​71 ാമത് നെഹ്‌റു ട്രോഫി ജലമേള വൻ വിജയം ഒരു കോടിയിലധികം രൂപയുടെ ലാഭവുമായി സൊസൈറ്റി

നെഹ്‌റു ട്രോഫി ജലമേള വിജയകരം: 1.02 കോടി രൂപ നീക്കിയിരുപ്പ്; സ്പോൺസർഷിപ്പിലൂടെ ലഭിച്ചത് 2.40 കോടി

​ആലപ്പുഴ: എഴുപത്തിയൊന്നാമത് നെഹ്‌റു ട്രോഫി ജലമേള വൻ വിജയകരമായി പൂർത്തിയായതായി ഔദ്യോഗിക പ്രഖ്യാപനം. ജലമേളയുടെ നടത്തിപ്പിലൂടെ 1,02,27,433 രൂപ (1.02 കോടി) നീക്കിയിരുപ്പ് ലഭിച്ചതായി ധനകാര്യ റിപ്പോർട്ടുകൾ വ്യക്തമാക്കുന്നു. നെഹ്‌റു ട്രോഫി ബോട്ട് റേസ് സൊസൈറ്റി (NTBRS) ചെയർമാനും ജില്ലാ കളക്ടറുമായ ഷാജി വി. നായരുടെ അധ്യക്ഷതയിൽ കളക്ടറേറ്റ് കോൺഫറൻസ് ഹാളിൽ ചേർന്ന എക്സിക്യൂട്ടീവ് യോഗത്തിലാണ് ജലമേളയുടെ വരവ്-ചെലവ് കണക്കുകൾക്ക് അന്തിമ അംഗീകാരം നൽകിയത്.

​കഴിഞ്ഞ വർഷത്തെ നെഹ്‌റു ട്രോഫി ബോട്ട് റേസ് കമ്മിറ്റി മികച്ച രീതിയിലാണ് പ്രവർത്തിച്ചതെന്നും ജനപങ്കാളിത്തം കൊണ്ടും സംഘാടക മികവുകൊണ്ടും ജലമേള ചരിത്ര വിജയമാക്കാൻ സാധിച്ചുവെന്നും ജില്ലാ കളക്ടർ ആമുഖഭാഷണത്തിൽ ചൂണ്ടിക്കാട്ടി. യോഗത്തിൽ കുട്ടനാട് എം.എൽ.എ റെജി ചെറിയാൻ ഉൾപ്പെടെയുള്ള പ്രമുഖർ സന്നിഹിതരായിരുന്നു. ഡെപ്യൂട്ടി കളക്ടർ പി.എൻ. അനി യോഗത്തിൽ വിശദമായ വരവ് ചെലവ് കണക്കുകൾ അവതരിപ്പിച്ചു. ഇന്റേണൽ ഓഡിറ്റ് കമ്മിറ്റിക്ക് വേണ്ടി എ.എൻ. പുരം ശിവകുമാർ ഓഡിറ്റ് പരിശോധനയുടെ അടിസ്ഥാനത്തിലുള്ള കണ്ടെത്തലുകളും നിർദ്ദേശങ്ങളും യോഗത്തിന് മുന്നിൽ സമർപ്പിച്ചു.

​ആകെ 4,44,90,938.92 രൂപയാണ് ജലമേളയുടെ ഭാഗമായി സമാഹരിച്ച ആകെ വരവ്. ഇതിൽ ഏറ്റവും പ്രധാന വരുമാന സ്രോതസ്സായത് സ്പോൺസർഷിപ്പുകളാണ്. വിവിധ സ്ഥാപനങ്ങളിൽ നിന്നും പങ്കാളികളിൽ നിന്നുമായി 2,40,07,502 രൂപ സ്പോൺസർഷിപ്പ് ഇനത്തിൽ മാത്രം ലഭിച്ചു. ഗാലറി-പവലിയൻ ടിക്കറ്റ് വിൽപ്പനയിലൂടെ 89,98,510 രൂപ സമാഹരിക്കാൻ കഴിഞ്ഞു. സംസ്ഥാന ടൂറിസം വകുപ്പിന്റെ ഗ്രാന്റായി ഒരു കോടി രൂപയും ജലമേളയ്ക്ക് ലഭിച്ചിട്ടുണ്ട്. ഇതിന് പുറമെ ബാങ്ക് പലിശ ഇനത്തിൽ 4,52,926 രൂപയും, ബോട്ട് ആങ്കറിങ് ചാർജ് ഇനത്തിൽ 9,60,000 രൂപയും, വള്ളങ്ങളുടെ രജിസ്ട്രേഷൻ ഫീസായി 72,000 രൂപയും ലഭിച്ചതായി കണക്കുകൾ വ്യക്തമാക്കുന്നു.

​ജലമേളയുടെ സുഗമമായ നടത്തിപ്പിനായി വലിയ തുകയാണ് വള്ളങ്ങൾക്കും അടിസ്ഥാന സൗകര്യങ്ങൾക്കുമായി ചെലവഴിച്ചത്. പങ്കെടുത്ത വള്ളങ്ങൾക്ക് ബോണസ് ഇനത്തിൽ മാത്രം 1,46,74,250 രൂപ നൽകി. മെയിന്റനൻസ് ഗ്രാന്റായി 15,96,000 രൂപയും വിതരണം ചെയ്തു. 2024, 2025 വർഷങ്ങളിലെ ഇൻഫ്രാസ്ട്രക്ചർ കമ്മിറ്റികളുടെ പ്രവർത്തനങ്ങൾക്കായി 68,59,064 രൂപയാണ് ചിലവായത്. വിജയികൾക്കുള്ള പ്രൈസ് മണിക്കും മെമന്റോകൾക്കുമായി 8,09,920 രൂപ മാറ്റിവെച്ചു. വരും വർഷങ്ങളിൽ വള്ളങ്ങൾക്കുള്ള ബോണസ് തുകയിൽ 10 ശതമാനം വർധനവ് വരുത്താനുള്ള സുപ്രധാന തീരുമാനത്തിന് അടുത്ത കമ്മിറ്റിയോട് ശുപാർശ ചെയ്യാൻ യോഗം തീരുമാനിച്ചിട്ടുണ്ട്.

​പുതിയ നെഹ്‌റു ട്രോഫി ബോട്ട് റേസ് കമ്മിറ്റി രൂപീകരണത്തിനായുള്ള പ്രാരംഭ നടപടികൾ ഇന്ന് മുതൽ ആരംഭിക്കുമെന്ന് കളക്ടർ അറിയിച്ചു. ജൂൺ 22-ഓടെ പുതിയ ഔദ്യോഗിക കമ്മിറ്റി പൂർണ്ണ സജ്ജമായി നിലവിൽ വരുമെന്ന് അദ്ദേഹം വ്യക്തമാക്കി.

​നഗരസഭ അധ്യക്ഷ മോളി ജേക്കബ്, മുൻ എം.എൽ.എ അഡ്വ. എ.എ. ഷുക്കൂർ, എ.ഡി.എം ബി. ജ്യോതി, ഇറിഗേഷൻ എക്സിക്യൂട്ടീവ് എഞ്ചിനീയർ വിനോദ് കുമാർ, ആർ.കെ. കുറുപ്പ്, വിവിധ വകുപ്പുകളിലെ ഉദ്യോഗസ്ഥർ, എക്സിക്യൂട്ടീവ് കമ്മിറ്റി അംഗങ്ങൾ തുടങ്ങിയവർ അവലോകന യോഗത്തിൽ പങ്കെടുത്തു.