ചൂരൽമല, മുണ്ടക്കൈ ദുരന്തബാധിതർക്കുള്ള ഉപജീവന ബത്ത മൂന്ന് മാസത്തേക്ക് കൂടി നീട്ടി ടൗൺഷിപ്പ് നിർമ്മാണം വേഗത്തിലാക്കാൻ കർശന നിർദ്ദേശം
ചൂരൽമല, മുണ്ടക്കൈ ഉരുൾപൊട്ടൽ ദുരന്തബാധിതരുടെ ഉപജീവന ബത്ത മൂന്ന് മാസത്തേക്ക് കൂടി നീട്ടാൻ കലക്ടറേറ്റിൽ ചേർന്ന അവലോകന യോഗം തീരുമാനിച്ചു. ടൗൺഷിപ്പ് നിർമ്മാണത്തിലെ തൊഴിലാളി ക്ഷാമം പരിഹരിക്കാനും നിർമ്മാണം വേഗത്തിലാക്കാനും ഊരാളുങ്കലിന് കർശന നിർദ്ദേശം നൽകി.
Angel Varghese 
ചൂരൽമല, മുണ്ടക്കൈ ദുരന്തബാധിതർക്കുള്ള ഉപജീവന ബത്ത മൂന്ന് മാസത്തേക്ക് കൂടി നീട്ടി; ടൗൺഷിപ്പ് നിർമ്മാണം വേഗത്തിലാക്കാൻ നിർദ്ദേശം
കൽപ്പറ്റ: ചൂരല്മല, മുണ്ടക്കൈ ഉരുള്പൊട്ടല് ദുരന്തബാധിതര്ക്ക് ആശ്വാസമായി ഉപജീവന ബത്ത മൂന്ന് മാസത്തേക്ക് കൂടി നീട്ടാൻ തീരുമാനം. നിലവില് സ്വന്തമായി വരുമാനമാര്ഗ്ഗം കണ്ടെത്താന് സാധിക്കാത്ത സാഹചര്യം കണക്കിലെടുത്താണ് നിലവിലുള്ള നിരക്കിൽ തന്നെ ധനസഹായം തുടരാൻ തീരുമാനിച്ചത്. കൃഷി വകുപ്പ് മന്ത്രി ടി. സിദ്ദിഖ്, തദ്ദേശ സ്വയംഭരണ വകുപ്പ് മന്ത്രി കെ.എം. ഷാജി എന്നിവരുടെ നേതൃത്വത്തില് വയനാട് കലക്ടറേറ്റിൽ ചേര്ന്ന പുനരധിവാസ അവലോകന യോഗത്തിലാണ് ഈ പ്രഖ്യാപനം. പുനരധിവാസ പ്രവർത്തനങ്ങളുടെ പുരോഗതി വിലയിരുത്താൻ റവന്യൂ മന്ത്രിയുമായുള്ള പ്രത്യേക യോഗം അടുത്ത മാസം ഒന്നാം തീയതി നടക്കും.
ടൗൺഷിപ്പ് നിർമ്മാണത്തിൽ തൊഴിലാളി ക്ഷാമം; ഊരാളുങ്കലിന് കർശന നിർദ്ദേശം
ടൗൺഷിപ്പിന്റെ നിര്മ്മാണ പ്രവര്ത്തനങ്ങള്ക്ക് നിലവിലെ തൊഴിലാളികളുടെ കുറവ് വലിയ പ്രതിസന്ധി സൃഷ്ടിക്കുന്നതായി യോഗം വിലയിരുത്തി. മുന്പ് 2300ലധികം തൊഴിലാളികള് ജോലി ചെയ്തിരുന്ന സ്ഥാനത്ത് നിലവില് തൊള്ളായിരത്തോളം പേര് മാത്രമാണ് ഉള്ളത്. കൂടുതൽ തൊഴിലാളികളെ എത്തിച്ച് നിർമ്മാണ പ്രവർത്തനങ്ങൾ യുദ്ധകാലാടിസ്ഥാനത്തിൽ വേഗത്തിലാക്കാൻ കരാർ കമ്പനിയായ ഊരാളുങ്കലിന് (ULCCS) മന്ത്രിമാർ കര്ശന നിര്ദ്ദേശം നല്കി. കൂടാതെ, വരാനിരിക്കുന്ന മഴക്കാലത്ത് ടൗണ്ഷിപ്പ് പ്രദേശങ്ങളിൽ വെള്ളത്തിന്റെ ഒഴുക്ക് സുഗമമാക്കാന് അടിയന്തര സുരക്ഷാ സൗകര്യങ്ങൾ ഒരുക്കാനും നിർദ്ദേശിച്ചിട്ടുണ്ട്.
ഗോത്രവർഗ കുടുംബങ്ങളുടെ താല്പര്യപ്രകാരം ഡിസൈൻ മാറ്റും
ദുരന്തത്തിലകപ്പെട്ട 13 ഗോത്രവർഗ കുടുംബങ്ങളുടെ പുനരധിവാസത്തിനായി ടൗണ്ഷിപ്പ് മാതൃകയിലുള്ള വീടുകള് നിര്മ്മിച്ച് നല്കാനായിരുന്നു സര്ക്കാരിന്റെ ആദ്യ തീരുമാനം. എന്നാൽ, ആദിവാസി ഗോത്ര സമൂഹം ആവശ്യപ്പെടുന്നതും അവരുടെ താല്പര്യങ്ങൾക്കനുസരിച്ചുള്ളതുമായ പ്രത്യേക ഡിസൈനിലേക്ക് നിർമ്മാണം മാറ്റാൻ യോഗത്തിൽ ധാരണയായി.
പുനരധിവാസത്തിന് ടൈംബൗണ്ട് മിഷൻ
പുനരധിവാസ പ്രവര്ത്തനങ്ങൾ സമയബന്ധിതമായി പൂർത്തിയാക്കുന്നതിനായി ഒരു പ്രത്യേക 'ടൈംബൗണ്ട് മിഷൻ' (Time-bound Mission) രൂപീകരിക്കാൻ ജില്ലാ കളക്ടർക്ക് മന്ത്രിമാർ നിർദ്ദേശം നൽകി. സാസ്കി (SASKI) പദ്ധതിയുടെ മുഴുവന് പ്രോജക്ടുകളും പ്രത്യേകം അവലോകനം ചെയ്യാന് ജില്ലാ കളക്ടറെ ചുമതലപ്പെടുത്തിയിട്ടുണ്ട്.
പുന്നപ്പുഴ വൃത്തിയാക്കുന്നതുമായി ബന്ധപ്പെട്ട നടപടികള് വേഗത്തിലാക്കാനും യോഗത്തിൽ പ്രത്യേക നിർദ്ദേശമുണ്ടായി. ദുരന്തബാധിതർക്കുള്ള സാമ്പത്തിക സഹായ നടപടികളുടെ തൽസ്ഥിതി, പുന്നപ്പുഴയുടെ ഒഴുക്ക് സുഗമമാക്കൽ, കുടുംബശ്രീ മുഖേന നടപ്പിലാക്കുന്ന മൈക്രോ പ്ലാൻ, കൃഷി, മൃഗസംരക്ഷണം, ആരോഗ്യം ഉൾപ്പെടെയുള്ള വിവിധ വകുപ്പുകളുടെ പ്രവർത്തന പുരോഗതിയും യോഗം വിലയിരുത്തി.
കളക്ടറേറ്റ് മിനി കോണ്ഫറന്സ് ഹാളില് ചേര്ന്ന യോഗത്തില് ജില്ലാ പഞ്ചായത്ത് പ്രസിഡന്റ് ചന്ദ്രിക കൃഷ്ണന്, ജില്ലാ കളക്ടര് ഡി.ആർ. മേഘശ്രീ, വിവിധ വകുപ്പ് ഉദ്യോഗസ്ഥര്, ഊരാളുങ്കൽ- നിർമിതി കേന്ദ്ര പ്രതിനിധികൾ തുടങ്ങിയവര് പങ്കെടുത്തു.
