ദുബായ് വിമാനങ്ങൾ ഇന്ത്യയിലേക്ക് മടക്കി വ്യോമപാത അടച്ചു
പശ്ചിമേഷ്യൻ സംഘർഷത്തെത്തുടർന്ന് വ്യോമാതിർത്തി അടച്ചതോടെ ഇന്ത്യയിൽ നിന്ന് ദുബായിലേക്ക് പുറപ്പെട്ട എമിറേറ്റ്സ് വിമാനങ്ങൾ തിരിച്ചിറക്കി. 13,000 സർവീസുകൾ റദ്ദാക്കി.
Angel Varghese 
ന്യൂഡൽഹി/ദുബായ്: പശ്ചിമേഷ്യയിൽ ഇസ്രായേലും ഇറാനും തമ്മിലുള്ള സൈനിക സംഘർഷം രൂക്ഷമായതോടെ ഗൾഫ് മേഖലയിലെ വ്യോമഗതാഗതം താറുമാറായി. സുരക്ഷാ മുൻകരുതലിന്റെ ഭാഗമായി വ്യോമാതിർത്തി അടച്ചതോടെ ഇന്ത്യയിൽ നിന്ന് ദുബായിലേക്ക് തിരിച്ച എമിറേറ്റ്സ് വിമാനങ്ങൾ ലാൻഡിംഗ് നടത്താനാകാതെ ഇന്ത്യയിലേക്ക് തന്നെ മടങ്ങി.
തിങ്കളാഴ്ച വൈകിട്ട് ഡൽഹി, ചെന്നൈ, ബെംഗളൂരു എന്നിവിടങ്ങളിൽ നിന്ന് പറന്നുയർന്ന വിമാനങ്ങളാണ് എയർ ട്രാഫിക് കൺട്രോൾ (ATC) നിർദ്ദേശത്തെത്തുടർന്ന് തിരിച്ചിറക്കിയത്. ഈ വിമാനങ്ങളിലെ യാത്രക്കാരെ നിലവിൽ വിവിധ ഹോട്ടലുകളിൽ താമസിപ്പിച്ചിരിക്കുകയാണ്. സാഹചര്യം അനുകൂലമായാലുടൻ യാത്ര പുനഃക്രമീകരിക്കുമെന്ന് എമിറേറ്റ്സ് വക്താവ് അറിയിച്ചു.
നിയന്ത്രണങ്ങൾ തുടരുന്നു
മേഖലയിലെ യുദ്ധസാഹചര്യം കണക്കിലെടുത്ത് യുഎഇ വ്യോമാതിർത്തിയിൽ വാണിജ്യ വിമാനങ്ങൾക്ക് ചൊവ്വാഴ്ചയും നിയന്ത്രണം തുടരുകയാണ്. നിലവിൽ യുഎഇയിൽ കുടുങ്ങിക്കിടക്കുന്ന പ്രവാസികളെയും വിനോദസഞ്ചാരികളെയും തിരികെ എത്തിക്കുന്നതിനുള്ള പ്രത്യേക വിമാനങ്ങൾക്ക് മാത്രമാണ് മുൻഗണന. എമിറേറ്റ്സ്, ഇത്തിഹാദ്, ഫ്ലൈ ദുബായ്, എയർ അറേബ്യ എന്നിവ ഏഷ്യൻ, യൂറോപ്യൻ രാജ്യങ്ങളിലേക്ക് പരിമിതമായ തോതിൽ സർവീസ് നടത്തുന്നുണ്ട്. ചൊവ്വാഴ്ച ഉച്ചയ്ക്ക് ഷാർജയിൽ നിന്ന് കൊച്ചിയിലേക്ക് എയർ അറേബ്യ വിമാനം (G9426) സർവീസ് നടത്തിയതായി ഫ്ലൈറ്റ്റഡാർ വിവരങ്ങൾ വ്യക്തമാക്കുന്നു.
13,000 സർവീസുകൾ റദ്ദാക്കി
അമേരിക്ക, ഇസ്രയേൽ, ഇറാൻ രാജ്യങ്ങൾ ഉൾപ്പെട്ട സൈനിക നീക്കങ്ങൾ ഗൾഫ് മേഖലയിലെ വിമാന സർവീസുകളെ വലിയ തോതിൽ ബാധിച്ചു. ഇതുവരെ ഏകദേശം 13,000 സർവീസുകളാണ് റദ്ദാക്കപ്പെട്ടത്. യാത്രക്കാരുടെ സുരക്ഷയ്ക്കാണ് തങ്ങൾ മുൻഗണന നൽകുന്നതെന്നും നേരിട്ട ബുദ്ധിമുട്ടുകളിൽ ഖേദിക്കുന്നതായും എമിറേറ്റ്സ് എയർലൈൻ അറിയിച്ചു. വിമാനങ്ങൾ പുനഃക്രമീകരിക്കുന്നതുമായി ബന്ധപ്പെട്ട ഔദ്യോഗിക വിവരങ്ങൾക്കായി യാത്രക്കാർ എയർലൈൻ വെബ്സൈറ്റോ അധികൃതരേയോ ബന്ധപ്പെടണം.
