വിദ്യാർത്ഥികളുടെ ബസ് കൺസഷൻ ഇനി ഡിജിറ്റൽ വ്യാജന്മാരെ പിടിക്കാൻ QR കോഡ് സംവിധാനം, പുതിയ നിർദ്ദേശങ്ങളുമായി മോട്ടോർ വാഹന വകുപ്പ്
കേരളത്തിൽ വിദ്യാർത്ഥികളുടെ ബസ് കൺസഷൻ കാർഡുകൾ ഇനി ഡിജിറ്റലാകുന്നു. MVD Leads വഴി അപേക്ഷിക്കാം. ദുരുപയോഗം തടയാൻ ക്യുആർ കോഡ് സംവിധാനവും പുതിയ മാനദണ്ഡങ്ങളും നിലവിൽ വന്നു.
Angel Varghese 
വിദ്യാർത്ഥികളുടെ ബസ് കൺസഷൻ കാർഡ് ഇനി ഡിജിറ്റൽ; ദുരുപയോഗം തടയാൻ ക്യു.ആർ കോഡ് സംവിധാനം
കണ്ണൂർ: സംസ്ഥാനത്തെ വിദ്യാർത്ഥികളുടെ സ്വകാര്യ-കെ.എസ്.ആർ.ടി.സി ബസ് യാത്രാ കൺസഷൻ കാർഡുകൾ ഈ അധ്യയന വർഷം മുതൽ പൂർണ്ണമായും ഡിജിറ്റൽ രൂപത്തിലേക്ക് മാറുന്നു. സർക്കാർ, എയ്ഡഡ്, സ്വയംഭരണ സ്ഥാപനങ്ങൾ, സ്വകാര്യ-സമാന്തര കോളേജുകൾ ഉൾപ്പെടെയുള്ള എല്ലാ വിദ്യാഭ്യാസ സ്ഥാപനങ്ങളിലെയും വിദ്യാർത്ഥികൾക്ക് പുതിയ ഡിജിറ്റൽ കാർഡ് നിർബന്ധമാക്കി. കൺസഷൻ കാർഡുകളുടെ ദുരുപയോഗം തടയുന്നതിനായി പ്രത്യേക ക്യു.ആർ കോഡ് (QR Code) സംവിധാനത്തോടെയാണ് പുതിയ കാർഡുകൾ പുറത്തിറക്കുന്നത്.
ജില്ലാ കളക്ടർ പി. വിഷ്ണുരാജിന്റെ അധ്യക്ഷതയിൽ ചേർന്ന സ്റ്റുഡന്റ്സ് ട്രാവൽ ഫെസിലിറ്റി കമ്മിറ്റി യോഗത്തിൽ ആർ.ടി.ഒ ഉണ്ണികൃഷ്ണൻ ഇ. എസ് പുതിയ പദ്ധതിയുടെ വിശദാംശങ്ങൾ വ്യക്തമാക്കിയത്.
അപേക്ഷിക്കേണ്ടത് എങ്ങനെ?
പുതിയ സംവിധാനമനുസരിച്ച് വിദ്യാർത്ഥികൾക്ക് നേരിട്ട് കാർഡിനായി അപേക്ഷിക്കാനാകില്ല. അതിനായുള്ള ഘട്ടങ്ങൾ താഴെ പറയുന്നവയാണ്:
സ്ഥാപനങ്ങളുടെ രജിസ്ട്രേഷൻ: ആദ്യം അതത് വിദ്യാഭ്യാസ സ്ഥാപനങ്ങൾ മോട്ടോർ വാഹന വകുപ്പിന്റെ ഔദ്യോഗിക വെബ്സൈറ്റായ 'എംവിഡി ലീഡ്സ്' (MVD Leads) പോർട്ടലിൽ രജിസ്റ്റർ ചെയ്യണം.
വിദ്യാർത്ഥികളുടെ അപേക്ഷ: ഇതിനുശേഷം വിദ്യാർത്ഥികൾ ഫോണിൽ 'MVD Leads' ആപ്പ് ഡൗൺലോഡ് ചെയ്ത് മൊബൈൽ നമ്പറും പാസ്പോർട്ട് സൈസ് ഫോട്ടോയും മറ്റ് വിവരങ്ങളും നൽകി അപേക്ഷ സമർപ്പിക്കണം.
പരിശോധന: വിദ്യാർത്ഥിയുടെ അപേക്ഷ ആദ്യം വിദ്യാഭ്യാസ സ്ഥാപന മേധാവിക്ക് ലഭിക്കും. അവർ അനുമതി നൽകിയ ശേഷം അപേക്ഷ ആർ.ടി.ഒയ്ക്ക് കൈമാറും. ആർ.ടി.ഒ തലത്തിലുള്ള അന്തിമ പരിശോധനയ്ക്ക് ശേഷമായിരിക്കും കൺസഷൻ കാർഡ് അനുവദിക്കുക.
അനുവദിക്കപ്പെട്ട കാർഡുകൾ വിദ്യാർത്ഥികൾക്ക് മൊബൈൽ ഫോണിൽ ഡൗൺലോഡ് ചെയ്ത് സൂക്ഷിക്കാം. യാത്രവേളയിൽ ഇത് കണ്ടക്ടറെ കാണിക്കുകയോ, അല്ലെങ്കിൽ ഇതിന്റെ പ്രിന്റൗട്ട് കൈവശം വെക്കുകയോ ചെയ്യാം.
ക്യു.ആർ കോഡ് വഴി വ്യാജന്മാരെ പൂട്ടും
ഡിജിറ്റൽ കാർഡിലെ ക്യു.ആർ കോഡ് സ്കാൻ ചെയ്യുന്നതിലൂടെ വിദ്യാർത്ഥിയുടെ പാസ് വ്യാജമാണോ, കാലാവധി കഴിഞ്ഞതാണോ എന്ന് ബസ് ജീവനക്കാർക്ക് എളുപ്പത്തിൽ തിരിച്ചറിയാനാകും. വിദ്യാർത്ഥിയുടെ പേര്, വിലാസം, പഠിക്കുന്ന സ്ഥാപനം, കോഴ്സ്, കാർഡിന്റെ കാലാവധി, ബന്ധപ്പെട്ട ആർ.ടി.ഓഫീസ് പരിധി തുടങ്ങിയ മുഴുവൻ വിവരങ്ങളും സ്കാൻ ചെയ്യുമ്പോൾ ലഭ്യമാകും.
പുതിയ ഡിജിറ്റൽ സംവിധാനത്തിലേക്ക് മാറാൻ മൂന്ന് മാസത്തെ സമയം അനുവദിച്ചിട്ടുണ്ട്. അതുവരെ നിലവിലുള്ള കാർഡുകൾ ഉപയോഗിച്ച് വിദ്യാർത്ഥികൾക്ക് യാത്ര ചെയ്യാം. ഏതെങ്കിലും സ്ഥാപനത്തിന്റെ അറിവോടെ കൺസഷൻ ദുരുപയോഗം ചെയ്താൽ ആ സ്ഥാപനത്തിനെതിരെ കർശന നടപടിയുണ്ടാകുമെന്ന് ജില്ലാ കളക്ടർ മുന്നറിയിപ്പ് നൽകി.
ബസ് ജീവനക്കാർക്കും സ്കൂളുകൾക്കുമുള്ള പ്രധാന നിർദ്ദേശങ്ങൾ:
ബസ് സ്റ്റോപ്പുകൾ: ബസുകൾ സ്കൂൾ സ്റ്റോപ്പുകളിൽ കൃത്യമായി നിർത്തി വിദ്യാർത്ഥികളെ കയറ്റണം. അല്ലാത്തപക്ഷം ലൈസൻസ് റദ്ദാക്കുന്നത് ഉൾപ്പെടെയുള്ള നടപടികൾ സ്വീകരിക്കും.
അധ്യാപകരുടെയും പോലീസിന്റെയും സേവനം: കുട്ടികൾ കയറുകയും ഇറങ്ങുകയും ചെയ്യുന്ന സമയങ്ങളിൽ സ്റ്റോപ്പുകളിൽ സ്കൂളുകൾ അധ്യാപകരെ ചുമതലപ്പെടുത്തണം. തിരക്കേറിയ സ്റ്റോപ്പുകളിൽ പോലീസിന്റെ സാന്നിധ്യമുണ്ടാകും.
അവധി ദിവസങ്ങളിലെ യാത്ര: സ്വാതന്ത്ര്യദിനം, റിപ്പബ്ലിക് ദിനം തുടങ്ങിയ അവധി ദിവസങ്ങളിൽ യൂണിഫോമിലെത്തുന്ന വിദ്യാർത്ഥികൾക്കും കൺസഷൻ അനുവദിക്കണം.
സമയപരിധി: രാവിലെ 7 മണി മുതൽ രാത്രി 7 മണി വരെ ബസിൽ കയറുന്ന വിദ്യാർത്ഥികൾക്ക് കൺസഷൻ ആനുകൂല്യം ലഭിക്കും.
പരാതികൾ: കൺസഷനുമായി ബന്ധപ്പെട്ട് ബസുകാർക്കെതിരെ പരാതിയുണ്ടെങ്കിൽ വിദ്യാർത്ഥികൾ സ്കൂൾ പ്രിൻസിപ്പലിനെ അറിയിക്കണം. പ്രിൻസിപ്പൽ വഴി പരാതി ആർ.ടി.ഒയ്ക്ക് കൈമാറണം.
വിദ്യാർത്ഥികളെ മഴയത്തും വെയിലത്തും നിർത്താതെ ഘട്ടങ്ങളായി ബസുകളിൽ കയറ്റാൻ ബസ് ഓപ്പറേറ്റർമാർക്ക് ആർ.ടി.ഒ നിർദ്ദേശം നൽകി. കുട്ടികളോട് മാന്യമായി പെരുമാറണമെന്നും കളക്ടർ ഓർമ്മിപ്പിച്ചു. യോഗത്തിൽ അസിസ്റ്റന്റ് കളക്ടർ എസ്. സ്വാതി, കണ്ണൂർ ഡി.ഇ.ഓ ദീപ വി, പോലീസ്, മോട്ടോർ വാഹന വകുപ്പ് ഉദ്യോഗസ്ഥർ, ബസ് ഉടമകളുടെ പ്രതിനിധികൾ എന്നിവർ പങ്കെടുത്തു.
