പ്രായപൂർത്തിയാകാത്ത കുട്ടിയെ പീഡിപ്പിച്ച നെയ്യാറ്റിൻകരയിൽ മൂന്ന് പ്രതികൾക്ക് കഠിനതടവും ലക്ഷങ്ങൾ പിഴയും

11 കാരിയെ പീഡിപ്പിച്ച കേസ്: മൂന്ന് പേർക്ക് കഠിനതടവും പിഴയും

​നെയ്യാറ്റിൻകര: പതിനൊന്ന് വയസ്സുകാരിയെ ലൈംഗികമായി പീഡിപ്പിച്ച കേസിൽ മൂന്ന് പ്രതികൾക്ക് കഠിന തടവും പിഴയും വിധിച്ച് നെയ്യാറ്റിൻകര അതിവേഗ പോക്സോ കോടതി. ഒന്നാം പ്രതിയായ നെയ്യാറ്റിൻകര സ്വദേശി അബ്ദുൽ ഗഫൂറിന് (53) 25 വർഷം കഠിനതടവും ഒരു ലക്ഷം രൂപ പിഴയും ശിക്ഷ വിധിച്ചു.

​ഇയാളുടെ സുഹൃത്തുക്കളായ രണ്ടാം പ്രതി മരുത്തൂർ സ്വദേശി ഭുവനചന്ദ്രൻ (71), മൂന്നാം പ്രതി കടവട്ടാരം സ്വദേശി ഷാജി (57) എന്നിവർക്ക് 20 വർഷം വീതം കഠിന തടവും ഒരു ലക്ഷം രൂപ വീതം പിഴയുമാണ് കോടതി ചുമത്തിയത്. നെയ്യാറ്റിൻകര അതിവേഗ പോക്സോ കോടതി ഒന്ന് ജഡ്ജി കെ.എം. സുജയുടേതാണ് ഉത്തരവ്. പിഴത്തുക ഒടുക്കിയില്ലെങ്കിൽ പ്രതികൾ കൂടുതൽ കാലം ജയിൽ ശിക്ഷ അനുഭവിക്കേണ്ടി വരും.

​കേസിന്റെ പശ്ചാത്തലം

2011-ലാണ് കേസിനാസ്പദമായ സംഭവങ്ങൾ നടക്കുന്നത്. ട്യൂഷന് പോയ സമയത്ത് രണ്ടാംപ്രതിയായ ഭുവനചന്ദ്രൻ കുട്ടിയെ പീഡിപ്പിക്കുകയായിരുന്നു. തുടർന്ന് മൂന്നാം പ്രതിയായ ഷാജിയുടെ നെയ്യാറ്റിൻകര ടിബി ജങ്ഷനിലെ ഫാൻസി സ്റ്റോറിൽ വള വാങ്ങാൻ എത്തിയപ്പോഴും കുട്ടി ലൈംഗിക പീഡനത്തിന് ഇരയായി.

​തുടർച്ചയായ പീഡനങ്ങളെ തുടർന്ന് ശാരീരിക അസ്വസ്ഥത പ്രകടിപ്പിച്ച കുട്ടി, സ്കൂളിൽ നടന്ന കൗൺസലിംഗിനിടെയാണ് അധ്യാപകരോട് ക്രൂരത വിവരിച്ചത്. തുടർന്ന് സ്കൂൾ അധികൃതർ പോലീസിൽ വിവരമറിയിക്കുകയായിരുന്നു.

​പ്രോസിക്യൂഷന് വേണ്ടി സ്പെഷ്യൽ പബ്ലിക് പ്രോസിക്യൂട്ടർ പൂവച്ചൽ എഫ്. വിനോദ്, അഡ്വ. വി.ആർ. മായാദേവി എന്നിവർ കോടതിയിൽ ഹാജരായി. നെയ്യാറ്റിൻകര എസ്.എച്ച്.ഒ മാരായിരുന്ന ബി.എസ്. സജിമോൻ, എം.അനിൽകുമാർ എന്നിവരുടെ നേതൃത്വത്തിലാണ് കേസ് അന്വേഷണം പൂർത്തിയാക്കി കുറ്റപത്രം സമർപ്പിച്ചത്.