ടൊവിനോ തോമസ് ചിത്രം പള്ളിച്ചട്ടമ്പി ഏപ്രിൽ 9 ന് കയാദു ലോഹറിന്റെ ലുക്ക് പുറത്ത്
മലയാള സിനിമയിലെ യുവ സൂപ്പർതാരം ടൊവിനോ തോമസിനെ നായകനാക്കി ഡിനോ ജോസ് ആന്റണി സംവിധാനം ചെയ്യുന്ന ബിഗ് ബജറ്റ് ചിത്രം പള്ളിച്ചട്ടമ്പി
Vazhoor Jose
117
ടൊവിനോ തോമസ് ചിത്രം 'പള്ളിച്ചട്ടമ്പി' ഏപ്രിൽ 9-ന്; കയാദു ലോഹറിന്റെ ലുക്ക് പുറത്ത്!
കൊച്ചി: മലയാള സിനിമയിലെ യുവ സൂപ്പർതാരം ടൊവിനോ തോമസിനെ നായകനാക്കി ഡിനോ ജോസ് ആന്റണി സംവിധാനം ചെയ്യുന്ന ബിഗ് ബജറ്റ് ചിത്രം 'പള്ളിച്ചട്ടമ്പി'യുടെ റിലീസ് തീയതി പ്രഖ്യാപിച്ചു. ചിത്രം ഏപ്രിൽ ഒമ്പതിന് തീയേറ്ററുകളിൽ എത്തും. റിലീസ് പ്രഖ്യാപനത്തോടൊപ്പം ചിത്രത്തിലെ നായിക കയാദു ലോഹറിന്റെ ക്യാരക്ടർ പോസ്റ്ററും അണിയറപ്രവർത്തകർ പുറത്തുവിട്ടു. മലയാളം ഉൾപ്പെടെ അഞ്ച് ഭാഷകളിലായി പാൻ-ഇന്ത്യൻ തലത്തിലാണ് ചിത്രം റിലീസിനെത്തുന്നത്.
ചരിത്രവും പോരാട്ടവും പറയുന്ന പശ്ചാത്തലം
1957-58 കാലഘട്ടത്തിലെ കേരളത്തിന്റെ സാമൂഹ്യ-രാഷ്ട്രീയ പശ്ചാത്തലത്തിൽ ഒരു മലയോര ഗ്രാമത്തിന്റെ കഥയാണ് ചിത്രം പറയുന്നത്. അധ്വാനിക്കുന്ന സാധാരണക്കാരുടെ ജീവിതവും, അവരുടെ ധാർമ്മിക രോഷവും, ഒപ്പം മനോഹരമായ ഒരു പ്രണയകഥയും കോർത്തിണക്കിയ പക്കാ എന്റർടൈനറായിരിക്കും പള്ളിച്ചട്ടമ്പി. ടൊവിനോ തോമസിന്റെ കരിയറിലെ തന്നെ ഏറ്റവും വലിയ ബഡ്ജറ്റിൽ ഒരുങ്ങുന്ന ചിത്രമാണിത്.
ലൊക്കേഷനുകളും താരനിരയും
തൊടുപുഴ കാഞ്ഞാർ, മൂലമറ്റം, പൈനാവ്, മൈസൂർ, ചാലക്കുടി, ഹൊഗനക്കൽ, കുട്ടിക്കാനം തുടങ്ങിയ വ്യത്യസ്തമായ ലൊക്കേഷനുകളിലായി 130 ദിവസത്തോളം നീണ്ടുനിന്ന ചിത്രീകരണമാണ് പൂർത്തിയായത്. വിജയരാഘവൻ, ബാബുരാജ്, സുധീർ കരമന, ജോണി ആന്റണി തുടങ്ങി വൻ താരനിരയും ചിത്രത്തിലുണ്ട്. 'പത്തൊമ്പതാം നൂറ്റാണ്ട്' എന്ന ചിത്രത്തിലൂടെ ശ്രദ്ധേയയായ കയാദു ലോഹറാണ് നായിക.
അണിയറപ്രവർത്തകർ
വേൾഡ് വൈഡ് ഫിലിംസ് ഇന്ത്യയുടെയും സി ക്യൂബ് ബ്രോസ് എന്റർടൈൻമെന്റിന്റെയും ബാനറിലാണ് ചിത്രം നിർമ്മിക്കുന്നത്. 'ശിക്കാർ' പോലുള്ള ഹിറ്റ് ചിത്രങ്ങൾക്ക് തൂലിക ചലിപ്പിച്ച എസ്. സുരേഷ് ബാബുവാണ് തിരക്കഥ ഒരുക്കുന്നത്. ജെയ്ക് ബിജോയ്സ് സംഗീതവും ടിജോ ടോമി ഛായാഗ്രഹണവും നിർവ്വഹിക്കുന്നു.
