സംഘടനയെ തകർക്കാൻ ശ്രമം നടി അൻസിബ ഹസ്സന് അമ്മ യുടെ കാരണം കാണിക്കൽ നോട്ടീസ്
താരസംഘടനയായ അമ്മ യ്ക്കെതിരെ പരസ്യ പ്രസ്താവനകൾ നടത്തിയെന്ന ആരോപണത്തിൽ നടി അൻസിബ ഹസ്സന് കാരണം കാണിക്കൽ നോട്ടീസ്. മറുപടി തൃപ്തികരമല്ലെങ്കിൽ സസ്പെൻഷൻ ഉൾപ്പെടെയുള്ള നടപടികൾക്ക് സാധ്യത.
Angel Varghese 
സംഘടനയെ തകർക്കാൻ ശ്രമം; നടി അൻസിബ ഹസ്സന് 'അമ്മ'യുടെ കാരണം കാണിക്കൽ നോട്ടീസ്
കൊച്ചി: മാധ്യമങ്ങളിലൂടെയും സോഷ്യൽ മീഡിയയിലൂടെയും താരസംഘടനയ്ക്കെതിരെ നിരന്തരം പരസ്യ പ്രസ്താവനകൾ നടത്തിയെന്ന ഗുരുതരമായ ആരോപണത്തിന്മേൽ നടി അൻസിബ ഹസ്സന് കാരണം കാണിക്കൽ നോട്ടീസ് അയച്ച് 'അമ്മ' (AMMA). സംഘടനയ്ക്കുള്ളിൽ ചർച്ച ചെയ്ത് പരിഹരിക്കാമായിരുന്ന ആഭ്യന്തര പ്രശ്നങ്ങളെ തെരുവിലേക്ക് വലിച്ചിഴച്ച് സംഘടനയ്ക്ക് വലിയ രീതിയിൽ കളങ്കമുണ്ടാക്കാനും തകർക്കാനും നടി ശ്രമിച്ചെന്നാണ് ഭാരവാഹികളുടെ വിലയിരുത്തൽ.
ബൈലോയ്ക്ക് വിരുദ്ധമായി അച്ചടക്കലംഘനം നടത്തിയ നടിക്ക് എതിരെ എന്തുകൊണ്ട് നടപടി സ്വീകരിക്കരുത് എന്ന് വ്യക്തമാക്കിക്കൊണ്ട് വരുന്ന 17-ാം തീയതിക്ക് മുൻപ് മറുപടി നൽകാനാണ് സംഘടനയുടെ കർശന നിർദ്ദേശം. നിശ്ചിത സമയത്തിനകം നൽകുന്ന മറുപടി തൃപ്തികരമല്ലെങ്കിൽ സസ്പെൻഷൻ ഉൾപ്പെടെയുള്ള ശക്തമായ അച്ചടക്ക നടപടികളിലേക്ക് സംഘടന കടക്കുമെന്നാണ് ലഭിക്കുന്ന സൂചനകൾ.
സഹപ്രവർത്തകരായ നടി ലക്ഷ്മിപ്രിയ, നടൻ ടിനി ടോം എന്നിവരുമായി ബന്ധപ്പെട്ട കടുത്ത നിയമപോരാട്ടങ്ങൾ തുടരുന്നതിനിടയിലാണ് അൻസിബയ്ക്ക് താരസംഘടനയിൽ നിന്നും ഇപ്പോൾ പുതിയ തിരിച്ചടി നേരിട്ടിരിക്കുന്നത്. ലക്ഷ്മിപ്രിയയ്ക്കും തൃപ്പൂണിത്തുറ വനിതാ സ്റ്റേഷനിലെ എസ്ഐക്കുമെതിരെ താൻ നൽകിയ പരാതിയിൽ കഴമ്പില്ലെന്ന പോലീസിന്റെ അന്തിമ റിപ്പോർട്ടിനെതിരെ അൻസിബ കഴിഞ്ഞ ദിവസം കടുത്ത പ്രതിഷേധവുമായി രംഗത്തെത്തിയിരുന്നു.
സ്റ്റേഷനിൽ തന്നെ നിയമവിരുദ്ധമായി തടഞ്ഞുവെച്ച് മാനസികമായി പീഡിപ്പിച്ചെന്ന പരാതിയിൽ കേസെടുക്കാനാവില്ലെന്ന എസിപിയുടെ കണ്ടെത്തൽ പൂർണ്ണമായി തള്ളിക്കളഞ്ഞ നടി, നീതിക്കായി കോടതിയെ സമീപിക്കുമെന്ന് വ്യക്തമാക്കിയിട്ടുണ്ട്. ഇതിനുപുറമേ, തനിക്കെതിരെ വർഗീയ പരാമർശങ്ങളും അധിക്ഷേപങ്ങളും നടത്തിയെന്ന് കാട്ടി നടൻ ടിനി ടോമിനെതിരെ കടവന്ത്ര പോലീസിൽ നൽകിയ പരാതിയുമായും നടി മുന്നോട്ടുപോവുകയാണ്. പോലീസുമായുള്ള ഭിന്നതയും സഹപ്രവർത്തകർക്കെതിരെയുള്ള കേസുകളും നിലനിൽക്കുന്ന സാഹചര്യത്തിൽ 'അമ്മ' കൂടി രംഗത്തെത്തിയത് നടിക്ക് വരും ദിവസങ്ങളിൽ വലിയ പ്രതിസന്ധി സൃഷ്ടിച്ചേക്കും.
