്ലാൻ കൈമാറി ജൂലൈ 16 ന് തറക്കല്ലിടും
എറണാകുളം പര്യത്തുകാവിൽ നിർമ്മിക്കുന്ന പുതിയ വീടുകളുടെ പ്ലാൻ കുന്നത്തുനാട് എം.എൽ.എ വി.പി. സജീന്ദ്രൻ നിവാസികൾക്ക് കൈമാറി. ജൂലൈ 16 ന് തറക്കല്ലിടും.
അനില എം കൃഷ്ണൻ 
പര്യത്തുകാവ് നിവാസികൾക്ക് വീടുകളുടെ പ്ലാൻ കൈമാറി; ജൂലൈ 16-ന് തറക്കല്ലിടും
കൊച്ചി: പര്യത്തുകാവിൽ ഭവനരഹിതർക്കായി നിർമ്മിക്കുന്ന വീടുകളുടെ പ്ലാൻ കൈമാറി. കാക്കനാട് കളക്ടറേറ്റ് ചേംബറിൽ ചേർന്ന പ്രത്യേക യോഗത്തിൽ കുന്നത്തുനാട് എം.എൽ.എ. വി.പി. സജീന്ദ്രനാണ് പര്യത്തുകാവ് നിവാസികൾക്ക് പ്ലാനുകൾ കൈമാറിയത്. പദ്ധതിയുടെ ഭാഗമായി നിർമ്മിക്കുന്ന വീടുകളുടെ തറക്കല്ലിടൽ കർമ്മം ജൂലൈ 16-ന് നിർവഹിക്കാനാണ് ജില്ലാ ഭരണകൂടം ലക്ഷ്യമിടുന്നത്.
എല്ലാ ആധുനിക സൗകര്യങ്ങളോടും കൂടിയ 1000 ചതുരശ്ര അടി വിസ്തീർണമുള്ള വീടുകളാണ് പര്യത്തുകാവിൽ ഉയരുക. ഗുണഭോക്താക്കൾക്കായി മൂന്ന് വ്യത്യസ്ത സ്കെച്ചുകളാണ് അധികൃതർ തയ്യാറാക്കിയിരിക്കുന്നത്. മൂന്ന് കിടപ്പുമുറികൾ, ഡൈനിങ് ഹാൾ, സ്വീകരണമുറി (ലിവിങ് റൂം), സിറ്റൗട്ട്, അടുക്കള എന്നിവ ഉൾപ്പെടുന്നതാണ് എല്ലാ പ്ലാനുകളും. ഈ മൂന്ന് പ്ലാനുകളിൽ നിന്നും നിവാസികൾക്ക് അനുയോജ്യമായത് തിരഞ്ഞെടുക്കാം. വരുന്ന തിങ്കളാഴ്ചയോടെ (ജൂലൈ 6) പ്ലാനുകൾക്ക് അന്തിമ അംഗീകാരം നൽകാനാണ് നിലവിലെ തീരുമാനം.
കളക്ടറുടെ ചേംബറിൽ നടന്ന ചടങ്ങിൽ ജില്ലാ കളക്ടർ ജി. പ്രിയങ്ക, അഡീഷണൽ ജില്ലാ മജിസ്ട്രേറ്റ് കെ. മനോജ്, മൂവാറ്റുപുഴ ആർ.ഡി.ഒ. വി.ഇ. അബ്ബാസ്, വാഴക്കുളം വില്ലേജ് ഓഫീസർ മുഹമ്മദ് സിദ്ദിഖ്, കുന്നത്തുനാട് തഹസിൽദാർ എം. മായ തുടങ്ങിയ പ്രമുഖ ഉദ്യോഗസ്ഥരും പങ്കെടുത്തു. വീടുകളുടെ നിർമ്മാണം സമയബന്ധിതമായി പൂർത്തിയാക്കാനാണ് ജില്ലാ ഭരണകൂടത്തിന്റെ തീരുമാനം.
