ഓണം ഘോഷയാത്ര കൂടുതൽ ആകർഷകമാക്കും പി.സി. വിഷ്ണുനാഥ്
ഓഗസ്റ്റ് 30 ന് തിരുവനന്തപുരത്ത് നടക്കുന്ന ഓണം വാരാഘോഷ ഘോഷയാത്ര മുൻവർഷങ്ങളേക്കാൾ ആകർഷകമാക്കും. പുതുയുഗ കേരളം ആശയത്തിൽ ഹരിതചട്ടം പാലിച്ച് ഫ്ലോട്ടുകൾ ഒരുക്കുമെന്ന് മന്ത്രി പി.സി. വിഷ്ണുനാഥ്.
അനില എം കൃഷ്ണൻ 
ഓണം വാരാഘോഷം: ഇത്തവണത്തെ ഘോഷയാത്ര കൂടുതൽ ആകർഷകമാക്കും; ‘പുതുയുഗ കേരളം’ ആശയത്തിൽ ഫ്ലോട്ടുകൾ
തിരുവനന്തപുരം: ഓണം വാരാഘോഷത്തോടനുബന്ധിച്ച് ഓഗസ്റ്റ് 30-ന് തിരുവനന്തപുരത്ത് സംഘടിപ്പിക്കുന്ന വർണാഭമായ ഘോഷയാത്ര മുൻകാലങ്ങളേക്കാൾ ആകർഷകമാക്കുമെന്ന് സാംസ്കാരികം-ടൂറിസം വകുപ്പ് മന്ത്രി പി. സി. വിഷ്ണുനാഥ് അറിയിച്ചു. തൈക്കാട് ഗസ്റ്റ് ഹൗസിൽ ചേർന്ന ഘോഷയാത്ര കമ്മിറ്റിയുടെ പ്രഥമയോഗത്തിൽ സംസാരിക്കുകയായിരുന്നു അദ്ദേഹം.
'പുതുയുഗ കേരളം' എന്ന ആശയത്തെ മുൻനിർത്തിയായിരിക്കും ഇത്തവണത്തെ പരിപാടികൾ ആസൂത്രണം ചെയ്യുന്നത്. സർക്കാർ വകുപ്പുകൾ തയ്യാറാക്കുന്ന ഫ്ലോട്ടുകൾ പൂർണ്ണമായും ഹരിതചട്ടം (Green Protocol) പാലിച്ചുകൊണ്ടുള്ളതായിരിക്കണം. ഘോഷയാത്രയെ കൂടുതൽ മനോഹരമാക്കാൻ നൂതനമായ ആശയങ്ങൾ എല്ലാ വകുപ്പുകളിൽ നിന്നും അടിയന്തരമായി സമർപ്പിക്കണമെന്നും മന്ത്രി നിർദ്ദേശിച്ചു.
പ്രധാനപ്പെട്ട സർക്കാർ വകുപ്പുകളുടെ ഏകോപനത്തോടെയാണ് പരിപാടികൾ സംഘടിപ്പിക്കുന്നത്. ഘോഷയാത്രയ്ക്ക് തടസ്സങ്ങൾ ഒഴിവാക്കാനും സുഗമമായ നടത്തിപ്പിനും ആവശ്യമായ ക്രമീകരണങ്ങൾ ചെയ്യാൻ കെ.എസ്.ഇ.ബി, ഫയർഫോഴ്സ് എന്നിവയ്ക്ക് മന്ത്രി നിർദ്ദേശം നൽകി. കേന്ദ്രസർക്കാർ വകുപ്പുകളുടെയും സായുധ സേനകളുടെയും പങ്കാളിത്തം ഇത്തവണത്തെ ആഘോഷത്തിന് മാറ്റുകൂട്ടുമെന്നും അദ്ദേഹം പറഞ്ഞു.
ഘോഷയാത്ര കമ്മിറ്റി ചെയർമാൻ എൻ. ശക്തൻ എം.എൽ.എ, ടൂറിസം വകുപ്പ് സെക്രട്ടറി കെ. ബിജു, അഡീഷണൽ ഡയറക്ടർ ശ്രീധന്യ സുരേഷ്, വിവിധ സർക്കാർ വകുപ്പുകളിലെ ഉദ്യോഗസ്ഥർ, ആർമി, നേവി, കോസ്റ്റ് ഗാർഡ് പ്രതിനിധികൾ എന്നിവർ യോഗത്തിൽ സംബന്ധിച്ചു.
