ഭൂമിയെ കാക്കാൻ കൈകോർത്ത് മൂവാറ്റുപുഴ സിപിഐ ടൗൺ ലോക്കൽ കമ്മിറ്റി ‘ഓർമ്മമരം’ നട്ടു
ലോക പരിസ്ഥിതി ദിനാചരണത്തോടനുബന്ധിച്ച് സിപിഐ ടൗൺ ലോക്കൽ കമ്മിറ്റിയുടെ നേതൃത്വത്തിൽ നെഹ്റു പാർക്കിലെ ഓഫീസിന് മുൻപിൽ ഓർമ്മമരം നട്ടു. പരിസ്ഥിതി സംരക്ഷണ പ്രതിജ്ഞയും എടുത്തു.
അനില എം കൃഷ്ണൻ 
പരിസ്ഥിതിയെ കാക്കാൻ കൈകോർത്ത് മൂവാറ്റുപുഴ; സിപിഐ ടൗൺ ലോക്കൽ കമ്മിറ്റി ‘ഓർമ്മമരം’ നട്ടു
മൂവാറ്റുപുഴ: പ്രകൃതി സംരക്ഷണത്തിന്റെ വലിയ ഓർമ്മപ്പെടുത്തലുകളുമായി ഇന്ന് ലോക പരിസ്ഥിതി ദിനം. വരുംതലമുറയ്ക്കായി ഭൂമിയെയും വനസമ്പത്തിനെയും കാത്തുസൂക്ഷിക്കുക, ആഗോളതാപനത്തിനും മലിനീകരണത്തിനുമെതിരെ ജനമനസ്സുകളെ ഉണർത്തുക എന്ന ലക്ഷ്യത്തോടെയാണ് ഐക്യരാഷ്ട്രസഭയുടെ ആഹ്വാനപ്രകാരം എല്ലാ വർഷവും ജൂൺ 5 പരിസ്ഥിതി ദിനമായി ആചരിക്കുന്നത്. വംശനാശഭീഷണി നേരിടുന്ന പ്രകൃതിയെ വീണ്ടെടുക്കാൻ നാടൊന്നാകെ കൈകോർക്കുന്ന കാഴ്ച്ചയാണ് ഈ ദിനത്തിൽ കാണാനാകുന്നത്.
കേരളത്തിലുടനീളം വിപുലമായ പരിപാടികൾ നടക്കുന്നതിന്റെ ഭാഗമായി, മൂവാറ്റുപുഴയിൽ സിപിഐ ടൗൺ ലോക്കൽ കമ്മിറ്റിയുടെ നേതൃത്വത്തിൽ പരിസ്ഥിതി ദിനാചരണവും ഓർമ്മമരം നടീലും സംഘടിപ്പിച്ചു. നെഹ്റു പാർക്കിലെ സിപിഐ ഓഫീസിന് മുൻപിൽ നടന്ന ചടങ്ങിൽ, അന്തരിച്ച മുൻ നേതാവ് സഖാവ് ഇ. ഐ. കുമാരന്റെ സ്മരണയ്ക്കായി ‘ഓർമ്മമരം’ നട്ടു. സിപിഐ ലോക്കൽ സെക്രട്ടറി സഖാവ് കെ. പി. അലികുഞ്ഞാണ് വൃക്ഷത്തൈ നട്ടുകൊണ്ട് പരിപാടി ഉദ്ഘാടനം ചെയ്തത്.
തുടർന്ന് നടന്ന ചടങ്ങിൽ സഖാവ് സിന്ധു ജയൻ പരിസ്ഥിതി സംരക്ഷണ പ്രതിജ്ഞ ചൊല്ലിക്കൊടുത്തു. ടി. എസ്. ബിബിൻ അധ്യക്ഷത വഹിച്ച ചടങ്ങിൽ ഷാജി പാലത്തിങ്കൽ സ്വാഗതവും ടി. എസ്. അജി നന്ദിയും പറഞ്ഞു. കെ. പി. സബീഷ്, കെ. പി. അബ്ദുൽ കരീം, ബൈജു വൺവേ, കെ. എ. അസീസ്, പീറ്റർ പോൾ, വി. എം. നവാസ് തുടങ്ങിയ പ്രമുഖ നേതാക്കളും പ്രവർത്തകരും ചടങ്ങിൽ പങ്കെടുത്തു. പച്ചപ്പ് നിലനിർത്തേണ്ടത് നാളെയുടെ അതിജീവനത്തിന് അനിവാര്യമാണെന്ന സന്ദേശം പങ്കുവെച്ചാണ് ചടങ്ങ് സമാപിച്ചത്.
