എൽദോസ് കുന്നപ്പിള്ളിക്കെതിരായ ബലാത്സംഗക്കേസിൽ നാടകീയ തിരിവ് പരാതിക്കാരി കോടതിയിൽ മൊഴി മാറ്റി
പെരുമ്പാവൂർ മുൻ എംഎൽഎ എൽദോസ് കുന്നപ്പിള്ളിക്കെതിരായ ബലാത്സംഗക്കേസിൽ പരാതിക്കാരി മൊഴി മാറ്റി. നെയ്യാറ്റിൻകര കോടതിയിൽ നടന്ന വിചാരണയ്ക്കിടെയാണ് എൽദോസ് തനിക്കെതിരെ അതിക്രമം നടത്തിയിട്ടില്ലെന്ന് അതിജീവിത വ്യക്തമാക്കിയത്.
അനില എം കൃഷ്ണൻ 
എൽദോസ് കുന്നപ്പിള്ളിക്കെതിരായ ബലാത്സംഗക്കേസ്: പരാതിക്കാരി മൊഴി മാറ്റി; പീഡിപ്പിച്ചിട്ടില്ലെന്ന് കോടതിയിൽ വിശദീകരണം
തിരുവനന്തപുരം: പെരുമ്പാവൂർ മുൻ എംഎൽഎ എൽദോസ് കുന്നപ്പിള്ളിക്കെതിരായ ബലാത്സംഗക്കേസിൽ പരാതിക്കാരി കോടതിയിൽ മൊഴി മാറ്റി. നെയ്യാറ്റിൻകര കോടതിയിൽ കേസിന്റെ വിചാരണ നടക്കുന്നതിനിടെയാണ് എൽദോസ് കുന്നപ്പിള്ളി തന്നെയോ ശാരീരികമായി പീഡിപ്പിച്ചിട്ടില്ലെന്ന് അതിജീവിത വ്യക്തമാക്കിയത്. തനിക്കെതിരെ നിലവിൽ പരാതികളൊന്നും ഇല്ലെന്നും അവർ കോടതിയെ അറിയിച്ചു.
കേസിലെ രണ്ടും മൂന്നും പ്രതികളും എൽദോസിന്റെ സുഹൃത്തുക്കളുമായ റനിഷ, സിപ്പി നുറുദ്ദീൻ എന്നിവർ തന്നെയോ തന്റെ കുടുംബത്തെയോ ഭീഷണിപ്പെടുത്തിയിട്ടില്ലെന്നും അതിജീവിത കോടതിയിൽ പറഞ്ഞു. വിചാരണ വേളയിൽ അതിജീവിതയ്ക്ക് ഒപ്പമുണ്ടായിരുന്ന രണ്ട് പ്രധാന സാക്ഷികളുടെ മൊഴികളും പ്രതികൾക്ക് അനുകൂലമായാണ് രേഖപ്പെടുത്തിയത്. എൽദോസ് കുന്നപ്പിള്ളി ഉൾപ്പെടെയുള്ള പ്രതികൾ കോടതിയിൽ ഹാജരുണ്ടായിരുന്നു. എന്നാൽ, മുൻപ് നൽകിയ ഗുരുതരമായ ആരോപണങ്ങളിൽ നിന്നും അതിജീവിത പെട്ടെന്ന് പിന്മാറാനുണ്ടായ സാഹചര്യം വ്യക്തമല്ല. കേസിലെ തുടർന്നുള്ള നിയമനടപടികൾ കോടതി നാളെ പരിഗണിക്കും.
കേസിന്റെ പശ്ചാത്തലം
2022 സെപ്റ്റംബർ 28-നാണ് തിരുവനന്തപുരം പേട്ട സ്വദേശിയായ യുവതി എൽദോസ് കുന്നപ്പിള്ളിക്കെതിരെ ശാരീരിക പീഡന പരാതിയുമായി രംഗത്തെത്തിയത്. മദ്യപിച്ച് വീട്ടിലെത്തി ഉപദ്രവിച്ചെന്നും, പിന്നീട് കാറിൽ ബലമായി കയറ്റി കോവളത്തേക്ക് കൊണ്ടുപോകുന്ന വഴിയിൽ വീണ്ടും അതിക്രമം കാട്ടിയെന്നുമായിരുന്നു ആദ്യ പരാതി. തുടർന്ന് പരാതി പിൻവലിക്കുന്നതിനായി 30 ലക്ഷം രൂപ എൽദോസ് തനിക്ക് വാഗ്ദാനം ചെയ്തതായും യുവതി ആരോപിച്ചിരുന്നു.
വിവിധ സ്ഥലങ്ങളിൽ വെച്ച് യുവതിയെ മൂന്ന് തവണ എൽദോസ് കുന്നപ്പിള്ളി ബലാത്സംഗം ചെയ്തതായും, വിവരം പുറത്തുപറയുമെന്ന് ഭീഷണിപ്പെടുത്തിയപ്പോൾ കോവളത്തെ കുന്നിൻ മുകളിൽ നിന്ന് തള്ളിയിട്ട് കൊലപ്പെടുത്താൻ ശ്രമിച്ചതായും ജില്ലാ ക്രൈംബ്രാഞ്ച് സമർപ്പിച്ച കുറ്റപത്രത്തിൽ ചൂണ്ടിക്കാട്ടിയിരുന്നു. ഈ ആരോപണങ്ങളിലാണ് ഇപ്പോൾ കോടതിയിൽ നാടകീയമായ മൊഴിമാറ്റം ഉണ്ടായിരിക്കുന്നത്.
