വിജയ് സർക്കാർ ഉടൻ താഴെവീഴുമെന്ന് എം.കെ.സ്റ്റാലിൻ, മകളിൻ ഉരുമൈ തുകൈ ഉടൻ വിതരണം ചെയ്യുമെന്ന് മുഖ്യമന്ത്രി ജോസഫ് വിജയ്
തമിഴ്നാട്ടിൽ വിജയ് സർക്കാരും ഡിഎംകെയും തമ്മിൽ രാഷ്ട്രീയപ്പോര് മുറുകുന്നു. മകളിൻ ഉരുമൈ തുകൈ ഉടൻ വിതരണം ചെയ്യുമെന്ന് മുഖ്യമന്ത്രി വിജയ് പ്രഖ്യാപിച്ചപ്പോൾ, ടിവികെ സർക്കാർ ഉടൻ താഴെവീഴുമെന്ന് എം.കെ സ്റ്റാലിൻ പ്രതികരിച്ചു.
Angel Varghese 
തമിഴ്നാട്ടിൽ രാഷ്ട്രീയപ്പോര് മുറുകുന്നു; വിജയ് സർക്കാർ ഉടൻ താഴെവീഴുമെന്ന് എം.കെ.സ്റ്റാലിൻ, മകളിൻ ഉരുമൈ തുകൈ ഉടൻ വിതരണം ചെയ്യുമെന്ന് മുഖ്യമന്ത്രി
ചെന്നൈ: തമിഴ്നാട്ടിൽ പുതുതായി അധികാരമേറ്റ സി. ജോസഫ് വിജയ്യുടെ നേതൃത്വത്തിലുള്ള ടിവികെ സർക്കാരും പ്രതിപക്ഷമായ ഡിഎംകെയും തമ്മിലുള്ള രാഷ്ട്രീയപ്പോര് മുറുകുന്നു. വീട്ടമ്മമാർക്കുള്ള ‘മകളിൻ ഉരുമൈ തുകൈ’ പദ്ധതി പ്രകാരമുള്ള 1000 രൂപയുടെ പ്രതിമാസ ധനസഹായം ഉടൻ വിതരണം ചെയ്യുമെന്ന് മുഖ്യമന്ത്രി സി. ജോസഫ് വിജയ് പ്രഖ്യാപിച്ചു. മേയ് മാസത്തെ തുക ഗുണഭോക്താക്കളുടെ അക്കൗണ്ടിൽ നേരിട്ട് നിക്ഷേപിക്കാൻ ഉദ്യോഗസ്ഥർക്ക് അദ്ദേഹം നിർദേശം നൽകിയിട്ടുണ്ട്.
முൻ ഡിഎംകെ സർക്കാരിന്റെ കാലത്ത് തിരഞ്ഞെടുപ്പ് പ്രഖ്യാപനത്തിന് മുന്നോടിയായി, ഏപ്രിൽ വരെയുള്ള മൂന്ന് മാസത്തെ തുകയും വേനൽക്കാല സ്പെഷലായി 2,000 രൂപയുമടക്കം 5,000 രൂപ ഒന്നിച്ച് ഉപഭോക്താക്കളുടെ അക്കൗണ്ടുകളിൽ നിക്ഷേപിച്ചിരുന്നു. ഇതിന് പിന്നാലെയാണ് പദ്ധതി മുടങ്ങാതെ മുന്നോട്ട് കൊണ്ടുപോകാൻ പുതിയ ടിവികെ സർക്കാർ തീരുമാനിച്ചത്.
മുൻ സർക്കാരിന്റെ കാലത്ത് വിദ്യാർഥികൾക്കായി നടപ്പിലാക്കിയ 'പുതുമൈ പെൺ', 'തമിഴ് പുതൽവൻ' തുടങ്ങിയ ധനസഹായ പദ്ധതികൾ തങ്ങളുടെ സർക്കാർ തുടർന്നുപോകുമെന്നും മുഖ്യമന്ത്രി വിജയ് വ്യക്തമാക്കി. ഈ പദ്ധതികൾ പ്രകാരം വിദ്യാർഥികൾക്ക് പ്രതിമാസം നൽകേണ്ട 1,000 രൂപ വിതരണം ചെയ്യാനുള്ള നടപടികളും ഉദ്യോഗസ്ഥതലത്തിൽ ആരംഭിച്ചിട്ടുണ്ട്.
വിജയിനെതിരെ രൂക്ഷവിമർശനവുമായി സ്റ്റാലിൻ
അതേസമയം, വീട്ടമ്മമാർക്കുള്ള സഹായധന പദ്ധതി പുനഃക്രമീകരിക്കുമെന്ന മുഖ്യമന്ത്രി വിജയ്യുടെ പ്രഖ്യാപനത്തിനെതിരെ മുൻ മുഖ്യമന്ത്രിയും ഡിഎംകെ അധ്യക്ഷനുമായ എം.കെ.സ്റ്റാലിൻ രംഗത്തെത്തി. വീട്ടമ്മമാർക്ക് പ്രതിമാസം 2,500 രൂപ വീതം നൽകുമെന്നാണ് വിജയ് തന്റെ തിരഞ്ഞെടുപ്പ് പ്രകടന പത്രികയിൽ പ്രഖ്യാപിച്ചിരുന്നത്. എന്നാൽ അത് പാലിച്ചില്ലെങ്കിലും നിലവിലുള്ള 1,000 രൂപയെങ്കിലും മുടക്കമില്ലാതെ നൽകാൻ വിജയ് തയാറാകണമെന്ന് സ്റ്റാലിൻ ആവശ്യപ്പെട്ടു.
"സി. ജോസഫ് വിജയ് നയിക്കുന്ന ടിവികെ സർക്കാർ ഏതുസമയത്തും താഴെവീണേക്കാം. അതിനായി ഡിഎംകെ പ്രവർത്തകർ എപ്പോഴും സമാധാനപരമായി തയാറായിരിക്കണം."
— എം.കെ.സ്റ്റാലിൻ
ചെന്നൈയിൽ പാർട്ടിയുടെ തിരഞ്ഞെടുപ്പ് പരാജയം ചർച്ച ചെയ്യുന്നതിനായി വിളിച്ചുചേർത്ത ജില്ലാ സെക്രട്ടറിമാരുടെ യോഗത്തിലാണ് സ്റ്റാലിൻ ഈ മുന്നറിയിപ്പ് നൽകിയത്.
തോൽവിയുടെ ഉത്തരവാദിത്വം ഏറ്റെടുക്കുന്നു; 2029-ൽ ഒന്നിച്ച് തിരഞ്ഞെടുപ്പ്
2029-ൽ ലോക്സഭാ തിരഞ്ഞെടുപ്പിനൊപ്പം തമിഴ്നാട്ടിൽ നിയമസഭാ തിരഞ്ഞെടുപ്പും നടക്കാൻ സാധ്യതയുണ്ടെന്ന് സ്റ്റാലിൻ യോഗത്തിൽ വിലയിരുത്തി. തിരഞ്ഞെടുപ്പ് പരാജയത്തിന്റെ പശ്ചാത്തലത്തിൽ പാർട്ടി ഭാരവാഹികൾ പരസ്പരം പഴിചാരുന്നത് ഒഴിവാക്കണമെന്നും, പാർട്ടിയുടെ നേതാവെന്ന നിലയിൽ പരാജയത്തിന്റെ പൂർണ്ണ ഉത്തരവാദിത്വം താൻ ഏറ്റെടുക്കുന്നുവെന്നും അദ്ദേഹം കൂട്ടിച്ചേർത്തു.
തിരഞ്ഞെടുപ്പ് തോൽവിയുടെ യഥാർത്ഥ കാരണം കണ്ടെത്തി 20 ദിവസത്തിനുള്ളിൽ റിപ്പോർട്ട് സമർപ്പിക്കാൻ പാർട്ടി ഉന്നതതല സമിതിക്ക് നിർദേശം നൽകിയിട്ടുണ്ട്. ഈ സമിതി സംസ്ഥാനത്തുടനീളം സഞ്ചരിച്ച്, ഓരോ മണ്ഡലത്തിലെയും എല്ലാതലത്തിലുമുള്ള ഭാരവാഹികളിൽ നിന്നും വിവരങ്ങൾ ശേഖരിക്കും. റിപ്പോർട്ട് ലഭിച്ചാലുടൻ ആവശ്യമായ തിരുത്തൽ നടപടികൾ ഉണ്ടാകുമെന്നും സ്റ്റാലിൻ വ്യക്തമാക്കി.
തിരഞ്ഞെടുപ്പ് തോൽവിക്ക് പിന്നാലെ പാർട്ടിയുടെ സമൂലമായ മാറ്റത്തിനായി പൊതുജനങ്ങളിൽ നിന്നും ഡിഎംകെ നിർദേശങ്ങൾ തേടിയിരുന്നു. നിയമസഭാ തിരഞ്ഞെടുപ്പിലെ ടിവികെയുടെ അപ്രതീക്ഷിത വിജയത്തെ ‘മാജിക് സൂനാമി’ എന്നാണ് സ്റ്റാലിൻ വിശേഷിപ്പിച്ചത്.
