ലഹരിക്കെതിരെ ഓപ്പറേഷൻ തൂഫാൻ പോലീസ് സ്റ്റേഷനുകളിൽ പുതിയ മാറ്റങ്ങളുമായി ആഭ്യന്തരമന്ത്രി രമേശ് ചെന്നിത്തല
ആഭ്യന്തരമന്ത്രി രമേശ് ചെന്നിത്തലയുടെ നേതൃത്വത്തിൽ ചേർന്ന ഉന്നതതല പോലീസ് യോഗത്തിലെ സുപ്രധാന തീരുമാനങ്ങൾ
Angel Varghese 
പോലീസ് സ്റ്റേഷനുകളിൽ ജനസമ്പർക്ക സമിതികൾ; ലഹരിക്കെതിരെ 'ഓപ്പറേഷൻ തൂഫാൻ': ആഭ്യന്തരമന്ത്രിയുടെ അധ്യക്ഷതയിൽ ഉന്നതതല യോഗം ചേർന്നു
തിരുവനന്തപുരം: സംസ്ഥാനത്തെ പോലീസ് സ്റ്റേഷനുകളുടെ പ്രവർത്തനം കൂടുതൽ ജനസൗഹൃദമാക്കുന്നതിനും ക്രമസമാധാനപാലനം ശക്തമാക്കുന്നതിനുമായി വിപ്ലവകരമായ തീരുമാനങ്ങളുമായി ആഭ്യന്തരവകുപ്പ്. ബഹുമാനപ്പെട്ട ആഭ്യന്തരമന്ത്രി ശ്രീ. രമേശ് ചെന്നിത്തലയുടെ അധ്യക്ഷതയിൽ പോലീസ് ആസ്ഥാനത്ത് ചേർന്ന ഉന്നത പോലീസ് ഉദ്യോഗസ്ഥരുടെ യോഗത്തിലാണ് സംസ്ഥാനത്തെ ക്രമസമാധാന നില മെച്ചപ്പെടുത്തുന്നതിനുള്ള സുപ്രധാന തീരുമാനങ്ങൾ കൈക്കൊണ്ടത്.
ജനങ്ങളുടെ പരാതികൾ കൃത്യമായി കേൾക്കുന്നതിനും അവയ്ക്ക് വേഗത്തിൽ പരിഹാരം കാണുന്നതിനുമായി സംസ്ഥാനത്തെ എല്ലാ പോലീസ് സ്റ്റേഷനുകളിലും 'ജനസമ്പർക്ക സമിതികൾ' രൂപീകരിക്കുമെന്ന് ആഭ്യന്തരമന്ത്രി അറിയിച്ചു. ജനമൈത്രി പോലീസ് സംവിധാനം കൂടുതൽ ശക്തമാക്കുന്നതിന്റെ ഭാഗമായാണ് ഈ നടപടി.
ലഹരി മാഫിയക്കെതിരെ 'ഓപ്പറേഷൻ തൂഫാൻ'
സംസ്ഥാനത്ത് വർദ്ധിച്ചുവരുന്ന ലഹരി മാഫിയയുടെ പ്രവർത്തനങ്ങളെ വേരോടെ പിഴുതെറിയാൻ "ഓപ്പറേഷൻ തൂഫാൻ ദ നാർകോ ഹണ്ട്" (Operation Toofaan: The Narco Hunt) എന്ന പേരിൽ പുതിയ പ്രത്യേക പദ്ധതിക്ക് യോഗം രൂപം നൽകി. ലഹരി വിപണന ശൃംഖലകളെ അടിച്ചമർത്താൻ വിട്ടുവീഴ്ചയില്ലാത്ത നടപടികളുണ്ടാകും.
സ്റ്റേഷനുകളുടെ ചുമതലയിൽ മാറ്റം; അഞ്ചംഗ സമിതി
പോലീസ് സ്റ്റേഷനുകളുടെ ചുമതലയുമായി ബന്ധപ്പെട്ട വിഷയങ്ങളിൽ വിശദമായ പഠനം നടത്തി റിപ്പോർട്ട് സമർപ്പിക്കുന്നതിനായി സംസ്ഥാന പോലീസ് മേധാവി, ഹെഡ്ക്വാർട്ടേഴ്സ് എ.ഡി.ജി.പി.യുടെ (ADGP) നേതൃത്വത്തിൽ അഞ്ചംഗ പ്രത്യേക ടീമിനെ നിയോഗിച്ചിട്ടുണ്ട്. ഈ സമിതിയുടെ റിപ്പോർട്ട് ലഭിച്ച ശേഷം അതനുസരിച്ചുള്ള അന്തിമ നടപടികൾ സ്വീകരിക്കും.
മറ്റ് പ്രധാന തീരുമാനങ്ങൾ
കെട്ടിക്കിടക്കുന്ന വാഹനങ്ങൾ ഒഴിവാക്കും: പോലീസ് സ്റ്റേഷനുകളിൽ വർഷങ്ങളായി കസ്റ്റഡിയിലെടുത്ത് കെട്ടിക്കിടക്കുന്ന വാഹനങ്ങൾ പോലീസ് ആക്ട് പ്രകാരമുള്ള നടപടികൾ പാലിച്ച് എത്രയും വേഗം ഒഴിവാക്കും.
സ്ത്രീകളുടെയും കുട്ടികളുടെയും സുരക്ഷ: കുട്ടികൾക്കും സ്ത്രീകൾക്കും എതിരായ അക്രമങ്ങളിൽ അതിശക്തമായ നിയമനടപടികൾ സ്വീകരിക്കും.
ട്രാഫിക് പരിഷ്കാരം: റോഡപകടങ്ങൾ കുറയ്ക്കുന്നതിനായി അത്യാധുനിക സാങ്കേതികവിദ്യയുടെ സഹായം പരമാവധി പ്രയോജനപ്പെടുത്തും.
പരിശീലന പരിഷ്കരണം: ആധുനിക കാലഘട്ടത്തിന് അനുയോജ്യമായ രീതിയിൽ പോലീസ് ട്രെയിനിങ് സിലബസ് പൂർണ്ണമായി പരിഷ്കരിക്കും.
സൈബർ സെൽ ശക്തമാക്കും: വർദ്ധിച്ചുവരുന്ന സൈബർ കുറ്റകൃത്യങ്ങൾ നേരിടാൻ പ്രത്യേക കർമ്മപദ്ധതിക്ക് രൂപം നൽകും. എല്ലാ സ്റ്റേഷനുകളിലും സി.സി.ടി.വി (CCTV) ക്യാമറകൾ പ്രവർത്തനസജ്ജമാണെന്ന് ഉറപ്പാക്കും.
കസ്റ്റോഡിയൽ മർദ്ദനങ്ങൾ ഇല്ലാതാക്കും: കസ്റ്റോഡിയൽ വയലൻസ് പൂർണ്ണമായും ഇല്ലാതാക്കുമെന്നും, അതോടൊപ്പം തന്നെ പോലീസ് സേനാംഗങ്ങൾക്കിടയിൽ സമ്മർദ്ദരഹിതമായ തൊഴിൽ അന്തരീക്ഷം സൃഷ്ടിക്കുമെന്നും ആഭ്യന്തരമന്ത്രി വ്യക്തമാക്കി.
