തമിഴ്നാട്ടിലെ 1.31 കോടി സ്ത്രീകൾക്ക് 5000 രൂപ വീതം നൽകി സ്റ്റാലിൻ സർക്കാർ വൻ തിരഞ്ഞെടുപ്പ് പ്രഖ്യാപനം.
തമിഴ്നാട്ടിലെ 1.31 കോടി സ്ത്രീകൾക്ക് 5000 രൂപ വീതം കൈമാറി എം.കെ. സ്റ്റാലിൻ. തിരഞ്ഞെടുപ്പ് മുന്നിൽ കണ്ട് മൂന്ന് മാസത്തെ അവകാശത്തുകയും വേനൽക്കാല ആനുകൂല്യവും ഉൾപ്പെടെയാണ് തുക നൽകിയത്.
Angel Varghese 
തമിഴ്നാട്ടിലെ സ്ത്രീകൾക്ക് സ്റ്റാലിന്റെ 'തിരഞ്ഞെടുപ്പ് സമ്മാനം'; 1.31 കോടി പേരുടെ അക്കൗണ്ടിലേക്ക് 5000 രൂപ വീതമെത്തി
നിയമസഭാ തിരഞ്ഞെടുപ്പിന് മുന്നോടിയായി മാസ്റ്റർ സ്ട്രോക്കുമായി എം.കെ. സ്റ്റാലിൻ. 'കലൈജ്ഞർ മഗളിർ ഉരിമൈ തിട്ടം' പദ്ധതിയുടെ ഭാഗമായി മൂന്ന് മാസത്തെ തുക മുൻകൂറായും പ്രത്യേക വേനൽക്കാല ആനുകൂല്യവും ഉൾപ്പെടെയാണ് തുക കൈമാറിയത്.
ചെന്നൈ: തമിഴ്നാട്ടിലെ കോടിക്കണക്കിന് സ്ത്രീകൾക്ക് ആശ്വാസമായി ഡിഎംകെ സർക്കാരിന്റെ വൻ സാമ്പത്തിക സഹായം. സംസ്ഥാനത്തെ 1.31 കോടി സ്ത്രീകളുടെ ബാങ്ക് അക്കൗണ്ടുകളിലേക്ക് 5000 രൂപ വീതം മുഖ്യമന്ത്രി എം.കെ. സ്റ്റാലിൻ നേരിട്ട് കൈമാറി. നിയമസഭാ തിരഞ്ഞെടുപ്പ് പ്രഖ്യാപിക്കാൻ ദിവസങ്ങൾ മാത്രം ബാക്കിനിൽക്കെയാണ് പ്രതിപക്ഷ നീക്കങ്ങളെ മറികടന്നുകൊണ്ടുള്ള സ്റ്റാലിന്റെ ഈ നിർണ്ണായക പ്രഖ്യാപനം.
പ്രതിമാസം 1000 രൂപ നൽകുന്ന 'അവകാശത്തുക' പദ്ധതിയുടെ ഭാഗമായാണ് ഈ തുക വിതരണം ചെയ്തത്. ഫെബ്രുവരി മാസത്തെ തുകയ്ക്കൊപ്പം മാർച്ച്, ഏപ്രിൽ മാസങ്ങളിലെ വിഹിതം കൂടി മുൻകൂറായി നൽകി. ഇതിന് പുറമെ കഠിനമായ വേനൽ കണക്കിലെടുത്ത് 2000 രൂപയുടെ പ്രത്യേക വേനൽക്കാല പാക്കേജും സർക്കാർ പ്രഖ്യാപിക്കുകയായിരുന്നു. ഇതോടെയാണ് ഓരോ ഗുണഭോക്താവിനും 5000 രൂപ വീതം ലഭ്യമായത്.
തിരഞ്ഞെടുപ്പ് തടസ്സങ്ങളെ മുൻകൂട്ടി കണ്ടു
തിരഞ്ഞെടുപ്പ് പെരുമാറ്റച്ചട്ടം നിലവിൽ വരുന്നതോടെ തുക വിതരണം തടസ്സപ്പെടാൻ സാധ്യതയുണ്ടെന്ന വിലയിരുത്തലിലാണ് സർക്കാർ മുൻകൂട്ടി തുക കൈമാറിയത്. "തിരഞ്ഞെടുപ്പ് കാരണം കാട്ടി തുക മുടക്കാൻ ചിലർ ശ്രമിക്കുന്നു, എന്നാൽ ദ്രാവിഡ മോഡൽ സർക്കാർ അത് മുൻകൂട്ടി കണ്ട് നടപടിയെടുത്തു," എന്ന് മുഖ്യമന്ത്രി പറഞ്ഞു. തമിഴ് സ്ത്രീകളുടെ പിന്തുണയോടെ അടുത്ത തവണയും അധികാരത്തിൽ വരുമെന്നും, നിലവിലെ 1000 രൂപ എന്നത് 2000 രൂപയായി വർധിപ്പിക്കുമെന്നും സ്റ്റാലിൻ വാഗ്ദാനം നൽകി
